2 Macabeo 5 - Samarenyo Meaning-Based Bible (1984)（MBBSAM）

Hinkit-an an mga Panan-awon hin Pag-awayan

1Hito ngahaw nga panahon ginsulong ni Antioco Kwatro hin ikaduha an Ehipto.

2Sulod hin kapin hin 40 ka adlaw hinkit-an han mga tawo ha bug-os nga Jerusalem in mga panan-awon hin dikabayo nga mga kasondalohan nga nakakasul-ot hin bulawan nga mga hinganiban nga nasulong ha panganuron. Sangkap an mga dikabayo hin mga bangkaw ngan daan hinulbot an ira mga espada.

3Narumbay hira ha pag-awayan nga andam an usa hin pag-asdang han iba. Nasulong an usa ngan binubulos hin pagsulong han iba liwat. Naghinarag-ing an mga taming, nag-uran hin mga bangkaw, ngan nanlatos ha kahanginan an mga pana. Nag-idlap tungod han kapawa han adlaw an ngatanan nga magkalainlain nga mga hinganiban ngan an bulawan nga mga bukado han kakabayohan.

4Nag-ampo an tagsatagsa didto han syudad nga magin usa unta nga maupay nga tigaman ini nga mga panan-awon.

Ginsulong ni Jason an Jerusalem

5Han pagkarawat nira hin usa nga buwa nga sumat nga patay na hi Antioco, nagdara hi Jason hin kapin 1,000 ka tawo ngan iya ginsulong hin tigda an Jerusalem. Gintabog nira an mga tawo nga nagbabantay ha bawbaw han mga pader han syudad ngan ha kataposan iya nakuha an syudad. Kinmalagiw hi Menelao ngadto han kota nga hirani han pungtod han Templo,

6samtang pinamatay nira Jason ngan han iya mga tawo an ira igkasi mga Judiyo hin waray kalooy. Waray makasabot hi Jason nga an pagdaog kontra han kalugaringon niya nga mga tawo amo an labi hin kamaraot nga kapakyasan. Iya ngani gin-isip ini nga kauswagan nga usa nga kadaogan kontra han iya mga kaaway, ngan diri lugod usa nga kapirdehan han kalugaringon niya nga mga tawo.

7Kundi waray hi Jason magkapot han pamunoan. Napirit lugod hiya hin pagkalagiw na liwat ngadto han katunaan han mga Amonitanhon, ngan ha kataposan waray gud an iya malingoon nga larang makahatag ha iya hin bisan ano kundi kaarawdan ngan kataramayon la,

8ngan namatay hiya dida hin paghingalooy. Ginpriso hiya ni Aretas nga pangulo han mga Arabe; gin-isip hiya nga usa nga kriminal ngan taramayon kay iya ginlingo an kalugaringon niya nga mga tawo. An ngatanan nagdumot ha iya, ngan nagbarobalhin hiya hin pagkalagiw tikang hin usa ngadto hin lain nga bungto. Kinmalagiw hiya ngadto ha Ehipto,

9kahuman ngadto ha Grecia, kay naglaom hiya nga didto makakaagi hiya hin darangpan dida han mga taga-Esparta nga kauropdan pa han mga Judiyo. Ha kataposan ini nga tawo nga nagpaiwas hin damo nga mga tawo tikang han kalugaringon nira nga nasod namatay, usa nga kalagiw didto hin usa nga langyaw nga tuna.

10Nakamatay hi Jason hin damo nga mga tawo ngan binayaan la nga waray mahilubong an ira mga lawas, kundi yana waray nagmasulob-on han kalugaringon niya nga kamatayon. Waray hiya tagi han seremonyas hin paglubong ngan waray hiya iglubong tampo han iya kaapoy-apoyan.

Ginsulong ni Antioco an Jerusalem(1 Mac. 1:20-63)

11Han pag-abot kan Antioco han sumat hiunong han nahinabo didto ha Jerusalem, an hunahuna niya nga naribok an bug-os nga nasod han Judea, ngan nagmaisog hiya sugad hin usa nga ihalas nga mananap. Sanglit tikang ha Ehipto kinalitan niya hin pagsulong an Jerusalem,

12ngan nagsugo hiya nga pamugotan hin waray kalooy an ngatanan nga ira igkatapo ngan bun-on an bisan hin-o nga ira hiagian nga natago didto han kabablayan.

