Numero 27 - Samarenyo Meaning-Based Bible (1984)（MBBSAM）

Gintagan hin Malon an mga Anak nga Kababayen-an ni Salfaad

1Hira Maala, Noa, Hogla, Milca, ug Tirsa amo an mga anak nga kababayen-an ni Salfaad nga anak ni Hefer nga anak ni Galaad nga anak ni Maquir nga anak ni Manases nga anak ni Jose.

2Kinmadto ngan tinmindog hira ha atubangan nira Moises, Eleazar nga padi, mga pangulo, ngan bug-os nga bungto dida han agian han Tulda han Ginoo, ngan nagsiring,

3“Namatay an amon amay didto ha kamingawan, nga waray makagbilin hin mga anak nga kalalaken-an. Diri hiya usa han mga kaupod ni Core nga sinmupil han Ginoo; namatay hiya tungod han iya kalugaringon nga sala.

4Tungod la nga waray niya mga anak nga kalalaken-an, kay ano nga mapapara an ngaran han amon amay tikang han mga tulin han Israel? Bahini man kami han iginhatag nga malon ha mga kauropdan han amon amay.”

5Gindara ni Moises an ira sumbong ngadto han Ginoo,

6ngan nagsiring ha iya an Ginoo,

7“Matadong an pinangangaro han mga anak nga kababayen-an ni Salfaad; tagi hira hin bahin han malon nga iginhatag ha mga kauropdan han ira amay. Ighatag ha ira an iya malon.

8Sumati an mga tawo han Israel nga kon mamatay in usa ka tawo nga waray anak nga lalake, ighahatag an iya malon ngadto han iya anak nga babaye.

9Kon waray niya anak nga babaye, ighahatag ini ngadto han iya kabugtoan nga kalalaken-an.

10Kon waray niya kabugtoan nga kalalaken-an, ighahatag ini ngadto han kabugtoan nga kalalaken-an han iya amay.

11Kon waray niya kabugtoan nga kalalaken-an o mga bata, niyan an tatagan hini amo an iya labi ka suok nga urupod, ngan pag-aangkonon ini nga iya kalugaringon nga malon. Pagtutumanon ini han mga tawo han Israel nga kinahanglanon nga balaod. Ako nga Ginoo amo an nagsugo ha imo.”

Ginpili hi Josue nga Masaliwan kan Moises(Deut. 31:1-8)

12Nagsiring kan Moises an Ginoo, “Sagka han Bukid Abarim ngan lantawa an tuna nga akon ighahatag ha mga Israelita.

13Katapos mo paglantawa hini, mapatay ka sugad han imo bugto nga hi Aaron,

14kay sinmupil kamo nga duha han akon sugo didto han kamingawan han Zin. Han pagngurutob han bug-os nga bungto kontra ha akon didto ha Meriba, waray kamo magtug-an han akon baraan nga gahom ha ira atubangan.” (An Meriba amo an burabod didto ha Cades ha kamingawan han Zin.)

15Nag-ampo hi Moises,

16“O Ginoo nga Dyos, burabod han ngatanan nga kinabuhi, nag-aampo ako nga magtudlok ka hin usa ka tawo nga makakagpangulo han mga tawo,

17ngan makakagmando ha ira didto ha pag-awayan, basi an imo bungto diri masugad hin mga karnero nga waray magmarangno.”

18Nagsiring kan Moises an Ginoo, “Kuhaa hi Josue nga anak ni Nun, nga usa ka tawo nga takos, ngan ipandong an imo kamot dida han iya ulo.

19Patindoga hiya ha atubangan ni Eleazar nga padi ngan han bug-os nga bungto, ngan didto ha atubangan nira ngatanan, isangyaw hiya nga amo an masaliwan ha imo.

20Ihatag ha iya in bahin han imo pamunoan, basi pagsugton hiya han bug-os nga bungto han Israel.

21Aada an iya pagtapod kan Eleazar nga padi nga mahibabaro han akon kaburot-on pinaagi hin paggamit han Urim ug Tumim. Dida hini tututdoan ni Eleazar nga padi hi Josue ngan an bug-os nga bungto han Israel han ngatanan nira nga mga buruhaton.”

22Ginbuhat ni Moises sumala han iginsugo ha iya han Ginoo. Ginpatindog niya hi Josue ha atubangan ni Eleazar nga padi ngan han bug-os nga bungto.

23Sumala han iginsugo han Ginoo iginpandong ni Moises an iya mga kamot dida han ulo ni Josue, ngan iginsangyaw niya nga hi Josue amo an masaliwan ha iya.