1 Hadi 9 - Samarenyo Meaning-Based Bible (1984)（MBBSAM）

Pinmakita na Liwat kan Solomon an Dyos(2 Cron. 7:11-22)

1Han kahuman ni Hadi Solomon magtindog han Templo ngan han palasyo ngan ngatanan nga iba pa nga karuyag niya pagtindogon,

2pinmakita na liwat ha iya an Ginoo, sugad han iya pagpakita didto ha Gabaon.

3Nagsiring ha iya an Ginoo, “Hinbatian ko an imo pag-ampo. Ginhalad ko nga mabaraan ini nga Templo nga imo gintindog nga dapit diin pagsisingbahon ako ha kadayonan. Pagbabantayan ngan pananalipdan ko ini ha ngatanan nga panahon.

4Kon mag-alagad ka ha akon ha katangkod ngan kaligdong sugad han pag-alagad ni David nga imo amay, ngan kon pagtumanon mo an ngatanan nga akon iginsugo ha imo ngan magsugot han akon mga balaod,

5pagtutumanon ko an akon iginsaad kan David nga imo amay han pagsidnga ko ha iya nga dayuday paghahadian ha kadayonan an Israel han iya mga tulin.

6Kundi kon umundang hin pagsunod ha akon ikaw o an imo mga tulin, ngan sumupak han mga balaod ngan mga sugo nga akon iginhatag ha imo, ngan mag-alagad ngan magsingba hin iba nga kadiyosan,

7tungod hini kukuhaon ko an akon mga tawo nga Israel tikang han tuna nga akon iginhatag ha ira. Akon liwat pababay-an ini nga Templo nga akon ginhalad nga pagsisingbahan ha akon ngan pag-iintrimisan ngan pagtatamayon an Israel han mga tawo ha ngatanan nga dapit.

8Mahihimo ini nga Templo nga tambak hin mga binungkag, ngan mahipapaudong ngan mahipapausa an ngatanan nga malabay. Mapakiana hira, ‘Kay ano nga ginbuhat ini han Ginoo ngada hini nga tuna ngan hini nga Templo?’

9Ngan mabaton an mga tawo, ‘Tungod ini nga ginsikway han mga tawo an Ginoo nga ira Dyos nga nagpagawas han ira kaapoy-apoyan tikang ha Ehipto. Nag-alagad ngan nagsingba hira hin iba nga kadiyosan. Sanglit gindad-an hira han Ginoo hini nga mga karat-an.’”

Nakigsabot hi Solomon kan Hiram(2 Cron. 8:1-2)

10Inmabot hin 20 ka tuig an pagtindog ni Solomon han Templo ngan han iya palasyo.

11Tinagan hiya ni Hadi Hiram han Tiro han ngatanan nga sidro ngan palotsina, ngan han ngatanan nga bulawan nga iya ginkinahanglan para hini nga trabaho. Han kahuman na han pagtindog hini, tinagan ni Hadi Solomon hi Hiram hin 20 nga mga bungto ha katunaan han Galilea.

12Kinmadto hi Hiram hin pag-osisa hini nga mga bungto, ngan waray hiya maruyag hini.

13Sanglit nagsiring hiya kan Solomon, “Bugto ko, amo ba ini an mga bungto nga iginhatag mo ha akon?” Tungod hini, gintatawag la gihapon nga Cabul ini nga dapit.

14Ginpadad-an ni Hiram hi Solomon hin hirani 5,000 ka kilo nga bulawan.

Iba pa nga mga Ginbuhat ni Solomon(2 Cron. 8:3-18)

15Ginamit ni Solomon in pinirit nga pagtrabaho hin pagtindog han Templo ngan han palasyo, ngan han pader han syudad, ngan pagtak-op han tuna didto han sinirangan nga dapit han syudad. Gipirit liwat niya an mga tawo hin pag-ayad han mga syudad han Hasor, Megido, ug Gaser. (

16Ginsulong an Gaser han hadi han Ehipto ngan ginbihag niya ini. Pinamatay niya an mga umurokoy hini ngan ginsunog an syudad. Ngan iya iginhatag ini nga syudad ha iya anak nga babaye sugad nga bugay, han pakaasawa niya kan Solomon,

17ngan gin-ayad ini ni Solomon.) Pinaagi han iya pinirit nga pagpatrabaho, gintindog liwat ni Solomon an ilawod nga Betoron,

18an Baalat, an Tamar ha kamingawan han Juda,

19an mga syudad nga hinihimosan han iya mga pagkaon, an mga syudad para han iya mga kabayo ngan mga karuwahe, ngan an ngatanan pa nga iba nga karuyag niya pagtindogon ha Jerusalem, ha Libano, ngan bisan diin han iya ginhadian.

20-21Ginpirit hin papagtrabaho ni Solomon an mga tulin han mga tawo han Canaan nga waray pamataya han mga Israelita han kaagaw nira han tuna. Lakip hini an mga Amoreohanon, mga Hiteohanon, mga Perizeohanon, mga Hibeohanon, ngan mga Jebuseohanon, kanay mga tulin nagpapadayon nga mga oripon ngada yana nga panahon.

22Waray ikadto ni Solomon han pinugos nga pagtrabaho an mga Israelita; nag-alagad hira sugad nga iya mga sondalo, mga opisyal, mga pangulo hin kasondalohan, mga kapitan hin mga karuwahe, ngan mga dikabayo nga sondalo.

23May-ada 550 nga mga opisyal nga tinaporan han pinugos nga mga tawo nga nagtrabaho han kan Solomon magkalainlain nga mga buruhaton.

24Gintak-opan ni Solomon an tuna ha sinirangan han syudad katapos an iya asawa nga anak han hadi han Ehipto bumalhin tikang han syudad ni David ngadto han palasyo nga gintindog ni Solomon para ha iya.

25Makatulo ha kada tuig naghalad hi Solomon hin mga hayop nga tutuboron ngan mga halad hin pagkaurosa didto han altar nga iya gintindog ngadto han Ginoo. Nagtubod liwat hiya hin insyenso ngadto han Ginoo. Sanglit nahuman niya an pagtindog han Templo.

26Nagtukod liwat hi Hadi Solomon hin damo nga mga barko didto ha Asiongaber nga hirani han Elat, ha baybayon han Dagat Acaba, ha tuna han Edumea.

27Nagpadara hi Hadi Hiram hin batid nga mga tripulante nga tikang han iya mga barko hin pagbulig han mga tawo ni Solomon.

28Nagsakay hira ngadto ha tuna han Ofir, ngan nagdara pagbalik ngadto kan Solomon hin hirani 16,000 ka kilo nga bulawan.