1Ayaw pag-ayata in tawo nga may gahom; bangin mahulog ka ha iya mga kamot.
2Ayaw pakig-away hin riko nga tawo; bangin paghukipan niya in mga tawo hin pagkontra ha imo. Damo na nga mga tawo ngan kahadian an ginbungkag han bulawan.
3Ayaw pakiglantugi hin mayakan nga tawo; imo la dudugangan an iya kamayakan.
4Ayaw pagtawai in tawo nga maraot an batasan; bangin pagpakaalohan niya an imo mga ginikanan.
5Ayaw paghukmi in tawo nga nagbabasol na han iya mga sala. Hinumdomi nga makasasala kita ngatanan.
6Ayaw pagtamaya in tawo tungod kay lagas na hiya; an iba ha aton nagtitikalagas na.
7Ayaw ikalipay an pagkamatay hin usa ka tawo; hinumdomi nga kita ngatanan mapatay.
8Ayaw pagpasibay-i an ginhimangraw han mga mag-aram. Pag-admi an ira mga darahonon; tikang hini nga mga tawo mahibabaro ka hin dako nga kamaaram ngan hin pag-alagad han mga dumagko.
9Pamatii an iginsisiring han mga kalagsan kay hinbaroan nira ini tikang hadton mga nag-una ha ira. Mahibabaro ka tikang ha ira ngan makakagtutdo hira ha imo kon uunanhon hin kaandam hin pagbaton ha takna han imo pagkinahanglan.
10Ayaw pagtagi in usa nga makasasala hin higayon hin pakasala. Bangin la lugod ikaw an madaot; masayunay la ini sugad hin kapaso kon ginsusung-an mo an kalayo.
11Ayaw pagdara hin kasina han tawo nga waray pagkaawod. Bangin lubagon niya an imo mga pulong ngan gamiton niya ini kontra ha imo.
12Ayaw pagpautang hin bisan hin-o nga tawo nga makurukusog kay ha imo. Kon buhaton mo ini, iisipon na la nga nawara ha imo.
13Ayaw pagpatapod hin pagbayad hin utang nga diri mo maaakos. Kon magpatapod ka kinahanglan nga andam ka hin pagbayad.
14Ayaw pagsalawad hin sumbong kontra hin usa nga maghurukom. Makakadaog hiya tungod han iya katungdanan.
15Ayaw upod hin paglakat hin tawo nga lisang. Makakasamok la ini ha imo. Bubuhaton niya an linurong nga iya naruruyagan ngan mapatay ka upod ha iya.
16Ayaw pakiglantogi hin tawo nga mapaso an ulo, o pagkadto hin dapit nga duha la kamo. Diri hiya nahahadlok hin pagpatay hin tawo ngan tutubalon ka dida nga waray may mabulig ha imo.
17Ayaw pangaro hin sagdon hin usa nga lurong. Diri hiya makakahimo hin pagtago han imo igsusumat ha iya.
18Ayaw pagbuhat hin bisan ano nga diri angay hibaroan ha atubangan hin diri kinikilala nga tawo. Diri ka maaram kon ano an mahinanabo kon imo ini buhaton.
19Ayaw ipadayag hin bisan kan kanay an imo tinago nga mga panhunahuna. Kon buhaton mo ini, daw sugad mo la hin ginkaragan an higayon han imo kalipayan.
Who We AreWhat We EelieveWhat We Do
2025 by iamachristian.org,Inc All rights reserved.
