1Anak, kon mag-aalagad ka han Ginoo, pag-andam para hin mga panahon nga pagsasarihan ka.
2Kinahanglan nga kinasingkasing ug tinuod an imo pagbuhat. Ayaw kalisang kon umabot an kakurian.
3Pabilin dida han Ginoo; ayaw hiya bayai ngan maghihingaupay ka ha kataposan.
4Karawata an bisan ano nga mahinanabo ha imo. Pagmapailubon bisan kon an imo kinabuhi nagdadara hin damo nga mga pag-antos.
5Ginpupurog han kalayo an bulawan, ngan ginsasarihan an kinaiya han tawo dida han hudno han pag-antos.
6Sarig han Ginoo ngan bubuligan ka niya. Paglakat hin matadong ngan paglaom ha iya.
7Kamo ngatanan nga may pagkahadlok han Ginoo, paghulat kamo nga ipakita niya ha iyo an iya pagkalooy. Ayaw kamo pagbaya ha iya basi diri kamo mapukan.
8Sarig ha iyo kamo ngatanan nga may pagkahadlok han Ginoo, ngan babalosan gud kamo.
9Kamo ngatanan nga may pagkahadlok han Ginoo, laomi niyo an iya mga bendisyon han kalooy ngan dayon nga kalipay.
10Pamalandonga an linmabay nga mga katulinan ngan painoinoha ini: ginpakaalohan na ba han Ginoo an tawo nga nagsarig ha iya? Ginbayaan na ba han Ginoo an tawo nga nagpadayon hin pagtahod ha iya? Ginpasibay-an na ba han Ginoo an tawo nga nag-ampo ha iya?
11Maloloy-on ngan napaid an Ginoo; nagpapasaylo hiya han aton mga sala ngan tinatalwas kita niya ha takna han kakurian.
12Kundi kairo hadton mga magluya an kasingkasing—an mga makasasala nga mga malabyaw ha ira kinabuhi.
13Kairo hadton mga nawad-an han ira kaisog; waray hira pagtoo, sanglit waray mananalipod ha ira.
14Kairo hadton mga nawad-an han ira paglaom. Ano an ira bubuhaton kon kumanhi na an Ginoo hin paghukom ha ira?
15Adton may pagkahadlok han Ginoo diri nasupak han iya mga sugo; adton mga nahigugma ha iya mabubuhi sumala han iya karuyag.
16Adton mga may pagkahadlok ngan paghigugma ha iya magtitinguha hin pagpahalipay ha iya ngan paghalad han ira kinabuhi para han Balaod.
17Dayuday andam hin pag-alagad ha iya adton may pagkahadlok han Ginoo. Nagpapaubos hira ha iya atubangan ngan nasiring,
18“Itinutubyan namon an amon kinabuhi ha mga kamot han Ginoo ngan diri ha mga tawo, kay an iya pagkalooy sugad kadako han iya pagkaharangdon.”
Who We AreWhat We EelieveWhat We Do
2025 by iamachristian.org,Inc All rights reserved.
