1 Hadi 16 - Samarenyo Meaning-Based Bible (1984)（MBBSAM）

1Naghimangraw an Ginoo kan Jehu nga manaragna nga anak ni Hanani, ngan iginhatag ha iya ini nga mensahe para kan Baasa:

2“Waray may nakilala ha imo hadto, kundi ginhimo ko ikaw nga pangulo han akon mga tawo nga Israel. Ngan yana nakasala ka sugad kan Jeroboam, ngan gintutdoan mo hin pakasala an akon mga tawo. An ira mga sala amo an nakaaghat ha akon hin kasina,

3sanglit pupuohon ko ikaw ngan an imo panimalay, sugad han akon ginbuhat kan Jeroboam.

4Kakaonon hin mga ayam an bisan hin-o nga sakop han imo panimalay nga mapatay ha syudad, ngan kakaonon hin katamsihan an bisan hin-o nga mapatay ha kaumhan.”

5Nahisurat an ngatanan nga nabuhat ni Baasa, ngan an ngatanan niya nga pakig-away ngan an iya kagamhanan dida han Kasaysayan han Kahadian han Israel.

6Namatay hi Baasa ngan iginlubong hiya didto ha Tersa, ngan sinmaliwan ha iya hin pagkahadi hi Ela nga iya anak.

7Iginhatag ni Jehu nga manaragna an mensahe han Ginoo kontra kan Baasa ngan han iya panimalay tungod han mga sala nga nabuhat ni Baasa ha atubangan han Ginoo. Nasina ha iya an Ginoo diri la tungod han maraot nga iya ginbuhat, sugad han ginbuhat ni Hadi Jeroboam nga una ha iya, kundi tungod liwat nga iya pinamatay an ngatanan nga mga sakop han panimalay ni Jeroboam.

Naghadi han Israel hi Ela

8Dida han ika-26 ka tuig nga pagkahadi ni Hadi Asa, nahimo nga hadi han Israel hi Ela nga anak ni Baasa, ngan naghadi hiya didto ha Tersa hin duha ka tuig.

9Naglarang hin pagpatay ha iya hi Simbri nga usa han iya mga opisyal, nga tinaporan han katunga han mga karuwahe han hadi. Usa ka adlaw didto ha Tersa naghubog an hadi ha balay ni Arza nga tinaporan han palasyo.

10Sinmakob han balay hi Simbri, ginpatay niya hi Ela, ngan sinmaliwan hiya ha iya hin pagkahadi. Nahinabo ini dida han ika-27 ka tuig nga pagkahadi ni Hadi Asa han Juda.

11Han pagkahadi gudla ni Simbri, iya dayon pinamatay an ngatanan nga mga sakop han panimalay ni Baasa. Ginpatay an ngatanan nga kalalaken-an nga uropod ngan sangkay niya.

12Sanglit, sumala han iginsiring han Ginoo kontra kan Baasa pinaagi kan Jehu nga manaragna, pinamatay ni Simbri an bug-os nga panimalay ni Baasa.

13Tungod han ira pagsingba hin mga diyosdiyos, ngan tungod han ira pagtutdoi han Israel ngadto hin pakasala gin-aghat ni Baasa ngan ni Ela nga iya anak an kasina han Ginoo nga Dyos han Israel.

14Nahisurat an ngatanan nga nabuhat ni Ela dida han Kasaysayan han Kahadian han Israel.

Naghadi han Israel hi Simbri

15Dida han ika-27 ka tuig nga pagkahadi han Juda ni Hadi Asa, naghadi han Israel hi Simbri hin pito ka adlaw didto ha Tersa. Ginpalibotan han mga sondalo han Israel an syudad han Gebeton ha Filistia,

16ngan han pakabati nira nga ginlingo ngan ginpatay ni Simbri an hadi, dida dayon ira iginsangyaw nga hadi han Israel hi Omri, an ira pangulo.

