2 Macabeo 9 - Samarenyo Meaning-Based Bible (1984)（MBBSAM）

Ginkastigo han Ginoo hi Antioco(1 Mac. 6:1-7; 2 Mac. 1:11-17)

1Hini ngahaw nga panahon inmisol hi Antioco nga nagkakasamok an iya kasondalohan tikang ha Persia,

2diin sinmulod hiya han syudad han Persipolis ngan nagtinguha hiya hin pagtikas hin usa nga templo ngan pagdumara han syudad. Kinmuha an mga tawo han ira mga hinganiban ngan ginsulong nira hi Antioco, nga napirit an iya kasondalohan hin pag-isol nga puno hin kaalo.

3Han pag-abot niya ha Ecbatana, ginsumatan hiya han nahinabo han kasondalohan nira Nicanor ug Timoteo.

4Napungot hiya hin duro ngan naglarang hiya nga kinahanglan pagbaydan han mga Judiyo an pagkapirde nga iya gin-antos. Sanglit iya ginsugo an nakapot han iya karuwahe hin diri pag-ukoy tubtob han pag-abot nira ha Jerusalem. Ha dako nga paghinambog nagsiring hiya, “Hihimoon ko an Jerusalem nga usa nga lubnganan nga puno hin mga Judiyo.”

Kundi waray hiya mahibaro nga nagdadalan gud hiya ngadto han kastigo han Dyos.

5Ngani han pagsiring la niya hini nga mga pulong, ginhampak hiya han Ginoo nga nakita han ngatanan, an Dyos han Israel, hin usa nga diri hinkikit-an kundi grabe nga paghampak. Nagmaul-ol hin duro an iya tiyan nga waray gud nakakatambal—

6usa nga angay nga kastigo para han tawo nga nagsakit hin damo nga mga tawo ha damo hin duro nga makalilisang nga mga paagi!

7Kundi waray gud ini makapakuha han iya kamapinahitas-on. Nahimo hiya nga larolabaw pa hin kamapinahitas-on kay han una, ngan samtang naghahangos hiya hin kapungot ha pagtarhog han mga Judiyo, nagsugo hiya nga palarolaksihon an pagpadalagan han karuwahe. Tungod hini nahilabog hiya tikang han karuwahe ngan duro gud an iya paghibuntad nga nakapaul-ol ini han ngatanan niya nga kaluluthan.

8An iya parayawnon nga paghinambog amo an nakapahunahuna ha iya nga may-ada hiya kusog nga labaw hin kanan tawo nga makakapasugot ha iya bisan han mga balod han kalalawdan ngan makakatimbang hiya han higtaas nga kabukiran dida hin usa nga timbangan. Kundi ha tigda la nahilaprak hiya ha tuna ngan ginpas-an na la hiya, usa nga dayag nga tigaman para han ngatanan nga an Dyos makagarahum.

9Bisan an mga mata hini nga diri natoo hin Dyos, ngan ginpoltikan hiya hin mga ulod ha makalilisang nga kamag-ul-ol ngan pag-antos. Nagmabaho hiya hin duro nga nagkasasakit an bug-os niya nga kasondalohan,

10ngan waray tawo nga nailob hin paghirani hin pagpasag ha iya. Kundi ha diri pa la maiha, naghunahuna hiya nga maaabot niya an kabiton-an.

Nagsaad han Dyos hi Antioco(1 Mac. 6:8-17)

11Tugob hin kabidoan hi Antioco ngan nag-antos hiya hin dayuday nga kamaul-ol tungod han kastigo nga ihinatag ha iya han Dyos, sanglit ha kataposan nakapamurubuot hiya ngan iya iginsalikway an iya hinambog nga kamapinahitas-on.

12Niyan, han diri na hiya nailob han kalugaringon niya nga baho, nagsiring hiya, “Matadong gud nga kinahanglan magpasakop han Dyos an ngatanan nga may-ada kamatayon nga mga tawo ngan diri gud maghunahuna nga tupong hira han Dyos.”

13Natapos na an panahon han pagkalooy han Ginoo kan Antioco, kundi nagsaad han Ginoo ini nga waray pulos nga tawo:

14“Gintalinguha ko hadto hin pagpanas han tuna han Jerusalem ngan paghimo hito nga baraan nga syudad nga usa nga lubnganan nga puno hin mga Judiyo,” nagsiring hiya, “kundi yana iginpapahayag ko nga usa ini nga bukas nga syudad para han ngatanan.

