Mga Salmo 7 - Samarenyo Meaning-Based Bible (1984)（MBBSAM）

Pag-ampo para hin Hustisya

1 Ginoo, akon Dyos,

ako nadangop hin panalipod;

Talwasa ako ngan bawia han mga nagbubukod,

2bangin sugad hin liyon ako nira dad-on

ha dapit nga waray makakatalwas ha akon,

ngan didto ira ako paghunothunoton.

3-4 Ginoo, akon Dyos,

kon nakasala ako hin tawo,

ginraogdaog ko in kaaway,

hin sangkay ako naglingo—

bisan ano hini nga akon ginbuhat—

5tugoti an kaaway ha akon paglanat,

tugoti pagtigbas, ha akon pagpatay,

bayaan ha tuna kinabuhi waray.

6Bangon, O Ginoo,

tungod han imo kasina!

Tindog ngan an pamintas han kaaway asdanga;

pagmata, panginano ug buligi ako!

An katadongan ha imo an nagsusugo.

7Tiroka ngada ha imo

an ngatanan nga katawhan,

ngan paghadi ikaw ha ira

tikang ha kahitas-an.

8Ikaw an maghurukom

han ngatanan nga mga tawo.

Upaya ha akon an paghukom

kay waray sala ako.

9Ikaw an Dyos nga matadong,

naghuhukom han hunahuna ug karuyagan namon.

Han magraogdaog nga tawo

paukya an karat-an,

ngan tagi hin pahalipay an tawo nga buotan.

10An Dyos amo an nasalipod ha akon;

natalwas hiya hadton mga masinugtanon.

11An Dyos matadong nga maghurukom han ngatanan,

an magraogdaog kanunay iya pagsisirotan.

12Kon diri hira magbalhin han ira mga ginawian,

an bangkaw babairon han Dyos,

an pana ha ira andam;

13kinukuha niya an nakakamatay nga mga hinganiban,

ngan an mga pana binabawog niya nga daan.

14Kitaa, kamaraot an hunahuna hini nga mga tawo;

limbon an ira ginbuhat ngan samok an panuyo.

15Dida an bitik nga para han iba ira gin-andam,

waray iba, lugod, hira la ngahaw an hinsakban.

16An ira kamaraot amo ngahaw an nagsirot ha ira,

ngan sinakitan hira tungod han ira pakigburoka.

17Han Ginoo tungod han iya katadongan,

nagpasalamat ako;

magaawit ako hin pagdayaw,

han Gihahataasi nga Ginoo.