Sirac 49 - Samarenyo Meaning-Based Bible (1984)（MBBSAM）

Hi Josias

1Sugad hin kahamot an ngaran ni Josias han alimyon hin mahusay nga pagkasakot nga insyenso, sugad kamatam-is hin pagtilaw hin dugos, sugad hin tokar pinadisan hin irimnon dida hin sasaro.

2Ginsunod niya an matadong nga paagi hin pagtadong han nasod ngan ginkuha niya an mga makaharadlok nga mga buruhaton han pagsingba hin mga diyosdiyos.

3Maunongon gud hiya han Ginoo ngan ginparig-on niya an matuod nga tuloohan hadto nga nag-agi nga maraot nga mga panahon.

Hi Jeremias

4Labot kanda David, Ezequias, ug Josias, makalilisang nga mga makasasala an ngatanan nga kahadian, kay ginbayaan nira an Balaod han Gihahataasi ngadto gud han sidsid han ginhadian.

5Igintubyan nira an ira gahom ug kadungganan ngadto hin mga lumalangyaw,

6nga nagsunog han syudad nga baraan, ngan ginbayaan an mga kalsada hini sumala han igintagna ni Jeremias.

7Ginpakaalohan nira hi Jeremias, bisan kon ginpili na hiya nga manaragna han waray pa hiya katatawo, “basi maggabot ngan magpukan, magbungkag ngan magpuo” kundi “magtindog ngan magtanom” liwat.

Hi Ezekiel

8Amo adto hi Ezekiel an ginpakita han panan-awon han langitnon nga himaya nga nakada ha igbaw han karuwahe ngan han buhi nga mga binuhat.

9Naghinabi liwat hiya han manaragna nga hi Job nga dayuday nagbuhat han matadong.An Dose nga mga Manaragna

10Mabanhaw unta tikang ha lubnganan an mga tul-an han dose nga mga manaragna tungod nga nakagpadasig ini nga mga tawo han nasod han Israel ngan nagtalwas ha ira hin masarigon nga paglaom.

Hira Sorobabel ug Josue

11Uunanhon ta pagdayaw kan Sorobabel? Sugad hiya hin singsing nga iginbutang ha tuo nga kamot han Ginoo,

12sugad kan Josue nga anak ni Josadac. Gin-otro nira pagtindog an Templo nga iginpahinungod para han dayon nga kabantogan.

Hi Nehemias

13Kinahanglan liwat hinumdoman ngan pasidunggan hi Nehemias. Gin-ayad niya an naruba nga mga pader han Jerusalem; iginbutang niya an mga ganghaan ngan mga trangka. Gintindog niya an aton mga puroy-anan.

An Mga Patriarka

14Waray pa tawo nga nabuhi dinhe ha tuna nga sugad kan Enoc, kay gindara hiya nga buhi ngadto ha langit.

15Waray pa liwat natawo nga sugad kan Jose; ginpasidunggan bisan pa an iya mga tul-an.

16Ginpasidunggan hira Sem, Set, ug Enos, kundi labaw gud han ngatanan nga mga binuhat an himaya ni Adan.