17Binayaan ni Omri ngan han iya kasondalohan an Gebeton ngan ginpalibotan nira an Tersa.

18Han paghikit-i ni Simbri nga nakuha na an syudad, sinmulod hiya ngadto han gisusulori nga kota han palasyo, ginsunog niya an palasyo, ngan nahiupod hiya hin kasunog ngan namatay hiya.

19Nahinabo ini tungod han iya mga sala kontra han Ginoo. Sugad kan Jeroboam nga una ha iya, ginbido niya an Ginoo tungod han iya mga sala ngan tungod han pagtutdoi niya hin pakasala an Israel.

20Nahisurat an ngatanan nga nabuhat ni Simbri, lakip an maraot nga plano han iya paglingo, dida han Kasaysayan han Kahadian han Israel.

Naghadi han Israel hi Omri

21Nabahin an mga tawo han Israel: naruyag han iba ha ira nga himoon nga hadi hi Tibni nga anak ni Ginat, ngan an iba, karuyag hi Omri.

22Ha kataposan, nagdaog adton mga naruyag kan Omri; namatay hi Tibni ngan nahimo nga hadi hi Omri.

23Sanglit dida han ika-31 ka tuig nga pagkahadi han Juda ni Hadi Asa, nahimo hi Omri nga hadi han Israel, ngan naghadi hiya sulod hin 12 ka tuig. Naghadi hiya didto ha Tersa han syahan nga unom ka tuig,

24ngan iya ginpalit kan Semer an pungtod han Samaria hin 6,000 ka bug-os nga salapi. Ginpaderan ni Omri an pungtod, nagtindog hiya hin bungto didto, ngan ginngaranan ini nga Samaria, ha pagpasidungog kan Semer nga una nga tag-iya han pungtod.

25Nakasala han Ginoo hi Omri hin labaw pa kay kan bisan hin-o nga una ha iya.

26Sugad kan Jeroboam nga una ha iya, nasina ha iya an Ginoo nga Dyos han Israel, tungod han iya mga sala, ngan tungod han pagtutdoi niya hin pakasala han mga tawo han Israel ngan pagsingba hin mga diyosdiyos.

27Nahisurat an ngatanan nga nabuhat ni Omri, lakip an iya mga pakig-away dida han Kasaysayan han Kahadian han Israel.

28Namatay hi Omri ngan iginlubong hiya didto ha Samaria, ngan sinmaliwan ha iya hin pagkahadi hi Acab nga iya anak.

Naghadi han Israel hi Acab

29Dida han ika-38 ka tuig han pagkahadi han Juda ni Hadi Asa, nahimo nga hadi han Israel hi Acab nga anak ni Omri, ngan naghadi hiya didto ha Samaria sulod hin 22 ka tuig.

30Nakasala hiya han Ginoo hin labaw pa kay han mga una ha iya.

31Diri pa igo ha iya an pakasala sugad kan Hadi Jeroboam; linmabaw pa gud hiya ngan nangasawa kan Jezebel nga anak ni Hadi Etbaal han Sidon, ngan nagsingba hiya kan Baal.

32Nagtindog hiya hin templo para kan Baal didto ha Samaria, naghimo hin altar para ha iya, ngan iginbutang an altar didto han templo.

33Naghimo liwat hiya hin ladawan ni Asera nga diyosa. Ginbuhat niya in labaw pa kay han ngatanan nga mga hadi han Israel nga una ha iya hin pag-aghat han kasina han Ginoo nga Dyos han Israel.

34Han panahon han iya pagkahadi gin-otro pagtindog ni Hiel nga taga-Betel an Jerico. Sumala han igintagna han Ginoo pinaagi kan Josue nga anak ni Nun, namatay hi Abiram nga suhag nga lalake ni Hiel dida han pagbutang ni Hiel han patukoranan han Jerico, ngan namatay hi Segub nga iya gimamanghori nga anak nga lalake dida han pagtindog niya han mga ganghaan.