Ezequiel 41 - Samarenyo Meaning-Based Bible (1984)（MBBSAM）

1Sunod, gindara ako han tawo ngadto han butnga nga kwarto nga amo an Baraan nga Dapit. Ginsukol niya an aragian ngadto hini: baynte ka metros an kahitaas hini

2ngan lima ka metros an kahiluag, ngan may mga bungbong ha kada ligid nga duha ka metros an kadakmol. Ginsukol niya an kwarto: An kahilaba hini 20 ka metros, ngan napulo ka metros an kahiluag.

3Niyan kinmadto hiya han gisusulori nga kwarto. Ginsukol niya an aragian ngadto hini: usa ka metro an kahitaas hini ngan tulo ka metros an kahiluag, ngan may mga bungbong ha kada ligid nga tulo ug tunga ka metros an kadakmol.

4Ginsukol niya an kwarto ngan napulo ka metros ka kwadrado ini. Nauunhan ini nga kwarto han butnga nga kwarto. Niyan nagsiring hiya ha akon, “Amo ini an Labi Kabaraan nga Dapit.”

May mga Kwarto nga Igindukot han mga Bungbong han Templo

5Ginsukol han tawo an kadakmol han sakob nga bungbong han Templo, ngan tulo ka metros ini. Dukot hini nga bungbong nga nalibot gud han Templo, may rumbay hin gudti nga mga kwarto nga tag duha ka metros an kahiluag.

6Tulo ka andana ini nga mga kwarto, nga may 30 nga mga kwarto ha kada andana. Manirunipis an gawas nga bungbong han Templo ha kada andana kay han bungbong han ubos nga andana, basi makatungtong ha bungbong an mga kwarto ngan diri na kinahanglan iglubngon ngadto han bungbong.

7Sanglit kon ginkikita didto ha gawas an mga bungbong han Templo, daw pareho la an kadakmol hini tikang ha ubos ngadto ha igbaw. Ginhimo in duha nga higlapad nga mga hagdan nga igintaod ngada han gawas nga bungbong han Templo ha gawas han mga kwarto sanglit nahihimo hin pagkadto han butnga ngan igbaw nga mga andana tikang han syahan nga andana.

8-11An gawas nga bungbong hini nga mga kwarto duha ug tunga ka metros an kadakmol. May usa nga porta ngadto han mga kwarto didto han amihanan han Templo, ngan usa ngadto han mga kwarto didto han timogan. Hinkit-an ko nga may-ada balkon nga duha ug tunga ka metros an kahiluag ha palibot han Templo; tulo ka metros ini tikang ha tuna ngan natupong ini han patukoranan han mga kwarto dida ha ligid han mga bungbong han Templo. Ha butnga han balkon ngan han mga balay nga ginagamit han kapadian may-ada hiluag nga dapit nga napulo ka metros pataboktabok han mga ligid han Templo.

May Balay didto ha Katundan

12Didto han kataposan gud han hiluag nga dapit ha katundan han Templo, may usa nga balay nga 45 ka metros an kahilaba ngan 35 ka metros kahiluag; duha ug tunga ka metros an kadakmol an nalibot nga mga bungbong han balay.

Ginsukol an Templo

13Ginsukol han tawo an gawas han Templo, ngan 50 ka metros an kahilaba hini. Ngan tikang han likod han Templo, ha tabok han hiluag nga dapit ngadto han kataposan han balay ha katundan, 50 ka metros liwat an kahirayo.

14An kahirayo ha tabok han atubangan han Templo lakip an hiluag nga mga dapit ha kada ligid, 50 ka metros liwat.

15Iya ginsukol an kahilaba han balay ngadto han katundan han Templo lakip an mga balkon ha kada ligid, ngan 50 ka metros liwat ini.

Iginpakita an mga Bahin han Templo

15b-16Puros hinakpalan hin kahoy tikang ha salog ngadto han mga bintana an aragian nga kwarto han Templo, an Baraan nga Dapit, ngan an Labi Kabaraan nga Dapit. Mahihimo hin katahobi ini nga mga bintana.

17-18Luob hin ginuhit, nga mga palmera ngan mga kerubin an mga bungbong ha sakob han Templo, ngadto gud ha igbaw han mga porta. Ginlat-anglat-ang nga nagsusunodsunod an mga palmera ngan an mga kerubin ha palibot gud han kwarto. May tag duha nga bayhon an kada kerubin:

19bayhon hin tawo nga nalingi ngadto han palmera ha usa nga ligid, ngan bayhon hin liyon nga nalingi ngadto han palmera ha luyo. Sandag sugad hini ha palibot han bungbong,

20tikang ha salog ngadto ha igbaw han mga porta.

21Kwadrado an mga harigi han porta han Baraan nga Dapit.

Ginpakita an Kahoy nga Altar

Ha atubangan han aragian han Labi Kabaraan nga Dapit, may-ada sugad pagkit-on

22hin usa nga kahoy nga altar pagkit-on. Usa ug tunga ka metros an kahitaas hini ngan usa ka metro an kahalapad. Hinimo hin kahoy ngatanan an kanto nga mga tiiltiil hini, an tungtongan hini, ngan an mga ligid hini. Nagsiring ha akon an tawo, “Amo ini an lamesa nga aada han gin-uokyan han Ginoo.”

Ginpakita an mga Portahan

23May-ada porta didto han kataposan han aragian tipakadto han Baraan nga Dapit ngan usa liwat nga porta didto han kataposan han aragian tipakadto han Labi Kabaraan nga Dapit.

24Mga doble ini nga porta nga naabre ha butnga.

25May-ada mga ginuhit nga mga palmera ug kerubin dida han mga porta han Baraan nga Dapit sugad han nakadto han mga bungbong. Ngan may-ada taklob nga kahoy ha gawas han aragian ngadto han aragian nga kwarto.

26Paligid hini nga kwarto may-ada mga bintana, ug an mga bungbong ginuhitan hin mga palmera.