2 Cronicas 22 - Samarenyo Meaning-Based Bible (1984)（MBBSAM）

Naghadi han Juda hi Hadi Ahasias(2 Hadi 8:25-29; 9:21-28)

1Sinmulong in pira nga mga Arabeanhon ngan ginpatay nira an ngatanan nga mga anak nga kalalaken-an ni Hadi Joram labot kan Ahasias, an gimamanghori nga anak. Sanglit ginhimo han mga tawo han Jerusalem hi Ahasias nga hadi nga sumurunod han iya amay.

2-3An panuigon ni Ahasias 22 han kahimo niya nga hadi ngan naghadi hiya hin usa ka tuig ha Jerusalem. Ginsunod liwat ni Ahasias an susbaranan han panimalay ni Hadi Acab, tungod nga ginsagdonan hiya hin maraot ni Atalia nga iroy niya, nga anak ni Hadi Acab ngan apo ni Hadi Omri han Israel.

4Nakasala hiya han Ginoo, kay han kamatay han iya amay nahimo nga iya mga magsaragdon in iba nga mga sakop han panimalay ni Hadi Acab ngan amo ini hira an makapukan ha iya.

5Ha pagsunod han ira sagdon, tinmampo hiya kan Hadi Joram han Israel hin pakiaway kontra kan Hadi Hasael han Siria. Nag-araway an mga kasondalohan didto ha Ramot ha Galaad, ngan nasamad ha pag-awayan hi Joram.

6Binmalik hi Joram ha syudad han Jezrael hin pagpatambal han iya mga kasamdan, ngan kinmadto hi Ahasias hin pagduaw ha iya.

7Ginamit han Dyos ini nga pagduaw kan Joram hin pagpukan kan Ahasias. Han nakadto hi Ahasias, iginkita niya ug ni Joram in tawo nga ginngaranan kan Jehu nga anak ni Nimsi, nga ginpili han Ginoo hin pagbungkag han hadianon nga panimalay ni Acab.

8Dida nga ginpapahimutang ni Jehu an sirot han Dyos ngada han hadianon nga panimalay ni Acab, iginhitapo niya in hugpo hin mga pangulo nga taga-Juda ngan mga umangkon nga kalalaken-an ni Ahasias, nga inmupod kan Ahasias ha iya pagduaw kan Hadi Joram. Pinamatay ni Jehu hira ngatanan.

9Iginpabiling niya hi Ahasias ngan hin-agian hiya nga natago didto ha Samaria. Gindara nira hi Ahasias ngadto kan Jehu ngan ginpatay hiya. Kundi iginlubong nira an iya lawas ha pagtahod nira kan Hadi Josafat nga iya apoy, nga nagbuhat han ngatanan nga iya mahimo hin pag-alagad han Ginoo.

Waray gud nahisalin nga sakop han panimalay ni Ahasias nga masunod ha iya hin pagkahadi.

Nagrayna han Juda hi Rayna Atalia(2 Hadi 11:1-3)

10Han paghibaro la ni Atalia nga iroy ni Hadi Ahasias nga patay na an iya anak, nagsugo hiya nga pamatayon an ngatanan nga mga sakop han hadianon nga panimalay han Juda.

11May-ada hi Ahasias bugto nga babaye ha amay la, hi Joseba nga asawa hin padi nga ginngaranan kan Joyada. Gintalwas niya hin sekreto hi Joas nga usa han mga anak nga kalalaken-an ni Ahasias. Ginkuha niya ini hiya tikang han iba nga mga prinsipe nga gin-iiparatay ngan gintago hiya ug in usa nga nagtimangno ha iya didto ha usa nga higdaan nga kwarto han Templo. Pinaagi han pagtagoa ha iya gintalwas niya hi Joas tikang han kamatayon ha mga kamot ni Atalia.

12Nagpabilin hiya didto hin pagtago hin unom ka tuig samtang rayna hi Atalia.