1Ayaw pangabugho han imo asawa nga imo hinigugma. Pagtututdoan mo la hiya hin pagpakaraot ha imo.
2Ayaw igtubyan an imo kadungganan ngadto hin bisan hin-o nga babaye.
3Pahirayo han mga asawa han iba nga kalalaken-an; bangin ka mabitik nira.
4Ayaw pakig-upod-upod hin kababayen-an nga mga parakanta; bangin ka nira paglimbongan.
5Ayaw pagtinutok hin usa nga uray nga daraga kay bangin ka mapirit hin pagbayad han balor hin usa nga asawa.
6Ayaw gud igtubyan an imo kalugaringon ngadto han kababayen-an nga magraot an bantog kay bangin mawad-an ka han ngatanan nga imo hiagi.
7Sanglit ayaw pagliningilingi ha mga kakalsadahan o pagsinudoysudoy ha mga dapit nga waray mga tawo.
8Ilingiw an imo mga mata kon hikit-an mo in matahum nga babaye. Ayaw pagpinanhunahuna han kamahusay hin babaye nga diri mo asawa. Damo nga kalalaken-an an naghikaraot tungod han katahom hin usa nga babaye.
9Ayaw pakigsaro hin babaye nga kanan iba asawa, o pakig-inom ha iya. Bangin ka masulay han iya kamahusay ngan mahulog ka ngadto hin karat-an tungod han imo mapaso nga pagbati.
An Maupay nga Pakigsangkay10Ayaw bayai in usa nga daan nga sangkay; diri ka gud makakaagi hin bag-o nga makakaliwan ha iya. Sugad hin bino an pagkasangkay; nagtitikarasa la ini samtang nag-iiha.
11Ayaw kaawa han pag-uswag hin usa nga makasasala, kay diri ka maaram kon ano an iya kabubwason.
12Ayaw pagkalipay han nalilipayan han mga tawo nga diri natoo han Dyos; hinumdomi nga diri hira makakalikay han sirot samtang mga buhi pa hira.
13Kon pumahirayo ka han tawo nga may gahom hin pagpatay ha imo, diri ka magkikinahadlok tungod han imo kinabuhi. Kundi kon kinahanglan humirani ka man ha iya, pag-ikmat kay bangin ka niya pagpatayon. Isipa nga naglalakat ka dida hin tinago nga mga bitik, nga usa ka nga masayonay mabitik.
14Sugad han imo mahihimo, tinguhaa nga makilala mo an imo mga kahigrani, ngan pamatii an sagdon tikang la ha ira nga may-ada hiyas hin paghatag hin sagdon.
15Asay pakighimangrawi an mag-aram nga mga tawo, ngan an Balaod han Gihihitaasi amo an iyo paghinabihi.
16Pilia an magtadong nga mga tawo nga imo mga kasaro hin pagkaon. An imo pagkahadlok han Ginoo amo an imo sadang iparayaw.
An mga Punoan17Gindadayaw in usa nga batid nga panday tungod han iya mga hinimo, ngan an kaaram hin usa nga pangulo ginpapamatud-an pinaagi han iya mga pulong.
18An paralibak ngan mayakan nga tawo nahahadlokan ngan gindudumtan han bungto.
Who We AreWhat We EelieveWhat We Do
2025 by iamachristian.org,Inc All rights reserved.
