Kinaadman ni Solomon 13 - Samarenyo Meaning-Based Bible (1984)（MBBSAM）

Tinuyaw an Pagsingba han Gintuha nga mga Butang kan Kalibutan

1An bisan hin-o nga diri nakilala han Dyos tinuod nga lurong hiya. Ini nga mga tawo nakita han mag-upay nga mga butang nga naglilibot ha ira ngan diri lugod nakita han buhi nga Dyos. Ira gin-adman an mga butang nga iya ginhimo, kundi diri hira nakilala han naghimo hini nga mga butang.

2Ginhuhunahuna lugod nira nga an kadiyosan nga naghahadi han kalibutan amo an kalayo o hangin o bagyo o naglalakat nga kabiton-an o masulog nga tubig o dagko nga mga butang ha kahitas-an.

3Nalipay an mga tawo han katahom hini nga mga butang nga ira ginhunahuna nga mga kadiyosan, kundi angay unta nira hisabtan nga may-ada usa nga agaron ini nga mga butang ngan lurolabaw gud hiya kay ha ira ngatanan, kay amo hiya an nagtuha han katahom, ngan hiya an nagtuha hini nga mga butang.

4Tungod nga nahibuburong an mga tawo bahin han gahom hini nga mga butang, ngan han ira ginawian, angay unta makasabot hira tikang hini nga mga butang nga labaw pa hin kagamhanan an naghimo ha ira.

5Kon hinsasabotan ta an pagkadako ngan pagkatahom han mga ginbuhat, nahibabaro liwat kita hiunong han Magburuhat.

6Kundi bangin mahigpit kita hini nga mga tawo. Bangin tinuod nga naruyag hira hin pagbiling han Dyos, kundi waray la hira makaagi.

7Kay ginlilibotan hira han mga ginbuhat han Dyos; waray hunong an ira pagkinita hini nga mga butang tubtob nga tungod han pagkamatahom hini nga mga butang nga ira hinkikit-an, makasiring hira nga kadiyosan gud ini.

8Kundi waray la gihapon tinuod nga baribad ini nga mga tawo.

9Kon may-ada hira igo nga hibabroan hin pagpainoino hiunong han kinaiya han kalibutan, kay ano nga waray gud nira hiagii an Ginoo han ngatanan nga mga butang?

Katuyawan an Pagsingba han mga Diyosdiyos

10Kundi an labi hin kamakalolooy nga mga tawo han ngatanan, amo adton mga nagbutang han ira mga paglaom dida hin diri buhi nga mga butang, adton nagsisingba hin mga butang nga hinimo la hin mga kamot hin tawo—mga ladawan hin kamanampan nga ginhimo hin bulawan o salapi, o hin waray gamit nga bato nga gintigib hin usa ka tawo hadton mga tuig nga naglabay.

11In usa nga panday magpupulod hin kahoy, papanitan ini hin maupay, ngan katapos, pinaagi hin iya kabatid hini nga buhat, maghihimo hiya tikang hini nga kahoy hin usa nga ladawan nga magagamit niya hin mapulsanon nga tuyo.

12Titirokon niya an mga sipak nga mga salin han kahoy ngan gagamiton ini nga sungo hin pagluto, ngan malingkod hiya hin pagkaon nga malipayon.

13Kundi dida han mga salin nga kahoy makuha hiya hin usa ka tipak nga diri gud maupay para hin bisan ano nga paggamit—bangin baliko ini ngan luob hin mga buko—ngan paghihinayhinayon ini hin pagtigib ha kada kahuhuman han iya importante nga buhat ngada nga makahimo hiya hin ladawan hin tawo,

14o bangin hin usa nga waray pulos nga mananap. Ginpipintaran ini niya hin pula, basi katahoban an tagsa nga sayop han iya buhat.

15Niyan nag-aandam hiya hin usa nga burutangan ngan irinaraysang ini niya.

16Naghihirot hiya nga diri ini mahulog, kay maaram hiya nga usa la ini nga diyosdiyos nga nagkikinahanglan hin bulig; diri ini nakakabulig ha iya kalugaringon.

17Kundi diri hiya naawod hin pag-ampo ngada hini nga waray kinabuhi nga butang hiunong han iya pag-asawa, han iya mga anak, ngan han iya mga hiagi.

18Maluya ini, kundi nag-aampo hiya hini para hin maupay nga panlawas. Patay ini, kundi nag-aampo hiya para hin kinabuhi. Waray gud ini gin-agian ha kinabuhi, kundi nag-aampo hiya ngada hini hin pakibulig. Diri ini nakakalakat, kundi nag-aampo hiya para hin malamposon nga paglakaton.

19Waray gahom an mga kamot hini, kundi iya ginhahangyo nga buligan hiya ha iya pakabuhi, ha panalapi, ngan ha iya buruhaton.