Numero 29 - Samarenyo Meaning-Based Bible (1984)（MBBSAM）

May mga Halad dida han Pyesta han Bag-o nga Tuig(Lev. 23:23-25)

1Dida han syahan nga adlaw han ikapito nga bulan pagtirok kamo hin pagsingba, ngan maundang kamo hin pagbuhat. Dida hito nga adlaw patutunggon an mga trompeta.

2Pagdara hin usa nga halad nga susunogon ngadto han Ginoo, kanay alimyon nakakalipay ha iya: usa nga baka nga todo, usa nga karnero nga lalaki, ngan pito nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

3Ighalad niyo an angay nga halad nga pagkaon nga harina nga sinaktan hin lana hin olibo: mga 3 ka kilo upod han baka nga todo, mga duha ka kilo upod han karnero nga lalaki,

4ngan ma usa ka kilo upod han kada nati nga karnero.

5Ighalad liwat niyo in usa nga kanding nga lalaki nga usa nga halad tungod hin sala, ngan pinaagi hini pagbubuhaton niyo an seremonyas hin paglinis para han mga tawo.

6Ighalad ini labot han nababatasan nga halad nga susunogon para han syahan nga adlaw han bulan upod an halad nga pagkaon, ngan han kada adlaw nga halad nga susunogon upod an halad nga pagkaon ngan halad nga bino. An alimyon hini nga mga halad nga pagkaon amo an nakakalipay han Ginoo.

May mga Halad ha Adlaw han Pagtubos(Lev. 23:26-32)

7Pagtirok kamo hin pagsingba dida han ikanapulo nga adlaw han ikapito nga bulan; pagpuasa kamo ngan ayaw pagbuhat.

8Paghalad kamo hin usa nga halad nga susunogon ngadto han Ginoo, kanay alimyon nakakalipay ha iya: usa nga baka nga todo, usa nga karnero nga lalaki, ngan pito nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

9Ighalad niyo an angay nga halad nga pagkaon nga harina nga sinaktan hin lana hin olibo: mga 3 ka kilo nga harina upod han baka nga todo, mga duha ka kilo upod han karnero nga lalaki,

10ngan ma usa ka kilo upod han kada nati nga karnero.

11Ighalad liwat in usa nga kanding nga lalaki nga usa nga halad tungod hin sala, labot han kanding nga iginhahalad dida han seremonyas hin paglinis para han mga tawo, ngan han kada adlaw nga halad nga susunogon upod an halad nga pagkaon, ngan halad nga bino.

May mga Halad dida han Pyesta han mga Payagpayag(Lev. 23:33-44)

12Pagtirok kamo hin pagsingba dida han ika-15 nga adlaw han ikapito nga bulan. Pagsauroga niyo ini nga pyesta ha pagpasidungog han Ginoo sulod hin pito ka adlaw ngan ayaw kamo pagbuhat.

13Dida hini nga syahan nga adlaw paghalad kamo hin usa nga halad nga pagkaon ngadto han Ginoo, kanay alimyon nakakalipay ha iya: 13 nga mga baka nga todo, duha nga karnero nga lalaki, ngan 14 nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

14Ighalad an angay nga halad nga pagkaon nga harina nga sinaktan hin lana hin olibo: mga 3 ka kilo nga harina upod han kada baka nga todo, mga duha ka kilo upod han kada karnero nga lalaki,

15ngan ma usa ka kilo upod han kada nati nga karnero, upod an ginkikinahanglan nga mga halad nga bino.

16Ighalad liwat in usa nga kanding nga lalaki nga usa nga halad tungod hin sala. Ighalad ini labot han kada adlaw nga halad nga susunogon upod an halad nga pagkaon ngan halad nga bino.

17Dida han ikaduha ka adlaw paghalad kamo hin 12 nga mga baka nga todo, duha nga karnero nga lalaki, ngan 14 nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

18-19Ighalad upod hini an ngatanan nga iba nga mga halad nga ginkikinahanglan para han syahan nga adlaw.

20Dida han ikatulo ka adlaw paghalad kamo hin 11 nga mga baka nga todo, duha nga karnero nga lalaki, ngan 14 nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

21-22Ighalad upod hini an ngatanan nga iba nga mga halad nga ginkikinahanglan para han syahan nga adlaw.

23Dida han ikaupat ka adlaw paghalad kamo hin 10 nga mga baka nga todo, duha nga karnero nga lalaki, ngan 14 nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

24-25Ighalad upod hini an ngatanan nga iba nga mga halad nga ginkikinahanglan para han syahan nga adlaw.

26Dida han ikalima ka adlaw paghalad kamo hin siyam nga mga baka nga todo, duha nga karnero nga lalaki, ngan 14 nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

27-28Ighalad upod hini an ngatanan nga iba nga mga halad nga ginkikinahanglan para han syahan nga adlaw.

29Dida han ikaunom ka adlaw paghalad kamo hin walo nga mga baka nga todo, duha nga karnero nga lalaki, ngan 14 nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

30-31Ighalad upod hini an ngatanan nga iba nga mga halad nga ginkikinahanglan para han syahan nga adlaw.

32Dida han ikapito ka adlaw paghalad kamo hin pito nga nati nga mga baka nga todo, duha nga karnero nga lalaki, ngan 14 nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

33-34Ighalad upod hini an ngatanan nga iba nga mga halad nga ginkikinahanglan para han syahan nga adlaw.

35Dida han ikawalo ka adlaw pagtirok kamo hin pagsingba ngan ayaw kamo pagbuhat.

36Paghalad kamo hin usa nga halad nga susunogon nga usa nga halad nga pagkaon ngadto han Ginoo, kanay alimyon nakakalipay ha iya: usa nga baka nga todo, usa nga karnero nga lalaki, ngan pito nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

37-38Ighalad upod hini an ngatanan nga iba nga mga halad nga ginkikinahanglan para han syahan nga adlaw.

39Amo ini an mga turumanon mahitungod han mga halad nga susunogon, mga halad nga pagkaon, mga halad nga bino, ngan mga halad hin pagkaurosa nga iyo ighahalad ngadto han Ginoo dida han iyo gintalaan nga mga pyesta. Labot ini han mga halad nga ihinahatag niyo hin pagtuman hin saad o nga mga halad ha iyo kaburot-on.

40Sanglit ginsumatan ni Moises an mga tawo han Israel han ngatanan nga iginsugo ha iya han Ginoo.