Job 15 - Samarenyo Meaning-Based Bible (1984)（MBBSAM）

An Ikaduha nga Hiruhimangraw(15:1–21:34)Elipas

1-2Waray hinungdan nga mga pulong, Job! Waray hinungdan nga mga pulong!

3Waray makinaadmananon nga tawo nga magyayakan sugad han imo pagyakan,

o mananalipod ha iya ngahaw pinaagi hin mga pulong nga waray hinungdan.

4Kon pataksan ka la han imo karuyag, waray gud mahahadlok han Dyos;

waray gud mag-aampo ha iya.

5An imo kamaraogdaog hinsasabotan dida han imo mga pulong;

karuyag ka tumago ha luyo hin listo nga mga pulong.

6Waray na kinahanglan nga maghukom pa ako ha imo;

ginhuhukman ka na han tagsa nga pulong nga imo ginhihimangraw.

7Naghuhunahuna ka ba nga ikaw an syahan nga tawo nga natawo?

Nakadto ka ba han paghimoa han Dyos han kabukiran?

8Hinbatian mo ba an mga iginlarang han Dyos?

Ikaw la ba an tag-iya han kinaadman han tawo?

9Waray nimo hinbabaroan nga diri namon hinbabaroan.

10Hinbaroan namon an amon kinaadman tikang hin ubanon na nga mga tawo—

mga tawo nga una pa matawo kan imo tatay.

11Tinatagan ka han Dyos hin pahalibyaw; kay ano nga waray mo ini karawta?

Naghimangraw kami tungod ha iya hin maglumo nga mga pulong.

12Kundi kinalasan ka ngan tinutokan mo kami hin kasina.

13Kay ano nga nasina ka han Dyos ngan ginpakaraot mo hiya?

14May-ada ba tinuod nga putli nga tawo?

May-ada ba tinuod nga matadong ha atubangan han Dyos?

15Kitaa daw, diri ngani an Dyos nasarig han iya mga anghel;

bisan ngani ini hira diri mga putli ha iya pagtan-aw.

16An tawo pa ba nga sugad la hin tubig an iya pag-inom hin karat-an?

Tinuod, maraot ngan waray gud pulos an tawo.

17Pamatii daw, Job, an akon hinbabaroan.

18Gintutdoan ako han makinaadmananon nga mga tawo hin mga kamaturoran,

nga ira hinbaroan tikang han ira mga ginikanan,

ngan waray nira gintago nga mga sekreto.

19Waray nag-ukoy ha ira tuna nga mga lumalangyaw;

waray ha ira nagtutdo hin pagsalikway han Dyos.

20An maraot nga tawo nga nagtatalumpigos hin iba

mag-aantos samtang buhi pa hiya.

21Hibabatian niya in magpakaharadlok nga mga tingog,

ngan susulongon hiya hin mga tikasan ha takna nga naghuhunahuna hiya nga waray maglalabot ha iya.

22Waray niya paglaom hin pakalikay tikang han kasisidman,

kay naghuhulat in usa nga espada hin pagpatay ha iya,

23ngan naghuhulat in mga manaol hin pagkaon han iya lawas.

Maaram hiya nga masirom an iya kabubwason;

24An karat-an gamhanan sugad hin hadi,

andam hin pagsulong ha iya.

25Amo ito an dadangatan han tawo

nga naalsa han iya kamauo kontra han Dyos,

ngan naato han Labi Kamakagarahum.

26-27Mapinahitas-on ngan masupilon ito nga tawo;

kinakaptan niya an iya taming

ngan nadangkulos hiya hin pakiaway han Dyos.

28Amo ito an tawo nga nagpukan hin mga syudad,

ngan nag-agaw hin mga balay kanay mga tag-iya nanngalagiw,

kundi an araway an magbubungkag hito nga mga syudad ngan mga balay.

29Diri mag-iiha an iya pagkariko;

waray mga hiagi niya nga magpapadayon.

Mapapara bisan ngani an iya lambong,

30ngan diri hiya makakalikay han kasisidman.

Masusugad hiya hin kahoy

kanay mga sanga gintutubod hin kalayo,

kanay mga bukad ginpapalid han hangin.

31Kon lurong hiya nga asay niya sinasarigan an karat-an,

karat-an man an igbabalos ha iya.

32Malalaya hiya nga diri pa naabot an iya panahon,

malalaya sugad hin sanga ngan diri na gud mananaringsing.

33Masusugad hiya hin mga ubas nga natataktak an hilaw nga mga bunga;

sugad hin mga olibo nga nararapdag an mga bukad.

34Mawawaray mga tulin an mga tawo nga diri nakilala hin dyos,

ngan kalayo an magbubungkag han mga balay nga gintindog pinaagi hin mga hukip.

35Amo ini an mga tawo nga naglalarang hin kasamokan ngan nagbubuhat hin maraot;

an ira mga kasingkasing dayuday puno hin paglimbong.