1 Cronicas 29 - Samarenyo Meaning-Based Bible (1984)（MBBSAM）

Mga Regalo para hin Pagtindog han Templo

1Ginpasabot ni Hadi David an bug-os nga katirok, “An akon anak, hi Solomon, amo an ginpili han Dyos, kundi bata pa hiya ngan kulang pa hin hibaro bahin hini nga mga butang. Makalilisang inin inaatubang nga buruhaton, kay diri la ini palasyo hin tawo kundi templo ini han Ginoo nga Dyos.

2Gintalingoha ko an pag-andam han mga itirindog han Templo—bulawan, salapi, bronse, puthaw, mga tablon, mga mahal nga bato, mga magranggat nga bato, mga de kolor nga bato, ngan mga marmol.

3Labot hini nga akon gin-andam naghatag pa ako, tikang han akon kalugaringon nga hiagi, hin salapi ug bulawan tungod han dako nga gugma ko han Templo han Dyos.

4Naghatag ako hin 115,000 ka kilo han gimamaupayi nga bulawan ngan 265,000 ka kilo han tunay nga salapi para han pag-adorno han mga bongbong han Templo

5ngan han mga garamiton nga metal. Yana hin-o ha iyo in may-ada kasingkasing hin paghatag hin regalo para han Ginoo?”

6Niyan an mga puno han mga banay, an mga pangulo han mga tribo, an mga pangulo han mga sondalo, an mga tinaporan hin pagdumara han mga hiagi han hadi naghatag

7hin kinasingkasing para han mga buruhaton han Templo: 190,000 ka kilo nga bulawan; 380,000 ka kilo nga salapi; 675,000 ka kilo nga bronse, ngan 3,750,000 ka kilo nga puthaw.

8Adton may-ada mga mahal nga bato naghatag para han hirimosan han bahandi han Templo ngan gindumara ini ni Jahiel nga sakop han Levita nga banay ni Gerson.

9Kinasingkasing an paghatag han mga tawo ngan malipayon hira kay damo gud an ira natirok. Uraura gud an kalipay liwat ni David.

Nagdayaw hi David han Dyos

10Ha atubangan han katirok, nagdayaw hi David han Ginoo. Nagsiring hiya, “Ginoo nga Dyos han amon ginikanan nga hi Jacob, dayawon ka ha kadayonan!

11Imo an gahom, pagkaharangdon, himaya, kamatahum, ngan pagdarag-an. Imo an ngatanan nga aadto ha langit ug aanhi ha tuna, ngan ikaw an hadi, ngan labaw ikaw han ngatanan.

12An mga bahandi ug manggad natikang ha imo; naghahadi ka han ngatanan pinaagi han imo kusog ug gahom; ngan nahatag ka ha ngatanan hin gahom ngan hin kusog.

13Yana, nagpapasalamat kami ha imo nga amon Dyos ngan gindadayaw namon an imo mahimayaon nga ngaran.

14“Kundi, ha pagkatinuod, an akon mga tawo ug ako diri makakahatag ha imo, kay an ngatanan hatag man nimo ha amon, ngan amon la ibinabalik ha imo an imo ginhatag ha amon.

15Maaram ka, Ginoo, nga sugad la kami dinhe ha kalibutan hin mga ginhalin nga mga oripon ug mga lumalangyaw sugad han amon mga ginikanan. Lumalabay la an amon kinabuhi ngan mapatay kami.

16O Ginoo nga amon Dyos, gindara namon ini ngatanan nga bahandi ug manggad basi matindog an imo templo ngan magdayaw kami han imo baraan nga ngaran, kundi tikang ini ngatanan ha imo ngan ikaw an tag-iya hini ngatanan.

17Maaram ako ngan ginsasarihan mo an kasingkasing han tawo ngan nalilipay ka han tawo nga tangkod ug matadong; kinasingkasing an akon paghatag hini ha imo ngan kinmita ako nga malipayon an mga tawo nga nagtirok dinhe hin pagdara hin mga halad ha imo.

18O Ginoo nga Dyos han amon mga ginikanan, hira Abraham, Isaac, ug Jacob, himoa nga magpadayon an amon mga tinguha hin kamakusog dida han mga kasingkasing han imo mga tawo ngan dayuday magpabilin unta hira hin kamatinumanon ha imo.

19Ihatag ha akon anak, hi Solomon, an kinasingkasing nga paghingyap hin pagsugot han ngatanan nga imo igsusugo ha iya ngan paghingyap hin pagtindog han Templo nga akon na gin-andaman.”

20Niyan nagsiring hi David ha mga tawo, “Dayawa an Ginoo nga iyo Dyos!” Ngan nagdayaw han Ginoo nga Dyos han ira mga ginikanan an bug-os nga katirok, ngan yinmukbo hira ngan nagpasidungog han Ginoo ug han hadi.

21Han pagkasunod nga adlaw, nag-ihaw hira hin mga hayop ngan ira ginhalad nga mga unong nga tutuboron ngadto han Ginoo, ngan kahuman, iginpakaon han mga tawo. Labot la hini, may-ada nira mga halad nga susunogon: 1,000 nga mga todo nga baka, 1,000 nga mga todo nga karnero, 1,000 nga mga nati nga karnero. Gintubod ini nira didto han altar. Nagdara liwat hira hin mga halad nga bino.

22Sanglit hadto nga adlaw nagmaribhong hira samtang nangaon ngan nag-inom hira ha atubangan han Ginoo.

Ha ikaduha nga higayon, ginpasangyaw nira nga hadi hi Solomon. Ha ngaran han Ginoo gindihogan nira hi Solomon nga ira hadi ug hi Sadoc nga ira padi.

23Sinmaliwan hi Solomon kan David, an iya amay, hin pagkahadi ngan linmingkod hiya ha trono nga gintindog han Ginoo. Nagmainuswagon hiya nga hadi ngan nagsugot ha iya an bug-os nga nasod han Israel.

24An ngatanan nga mga pangulo ngan mga sondalo, ngan bisan an mga anak ni David nga iya mga kabugtoan, nagsaad hin pag-ugop kan Hadi Solomon.

25Ginhimo han Ginoo nga an bug-os nga nasod magtahod upod in kahadlok kan Solomon ngan nagamhanan hiya labaw pa han iba nga mga hadi han Israel.

Haliputay nga Pagsaysay han Pagkahadi ni David

26-27Naghadi hin 40 ka tuig han bug-os nga Israel hi Hadi David, an anak ni Isai. Didto anay hiya ha Hebron hin pito ka tuig ngan kahuman didto hiya ha Jerusalem hin 33 ka tuig.

28Namatay hiya dida ha iya pagkalagas, riko ngan dungganan. Sinaliwanan hiya hin ka hadi ni Solomon, an iya anak.

29An kasaysayan han kinabuhi ni Hadi David tikang han tinikangan ngada han kamatay niya nahisurat dida han mga mantalaan han tulo nga manaragna, hira Samuel, Natan, ug Gad.

30Naghinabi an mga mantalaan bahin han iya pagkahadi, han iya pagkagamhanan nga hadi, ngan han ngatanan nga nahinabo ha iya, han Israel, ug an mga higrani nga mga ginhadian.