Kinaadman ni Solomon 16 - Samarenyo Meaning-Based Bible (1984)（MBBSAM）

1Sanglit angay nga pagsirotan ini nga mga tawo pinaagi hin sugad nga mga binuhat—pagsakiton hira pinaagi hin labi nga pagkadamo nira.

2Kundi waray mo, O Ginoo, pagsiroti an imo mga tawo ha sugad hini nga paagi; ginkalooyan mo lugod hira. Ginpadad-an mo hira hin mga tuhil nga tamsi nga kakaonon, usa nga talagsaon nga marasa nga pagkaon nga nakatambal han ira kagutom.

3Ginbuhat mo ini ngatanan basi an ginugutom nga mga magsiringba hin mga diyosdiyos, diri makakaon kay asay man nimo gindara ha ira an mga binuhat nga diri makakaon nira. Kundi an imo mga tawo waray la mag-iha hin pag-antos han gutom, ngan katapos nahiagom hira han gimauupayi nga pagkaon.

4Kinahanglan nga an mga magraogdaog mag-antos hin diri maiilob nga pagkinahanglan nira, samtang hinkit-an han imo mga tawo kon gin-unan-o, hin pagpakuri han ira mga kaaway.

5Han pagsulonga han imo mga tawo han makalilisang ngan magpintas nga mga halas nga nanmatay ha ira panaagi han kamalara han ira sugod, waray la pag-iha an imo kasina.

6Nadaliay la ini nga kakurian. Usa la ini nga pahimatngon. Niyan tinagan mo hira hin usa nga nakakatambal nga tigaman, an bronse nga halas, hin pagpahinumdom ha ira han ginkikinahanglan han imo Balaod.

7Kon natan-aw in usa ka tawo hadto nga tigaman, natatambal hiya han kinagtan han halas diri tungod han iya hinkit-an, kundi tungod ha imo nga amo an magtaralwas han ngatanan nga mga tawo.

8Tungod hini nga imo ginbuhat, imo liwat nakabig an amon mga kaaway nga ikaw amo an nagbabawi hin mga tawo tikang han tagsa nga karat-an.

9Nagkamatay an amon mga kaaway tikang han mga kinagtan hin mga duron ngan mga langaw; waray paagi nga hin-agian hin pagtambal ha ira, kay angay hira pagsirotan hin sugad nga mga binuhat.

10Kundi bisan an maglara nga mga halas waray makadaog han imo mga tawo, kay may-ada ka pagkalooy nga binmulig ngan nagtambal ha ira.

11Gintukob hira basi mahinumdom hira han imo mga sugo, kundi gintalwas mo hira dayon, basi diri mahingalimot hira ha imo ha kadayonan ngan diri hira kawarayan han imo kalooy.

12Waray tambal o iharaplos nga nakatambal ha ira. Nahibalik hira ha maupay nga panlawas pinaagi han imo pulong, O Ginoo, nga amo an pulong nga nagtatalwas han bug-os nga katawhan.

13May-ada ka gahom han kinabuhi ug kamatayon; nakakadara ka hin usa ka tawo ngadto ha ganggang han kamatayon ngan nakakabawi ka liwat, ha iya.

14Makakahimo in usa ka tawo nga maraot hin pagpatay han iya igkasi-tawo, kundi diri hiya makakabanhaw hin patay nga tawo o makakabawi hin usa nga kalag nga napriso didto ha tuna han mga patay.

Naigo an Ehipto hin Makaburungkag nga mga Bagyo

15Waray tawo nga makakalikay ha imo.

16Tan-awa adton mga diri natoo han Dyos: dinmiri hira hin pagkilala ha imo nga ikaw amo an Dyos, sanglit ginsirotan mo hira han imo dako nga gahom. Hin-abotan hira hin magpakalilisang nga uranos ngan hin mga bato nga yelo; ginpuo hira ngatanan pinaagi hin kalayo.

17An labi kaurosahon nga butang amo nga labis an paglaga han kalayo ha bawbaw han tubig nga unta amo an magsusubo han kalayo. Nakig-away an ngatanan nga kagamhanan han kalibutan hin pagpanalipod hadton mga magtadong.

18Ha usa nga dapit, naparong an mga laga, basi diri ini makapamatay han mga binuhat nga ginpadara hin pagsirot han mga diri natoo han Dyos. Kinahanglan mahibaro adto nga mga tawo nga gutiay na la hira hiabutan han imo paghukom.

19Kundi ha lain nga dapit, nga dida han ginlilibotan hira hin tubig, makalilisang an paglarab nga labaw pa han naglabay nga panahon, sanglit naugtang an mga abot han tuna nga nabuhian han mga tawo nga diri natoo han Dyos.

Tinagan hin Mana an mga Israelita

20Kundi ini nga karat-an waray mahinabo han imo mga tawo. Tinagan mo lugod hira han pagkaon hin mga anghel. Tikang ha langit ginpalusad mo in tinapay nga daan na inandam nga pagkaon, ngan diri na kinahanglan nga pag-andamon pa nira. An pagkaon nga ginhatag mo ha ngatanan nga mga tawo nakalipay ha ira, bisan kon ano an ayon han mga tawo.

21Nagpakita ini ngatanan han imo mahigugmaon nga pagmangno han imo mga anak. Nakapatunga adto nga pagkaon han ungara han tagsatagsa nga kinmaon hini; ginliwanan ini basi mahiangay han karuyag nga rasa han tagsa ka tawo.

22Hadto nga mga adlaw ordinaryo ini nga pagkaon nga natutunaw sugad hin yelo, kundi yana diri natutunaw bisan ha kalayo. Gintuyo ini hin pagtutdo han imo mga tawo nga an amo ngahaw nga kalayo nga nagpuo han mga abot han mga uma han ira mga kaaway ha panahon han makusog nga bunok hin uran ngan bato nga yelo,

23waray tugoti nga magpadayon hin pagsunog, basi magkamay-ada pagkaon an kalugaringon mo nga matadong nga mga tawo.

24Gintuha mo an bug-os nga kalibutan. Aada ini ha ubos han imo pagsugo. An bug-os nga mga binuhat nagamit han ira gahom hin pagsirot han diri magtadong nga mga tawo, kundi malumo ngan maloloy-on ini ngadto hadton mga nasarig ha imo.

25Ginagamit mo an imo mga binuhat ha magkalainlain nga paagi, basi hisabotan kon gin-uunan-o mo hin pagpakita han imo kamahinatagon nga pag-ataman han ngatanan nga nag-aampo ha imo.

26Nahinabo ini basi mahibaro an mga tawo nga imo ginhigugma, O Ginoo, nga diri hira ginpapakaon pinaagi han ira gintatanom. An imo pulong amo an nagbubuhi hadton mga nasarig ha imo.

27An pagkaon nga waray matubod han kalayo natunaw dayon han pagsiraki han syahan nga sidlit han adlaw.

28Pagtutdo ini ha amon nga kinahanglan bumangon kami nga diri pa nasirang an adlaw; hin pagpasalamat ha imo ngan pag-ampo ha pagsirang han adlaw.

29Kundi matutunaw sugad hin yelo an paglaom hin usa nga bungalos nga tawo, ngan mahupas sugad hin tubig nga diri ginagamit.