Ezequiel 39 - Samarenyo Meaning-Based Bible (1984)（MBBSAM）

Mapipirde hi Gog

1Nagsiring an Ginoo nga Dyos, “Anak hin tawo, isumbong hi Gog nga labaw nga punoan han Mesec ug Tubal, ngan sidnga hiya nga kaaway ko hiya.

2Bibirikson ko hiya ngan pagmamandoan ko hiya hin paggawas tikang han hirayo nga amihanan tubtob nga umabot hiya ngadto han kabukiran han Israel.

3Niyan papaloson ko an bawog ha iya wala nga kamot, ngan an mga pana ha iya tuo nga kamot.

4Mapupukan nga mga patay hi Gog ngan an iya kasondalohan ngan an mga nasod nga dapig ha iya didto han kabukiran han Israel, ngan ipapakaon ko an ira mga lawas ha ngatanan nga katamsihan ngan magpintas nga kamanampan.

5Mapupukan hira nga mga patay didto han kaumhan. Ako nga Ginoo nga Dyos an nagyakan.

6Susuritan ko an tuna han Magog ngan an ngatanan nga kabaybayonan diin an mga tawo murayaw an pag-ukoy, ngan nakilala an ngatanan nga ako amo an Ginoo.

7Tatalinguhaon ko nga kumilala han akon baraan nga ngaran an akon mga tawo, an Israel, ngan diri na gud ako matugot nga pagpakaalohan an akon ngaran. Niyan makilala an mga nasod nga ako amo an Ginoo nga Baraan nga Dyos han Israel.”

8Nagsiring an Ginoo nga Dyos, “Maabot gud an adlaw nga akon hinnabihan.

9Magkakagawas an mga tawo nga nag-uokoy didto han mga syudad han Israel ngan paninirokon nira an binayaan nga mga hinganiban para hin pagsungo. Isusungo nira an mga taming, mga pana, mga bawog, mga bangkaw, ngan mga sugob, ngan magkakamay-ada hira igo nga sungo sulod hin pito ka tuig.

10Diri na hira mangangahoy didto han kaumhan o magpupulod hin mga kahoy didto ha kagurangan, kay magkakamay-ada nira nga binayaan nga mga hinganiban nga isurungo. Paninikasan ngan pangangawatan nira adton mga nanikas ngan nangawat ha ira.” An Ginoo nga Dyos an nagyakan.

Ilulubong hi Gog

11Nagsiring an Ginoo, “Kon mahinabo na ini ngatanan, tatagan ko hi Gog hin lurubngan nga tuna didto ha Israel, didto han Kahamub-an han-mga-Naglalakaton, ha sinirangan han Dagat nga Patay. Didto iglulubong hi Gog ngan an ngatanan niya nga kasondalohan, ngan pagngangaranan an kahamub-an nga ‘Kahamub-an han Kasondalohan ni Gog.’

12Aabotan an mga Israelita hin pito ka bulan hin paglubong han ngatanan nga mga patay nga lawas ngan hin paglinis na liwat han tuna.

13Mabulig paglubong ha ira an ngatanan nga mga tawo didto han tuna, ngan pagpapasidunggan hira tungod hini dida han adlaw han akon pagdarag-an. Ako nga Ginoo an nagyakan.

14Katapos han pito ka bulan pagpipilion in mga tawo nga magsusudoy han tuna basi mamiling ngan maglubong hadton mga lawas nga nahibilin pa ha tuna, basi makalinis hira han tuna.

15Ha ira pagsudoy han tuna, ha kada nira pakakaagi hin tul-an hin tawo, bubutangan ini nira hin tigaman, basi kadtoon han mga maglurubong ngan iglubong ini didto han Kahamub-an han Kasondalohan ni Gog.

16(Hirani han kahamub-an may-ada bungto nga an ngaran ‘Hamona.’) Sanglit magmamalinis na liwat an tuna.”

17Nagsiring ha akon an Ginoo nga Dyos, “Anak hin tawo, pakanhia an ngatanan nga katamsihan ngan kamanampan tikang han ngatanan nga dapit hin pagkaon han halad nga akon pag-aandamon para ha ira. Magigin dako hin duro ini nga kombite didto han kabukiran han Israel diin makakakaon hira hin karne ngan makakainom hin dugo.

18Kakaonon nira an mga lawas hin mga sondalo ngan iimnon an dugo han mga punoan han tuna, nga panmamatayon ngatanan sugad hin lalaki nga mga karnero o nati nga mga karnero, o mga kanding, o magtambok nga mga lalaki nga baka.

19Kon pamatayon ko na ini nga mga tawo sugad hin mga halad nga tinubod, kakaonon han katamsihan ngan kamanampan an ngatanan nga tambok tubtob han ira pagtakas ngan iimnon an dugo tubtob han ira kahubog.

20Kakaonon nira dida han akon lamesa an ngatanan nga ira maaakos hin pagkaon han mga kabayo ngan han mga nangabayo hini ngan han mga sondalo ngan mag-isog nga mga tawo. Ako nga Ginoo nga Dyos an nagyakan.”

Igpapahiuli an Israel

21Nagsiring an Ginoo, “Pakikitaon ko an mga nasod han akon pagkagamhanan ngan ipakikita ko ha ira an akon paggamit han akon gahom hin pagtuman han akon magtadong nga mga larang.

22Tikang hito nga adlaw makilala an mga Israelita nga ako amo an Ginoo nga ira Dyos.

23Ngan mahibabaro an mga nasod nga an mga Israelita nahalin hin kabihag tungod han ira mga sala kontra ha akon. Tinalikdan ko hira, ngan iginpadaog ko hira han ira mga kaaway ngan iginpapatay ko hira didto han pag-awayan.

24Iginhatag ko ha ira an angay ha ira tungod han ira pagkamahugaw ngan pagkamaraot, ngan tinalikdan ko hira.”

25Nagsiring an Ginoo nga Dyos, “Kundi yana ipakikita ko ha ira an akon pagkalooy ngadto han mga tulin ni Jacob, an mga tawo han Israel, ngan pauuswagon ko na liwat hira. Pananalipdan ko an akon baraan nga ngaran.

26Kon mag-ukoy na liwat hira ha kahimyangan didto han ira kalugaringon nga tuna, nga waray na magtatarhog ha ira, mahingangalimot hira han kaalohi ha ira tungod han paglingoa nira ha akon.

27Ibabalik ko hira tikang han ngatanan nga kanasoran nga inuokyan han ira mga kaaway basi an damo nga mga nasod makasabot nga baraan ako.

28Niyan makilala an akon mga tawo nga ako amo an Ginoo nga ira Dyos. Mahibabaroan nira ini kay iginpabihag ko hira ngan yana gintitirok ko hira ngan ibinabalik ko hira ngadto han ira kalugaringon nga tuna, nga waray gud bisan usa nga igbibilin.

29Igbububo ko an akon espiritu ngada han mga tawo han Israel ngan diri ko na gud hira babayaan. Ako nga Ginoo nga Dyos an nagyakan.”