Sirac 10 - Samarenyo Meaning-Based Bible (1984)（MBBSAM）

1An maaram nga punoan magtututdo han iya mga tawo, ngan an iya pamunoan matutuhay.

2Masusugad han ira punoan an ngatanan nga mga opisyal ngan an ngatanan nga mga taghimungto.

3Makakadaot han iya mga tawo in usa nga tapang nga hadi, kundi magmamakusog in usa nga pamunoan kon makinaadmananon an mga punoan.

4An pamunoan han kalibutan aada ha mga kamot han Ginoo ngan ginpapadara niya an maupay nga tawo ha igo nga panahon.

5Aada ha mga kamot han Ginoo amo an pagpauswag hito nga tawo. An Ginoo amo an nagpapasidungog han bisan hin-o nga opisyal.

An Kamapahitas-on

6Ayaw pagkinasina bisan kan kanay tungod hin gutiay nga sayop nga iya ginbubuhat. Ayaw pagbuhat hin bisan ano tungod hin pagpalabilabi.

7An pagpalabilabi ngan pagbuhat hin diri matadong ikinapupungot han Ginoo ngan han tawo.

8Napupukan an mga nasod tungod han pagbuhat hin diri matadong, pagpalabilabi, ngan manggad; ngan lain nga mga nasod in masaliwan ha ira.

9Tapotapo ngan mga agbon la kita, ano ba an aton sadang iparayaw? Nadudunot an aton lawas bisan ngani nga buhi pa kita.

10Nakakagupong han magtarambal an maiha nga sakit. Bisan in usa nga hadi mahimo nga buhi pa yana nga adlaw ngan pagkabuwas patay na hiya.

11Kon napatay an tawo, waray niya maaangkon kon diri la an mga ulod, mga lagong, ngan mga igis hin mga langaw.

12An kamapahitas-on aada natikang kon in usa nga tawo natalikod han Ginoo nga iya magburuhat.

13An kamapahitas-on sugad hin burabod nga nagpapaawas hin sala, ngan adton magpabilin hin kamapahitas-on magbubuhat hin damo nga karat-an. Amo ini an hinungdan kay ano nga an Ginoo nagpadara hin makaharadlok nga kastigo ngadto han kadam-an ngan namatay hira ngatanan.

14Ginpukan han Ginoo in mga hadi ngan ginliwanan hira hin mas mapinaubsanon nga mga tawo.

15Ginggabot han Ginoo in mga nasod ngan iginsaliwan ha ira in magpinaubsanon nga mga nasod.

16Ginpukan han Ginoo in mga ginhadian ngan ginpuo ngatanan an ira katunaan.

17May-ada gin-ubos niya hin pagpuo nga diri na ngani ini hinnunumdoman.

18Diri gud tuyo han Magburuhat nga an mga tawo magmapahitas-on ngan magmadumot.

An mga Tawo nga Angay Pagpasidunggan

19Hin-o an angay pagpasidunggan? An mga tawo. Hin-o nga mga tawo? Adton may pagkahadlok han Ginoo. Hin-o an diri angay pagpasidunggan? An mga tawo. Hin-o nga mga tawo? Adton mga nasupak han mga sugo han Ginoo.

20Kinahanglan pagpasidunggan in usa nga pangulo hadton mga nagsusunod ha iya, ngan ginpapasidunggan han Ginoo adton may pagkahadlok ha iya.

22Ipinaparayaw an mga riko, mga bantogan ngan mga pobre—hira ngatanan naparayaw han ira pagkahadlok han Ginoo.

23Diri maupay an pagdumiri hin paghatag hin dungog ngadto hin usa nga kablas nga may-ada aram ngan sayop an paghatag hin dungog hin usa nga makasasala.

24Pagpapasidunggan an mga tawo nga gamhanan, mga punoan ngan mga maghurukom, kundi waray ha ira malabaw hin usa ka tawo nga may pagkahadlok ha Ginoo.

25An oripon nga may-ada aram pagsisirbehan hin mga talwas nga tawo; ngan kon may-ada nira buot, diri hira magdudumiri hini.

Pagpaubos ngan Tahora an imo Kalugaringon

26Ayaw iparayaw an imo hibaro kon nagtutuman ka han imo buruhaton, ngan ayaw parayaw kon aada ka ha kakurian.

27Mauruupay pa an pagtrabaho ngan magsobra ka han imo ginkikinahanglan kay hin paghinambog kundi gutom ka.

28Anak, tipigi an pagtahod han imo kalugaringon, kundi pabilin nga mapinaubsanon. Pagmahala an imo kalugaringon sumala han imo matuod nga pagkatakos.

29Waray katadongan para hin usa ka tawo nga ipaubos niya an iya kalugaringon. Waray matahod hin usa ka tawo nga diri maaram magtahod han iya kalugaringon.

30Mahimo nga pagpasidunggan an mga kablas tungod han ira maupay nga panhunahuna ngan mahimo nga pagpasidunggan an mga riko tungod han ira bahandi.

31Kon pagpasidunggan in usa ka tawo dida han iya pagkakablas, labi na kon magin riko na hiya! Kon tinatamay in usa ka tawo dida han iya pagkariko labi na kon makablas na hiya!