15Naglarang ako hin paglabog ha gawas han patay nga mga lawas han mga Judiyo ngan han ira mga anak basi kaonon han mga ihalas nga kamanampan ngan han katamsihan, kay waray ako paghunahunaa nga takos hira iglubong. Kundi yana naglalarang na ako hin paghatag ha ira han amo ngahaw nga mga katungod nga ginpahimolosan han mga tuminungnong han Atenas.

16Gintikasan ko hadto an Templo ngan ginpanguha ko an baraan nga mga kasangkapan han Templo, kundi yana pagpupun-on ko ini hin mag-anyag nga mga regalo ngan hin mag-uruupay nga mga kasangkapan kay han una, ngan babaydan ko tikang han kalugaringon ko nga manggad an gasto han mga halad nga tinubod.

17Labot hini ngatanan, ako ngahaw mahihimo nga Judiyo ngan makadto ako ha bisan diin pag-uokoy an mga tawo, hin pagsumat ha ira mahitungod han gahom han Dyos.”

Ginsuratan ni Antioco an mga Judiyo

18Nahulop na hi Antioco ngan waray hiya makaagi hin tambal nga makakapoypoy han iya mga mag-ul-ol, kay ginkastigo hiya han Dyos sugad han angay ha iya, sanglit nagpadara hiya han nasunod nga surat ngadto han mga Judiyo:

19“Tikang kan Antioco, ngadto han mga Judiyo nga akon labi nga mga pinili nga mga sakop. Mapaso nga mga pangumosta ngan mga ungara para han mag-upay niyo nga mga panlawas ngan kauswagan.

20“Naglalaom ako nga aada kamo ngan an iyo mga panimalay ha mag-upay nga mga panlawas ngan maupay an ako kamutangan ha kinabuhi. Aada han Dyos an akon paglaom,

21ngan nahinunumdom ako upod in kinasingkasing nga kalipay han pagtahod ngan pagkalooy nga iyo iginpakita ha akon.

“Dida han akon pagtipauli tikang ha Persia, nasakit ako hin grabe, sanglit nakahunahuna ako nga maupay tikangan ko na an pagplano para han kaupayan han mga tawo.

22Waray ako kawad-i hin paglaom nga mag-uupay ako; ngani dako an akon pagtapod nga hiuulian pa ako.

23Kundi nahinunumdom ako han ginbuhat han akon amay kon nagawas hiya hin pagmando hin kasondalohan ha sinirangan han Eufrates; daan hiya nagtudlok hin saliwan ha iya.

24Ginbuhat niya ini basi kon may-ada mahinabo nga waray pagpaabota, o kon umabot in maraot nga sumat, diri mahahadlok an iya mga sakop, kay maaram hira kon hin-o an iginbilin nga magmamando.

25Maaram liwat ako kon inuunan-o han mga punoan ha pag-ultan han akon ginhadian hin dayuday nga pag-ikmat para hin bisan ano nga higayon nga maabot. Amo ito nga gintudlok ko hi Antioco nga akon anak hin pagsaliwan ha akon nga hadi. Agsob nga igintubyan ko hiya ngada ha iyo pagmangno ngan iginpakilala ko hiya ha iyo dida han akon nababatasan nga pagduaw han mga lalawigan ha sinirangan han Eufrates. (Makarawat hiya hin usa nga kopya hini nga surat.)

26Yana gin-aaghat gud nakon an kada usa ha iyo nga diri niyo hingalimtan an mag-upay nga mga butang nga akon ginbuhat para ha iyo, ha tinag-usa ngan ha bug-os nga nasod, ngan magpadayon unta an iyo mag-upay nga kaburot-on ha akon ngan ha akon anak.

27Natapod ako nga pagdudumaraon kamo niya hin waray pinalabi ngan puno hin kalooy, sugad han akon dayuday ginbuhat ha iyo.”

28Sanglit ini nga parapamatay, nga nagtunglo han Dyos, nag-antos han amo ngahaw nga makalilisang nga mga kasakitan nga iya ginbuhat ha iba, ngan katapos namatay hiya nga makalolooy didto han kabukiran hin usa nga langyaw nga tuna.

29Igin-uli an iya lawas ni Felipe nga usa han suok niya nga kasangkayan; kundi, tungod kay nahadlok hiya han anak ni Antioco, nagpadayon hiya ngadto kan Hadi Tolomeo Filometor han Ehipto.