2 Hadi 21 - Samarenyo Meaning-Based Bible (1984)（MBBSAM）

Naghadi han Juda hi Manases(2 Cron. 33:1-20)

1Dose ka tuig an panuigon ni Manases han kahimo niya nga hadi han Juda, ngan naghadi hiya ha Jerusalem hin 55 ka tuig. Iroy niya hi Hafsiba.

2Nakasala hiya han Ginoo. Nagsunod hiya han makapupungot nga mga ginawian han mga nasod nga ginpaiwas han Ginoo tikang han tuna samtang nasulong an iya mga tawo.

3Gin-ayad ni Manases an pagano nga mga dapit hin pagsingba nga ginruba ni Ezequias nga iya amay; gintindog niya in mga altar ha pagsingba kan Baal, ngan naghimo hin ladawan han diyosa nga hi Asera, sugad han ginbuhat ni Hadi Acab han Israel. Ginsingba liwat ni Manases an mga bitoon.

4Gintindog niya in pagano nga mga altar didto ha Templo, ha dapit nga iginsiring han Ginoo nga pagsisingbahan ha iya.

5Gintindog niya didto han duha nga mga libong han Templo in mga altar ha pagsingba han mga bitoon.

6Gintubyan niya ngan ginhalad nga tinubod an iya kalugaringon nga anak nga lalake. Ginmamit hiya hin diwata ug salamangka ngan nagpakiana hiya hin mga paratigo ngan mga espiritista. Nakasala hiya hin duro han Ginoo ngan gin-aghat niya an iya kasina.

7Iginbutang niya ha Templo an ladawan han diyosa nga hi Asera, didto han dapit nga iginsiring han Ginoo kan David ngan kan Solomon nga iya anak: “Dinhe hini nga Templo ha Jerusalem, amo an dapit nga akon ginpili tikang han ngatanan nga katunaan han 12 nga mga tribo han Israel, nga dapit nga pagsisingbahan ha akon.

8Ngan kon magsugot an mga tawo han Israel han ngatanan ko nga mga sugo, ngan magtuman han bug-os nga Balaod nga iginhatag ha ira ni Moises nga akon surugoon, diri ako matugot nga paiwason hira tikang han tuna nga iginhatag ko ha ira kaapoy-apoyan.”

9Kundi waray magsugot han Ginoo an mga tawo han Juda, ngan gintutdoan hira ni Manases hin pagbuhat hin darudagko nga mga sala kay han nabuhat han mga nasod nga ginpaiwas han Ginoo samtang nasulong an iya mga tawo.

10Nagsiring an Ginoo pinaagi han iya mga surugoon ngan mga manaragna,

11“Ginbuhat ni Hadi Manases ini nga makapupungot nga mga butang, mga butang nga labaw pa gud kamaraot han ginbuhat han mga Canaanhon; ngan gintutdoan niya hin pakasala an mga tawo han Juda pinaagi han iya mga diyosdiyos.

12Sanglit ihahatag ko, an Dyos han Israel, in sugad kadako nga karat-an ha Jerusalem ug Juda, nga mahititingala gud an bisan hin-o nga makabati hini.

13Kakastigohon ko an Jerusalem sugad han ginbuhat ko han Samaria, sugad han ginbuhat ko kan Hadi Acab han Israel ngan han iya mga tulin. Pupuohon ko an mga tawo han Jerusalem, waray mahisasalin, sugad kalimpyo hin plato nga ginhinisan ngan ginkulob.

14Pasasagdan ko an nahibibilin nga mga tawo, ngan itutubyan ko hira ha ira mga kaaway nga magbibihag ha ira ngan magtitikas han ira tuna.

15Bubuhaton ko ini ha akon mga tawo kay nakasala hira ha akon, ngan nag-aghat ha akon nga masina ako tikang pa han paggawas han ira kaapoy-apoyan ha Ehipto ngada hini nga adlaw.”

16Ginpatay ni Manases in damo hin duro nga mga tawo nga waray sala, nga binmaha hin dugo an mga kakalsadahan han Jerusalem; ginbuhat ini niya labot la han pagtutdoi niya han mga tawo han Juda hin pagsingba hin mga diyosdiyos nga nakapasala ha ira han Ginoo.

17Nahisurat dida han Kasaysayan han Kahadian han Juda an iba pa nga nabuhat ni Manases, lakip an mga sala nga ginbuhat niya.

18Namatay hi Manases ngan iginlubong hiya didto han tanaman ni Usa nga tanaman han palasyo, ngan sinmaliwan ha iya hin pagkahadi hi Amon nga iya anak.

Naghadi han Juda hi Amon(2 Cron. 33:21-25)

19Baynte dos an panuigon ni Amon han kahimo niya nga hadi han Juda, ngan naghadi hiya ha Jerusalem hin duha ka tuig. Iroy niya hi Mesolemit nga anak ni Harus, nga taga-Jotba.

20Nakasala hiya han Ginoo sugad kan Manases nga iya amay;

21ginsubad niya an mga ginawian han iya amay, ngan ginsingba niya an mga diyosdiyos nga ginsingba han iya amay.

22Ginsikway niya an Ginoo nga Dyos han iya kaapoy-apoyan, ngan ginsupak an mga sugo han Ginoo.

23Ginlingo hi Amon han mga opisyal niya, ngan ginpatay hiya didto ha palasyo.

24Kundi ginpatay han mga tawo han Juda an mga nagpatay kan Amon, ngan ginhimo nira nga hadi hi Josias nga iya anak.

25Nahisurat dida han Kasaysayan han Kahadian han Juda an iba pa nga nabuhat ni Amon.

26Iginlubong hi Amon ha lubnganan didto han tanaman ni Usa, ngan sinmaliwan ha iya hin pagkahadi hi Josias nga iya anak.