Sirac 7 - Samarenyo Meaning-Based Bible (1984)（MBBSAM）

May Iba pa nga mga Sagdon

1-2Ayaw pagbuhat hin maraot ngan waray maraot nga mahinanabo ha imo.

3Ayaw pag-aradoha an tuna hin pagtanom hin mga binhe han kamalupog; bangin mag-ani ka hin darudako pa kay han imo ginpapaabot.

4Ayaw pangaro han Ginoo hin kadungganan o han hadi hin importante nga katungdanan.

5Ayaw pagparayaw han Ginoo nga ikaw matadong o ha atubangan han hadi nga ikaw maaram.

6Ayaw paghingyap nga ikaw magin maghurukom, gawas kon may-ada mo makusog nga buot nga magagamit mo hin pagpoypoy han kamalupog. Mawawara an imo pagkamatadong kon mapadara ka la hin tawo nga may dako nga katungdanan.

7Ayaw pagbuhat hin maraot kontra han kadam-an nga mga tawo ngan ayaw pagpakaalohi an imo kalugaringon ha atubangan han imo igkasi taghimungto.

8Ayaw balika hin makaduha an amo gihapon nga sala. Igo na an sirot han syahan mo nga pakasala.

9Ayaw pakahunahuna nga iisipon han Gihihitaasi nga Dyos an imo kamahinatagon sanglit makarawat hiya han bisan ano nga halad nga imo ighatag.

10Ayaw kaguol hin pag-inampo ngan ayaw palabya in higayon hin paglimos han mga kablas.

11Ayaw pagtawai in usa ka tawo nga ginpahiubos. An Ginoo amo an nagpapahiubos hin tawo ngan amo man liwat an nagpapahitaas ha iya.

12Ayaw paghunahuna hin mga buwa hiunong han imo kasangkayan.

13Ayaw pagbuwa kay waray gud ini kaupayan nga mahihimo.

14Ayaw tukdaw ngan ayaw pagyinakan hin waray la hangkag ha katig-oban han katigurangan. Ngan ayaw pagbinalikbalika an imo mga pulong kon mag-aampo ka.

15Ayaw paglikay han trabaho ha uma o hin iba nga mabug-at nga trabaho; iginhatag ini ha aton han Gihihitaasi.

16Ayaw pagtampo hin hugpo hin mga makasasala; hinumdomi nga maabot gud an sirot han Ginoo.

17Pagmapinaubsanon kay an kadunot nga kanan kamatayon naghuhulat ha aton ngatanan.

An Pakigkausa han Iba

18Ayaw paglingoa in usa nga sangkay tungod la hin kwarta. Tungod la hin ngatanan nga bulawan ha kalibutan ayaw paglingoa in matuod nga sangkay.

19Ayaw pagkaragi an higayon hin pangasawa hin maaram ngan buotan nga babaye, labaw pa hin bulawan in usa nga buotan nga asawa.

20Ayaw pagraogdaoga in usa nga surugoon nga nagtratrabaho hin maupay, o in usa nga nagpapasuhol nga nagbubuhat sugad han iya mahimo para ha imo.

21Higugmaa hin tinuod in usa nga maupay nga surugoon sugad han paghigugma mo han imo kalugaringon. Ihatag ha iya han iya kagawasan.

22Pagmangnoi hin maupay an iyo mga hayop. Bantayi ini hira kon nakakabulig han imo pakabuhi.

23Kon may-ada mo mga anak, pagpaadma hira. Tutdoi hira hin pagdisiplina han ira kalugaringon samtang mga bata pa hira.

24Kon may-ada mo mga anak nga kababayen-an, bantayi nga magin uray hira ngan ayaw hira tugoti nga magpatakas la hira han ira mga karuyag.

25Kon imo na ipapangasawa an imo anak nga babaye, natuman mo na in dako nga baratonon kundi ipaasawa hiya hin buotan nga lalake.

26Kon may-ada ka maupay nga asawa, ayaw hiya pagbulagi, kundi ayaw pagtapod hin babaye nga diri mo hinihigugma.

27Pasidunggi an imo amay ha bug-os mo nga kasingkasing ngan ayaw hingalimti an gin-antos han imo nanay dida han imo katawo.

28Hinumdomi nga imo inutang ha ira an imo kinabuhi. Uunanhon nimo hin pakabalos ha ira tungod han ngatanan nga ira nabuhat para ha imo?

29Kahadloki an Ginoo ha bug-os mo nga kasingkasing ngan tahora an iya kapadian.

30Higugmaa an imo Magburuhat ha bug-os mo nga kusog ngan buligi an iya mga ministro ug tinaporan.

31Pasidunggi an Ginoo ngan tahora an kapadian. Ihatag ha ira an iginsugo ha imo hin paghatag: an syahan nga mga abot, an halad para han sala, an sugbong han mananap nga iginhahalad—an ngatanan nga mga halad nga tinubod ngan mga halad nga may niyo katungdanan hin paghalad.

32Buligi an mga kablas ngan bebendisyonan ka hin hingpit han Ginoo.

33Magmahinatagon ka ha mga buhi ngan magmaloloy-on ka han mga minatay.

34Pakitaa han imo pagpaid adton mga nawad-an han iya hinigugma ngan duyog ha ira hin pagkamasulob-on.

35Ayaw pag-alang hin pagbisita han mga magsakit. Pinaagi hin sugad nga mga butang hihigugmaon ka nira.

36Bisan ano an imo pagbuhaton, hinumdomi nga san-o nga adlaw mapatay ka. Kon imo ini pagtipigan ha imo hunahuna, diri ka gud makakasala.