13Ira pinamatay an ngatanan—kalalaken-an, kababayen-an, ngan kabataan; bisan ngani an mga minasus-an.

14Kahuman hin tulo ka adlaw nawad-an an Jerusalem hin 80,000 ka tawo; 40,000 an pinamatay dida han pagsulong ngan sugad liwat kadamo an nabihag ngan iginbaligya ini hira nga mga oripon.

15Kundi waray gihapon tumunga hi Antioco. Nagpasipara pa ngani hiya hin pagsulod han labi kabaraan nga Templo ha bug-os nga kalibutan, nga gin-unhan ni Menelao nga nahimo nga usa nga malingo han iya tuloohan ngan han iya mga tawo.

16Pinaagi han iya mahugaw ngan diri baraan nga mga kamot ginhakot ni Antioco an baraan nga mga butang hin pagsingba ngan an mga regalo nga pinanhatag hin iba nga kahadian basi makadugang han himaya ngan dungog han Templo.

17Pinmarayaw hi Antioco hini nga iya pagdaog nga waray hiya makasabot nga kanan Ginoo ini pagbuot nga pagpanamastamasan an Templo kay an sala han mga tawo han Jerusalem nagtukso ha iya nga masina hiya hin madaliay.

18Kon waray an mga tawo han Jerusalem magbuhat hin damo nga mga sala, sinisirotan unta dayon hi Antioco ngan diri hiya tinutugotan hin sugad nga linurong nga buhat. Iya unta aantoson an amo ngahaw nga kapalaran nga gin-antos ni Heliodoro nga ginsugo ni Hadi Seleuco hin pag-usisa han hirimosan hin manggad.

19Kundi waray pilia han Ginoo an iya mga tawo para han kaupayan han Templo; iya ginparig-on an iya Templo para han kaupayan han iya mga tawo.

20Sanglit nakaangbit an Templo han pag-antos han mga tawo, ngan kahuman nakaangbit liwat ini han ira kauswagan. Ginbayaan ini han Ginoo tungod han kasina niya, kundi iya ini ginpahiuli han paghugpoy han iya kasina.

Ginsulong na Liwat an Jerusalem

21Ginkuha ni Antioco in 61,365 ka kilo nga salapi tikang han Templo ngan nagdagmit hiya pagkadto ha Antioquia. Duro gud an iya paghinambog nga makakahimo hiya hin pagpalayag hin mga barko dida hin mamara nga tuna o hin pagpalakat han iya kasondalohan dida ha kadagatan.

22Nagtudlok hiya hin mga gobernador nga magriribok han mga tawo. Didto ha Jerusalem iya ginbutang hi Felipe nga taga-Frigia, nga labaw pa hin kamaraogdaog kay kan Antioco ngahaw.

23Didto ha Bukid Geresim ginbutang niya hi Andronico. Dugang pa hini, aada pa hi Menelao nga nagraogdaog han iya mga igkasi Judiyo hin labaw pa kamaraot kay han ginbuhat han mga gobernador. Nangalas hin duro hi Antioco han mga Judiyo

24nga nagpadara hiya hin 22,000 nga sinuholan nga kasondalohan nga mga taga-Misia ngadto ha Jerusalem ha ubos han pagmando ni Apolonio, ngan ginsugo ini hira hin panmatay han ngatanan nga kalalaken-an didto han syudad ngan panmaligya nga mga oripon han kababayen-an ngan kabataan.

25Inmabot ha Jerusalem hi Apolonio nga nagpasangil nga an iya tuyo amo an kalinaw ug pakigsangkay. Niyan dida hin usa nga Adlaw nga Iparahuway, samtang an ngatanan nga mga Judiyo nagsasaurog hini nga adlaw, iya gin-unhan an iya kasondalohan nga mga armado ngadaan dida hin usa nga parada ha gawas han syudad.

26Ha gilayon iya ginsugo an iya mga tawo hin pamatay han ngatanan nga magkakagawas hin pagkita ha ira. Nagdagmit hira ngadto han syudad ngan pinamatay nira in damo hin duro nga mga tawo.

27Kundi nakapalagiw ngadto han kabukiran hi Judas Macabeo ngan siyam pa nga iya kaupod, diin nag-ukoy hira sugad hin ihalas nga kamanampan. Basi diri hira mahugawan, nagkaon la hira hin mga tanom nga ira hin-agian didto ha kagurangan.