Sirac 21 - Samarenyo Meaning-Based Bible (1984)（MBBSAM）

An Sala

1Anak ko, nakasala ka ba? Ayaw na ini pagliwata ngan pangaro hin pasaylo tungod han imo nabuhat.

2Paglikyi an sala sugad hin pagpahirayo mo han halas. Kon dumuok ka, tutukbon ka hini sugad hin liyon ngan mapatay ka.

3An tagsa nga buhat nga nasupak han balaod nagbibilin hin samad nga diri nauupay, sugad hin gintigbas hin espada nga paluyo an tarom.

4Kon waray batasan ngan mapahitas-on in usa ka tawo, kawawad-an hiya han ngatanan nga iya hiagi.

5Kon nag-aampo an mga kablas, pinamamatian hira han Dyos ngan binabaton hin kadagmitan an ira mga pag-ampo.

6Nakakasala ka kon diri ka pumasaway; ngan magbabasol ka hin kinasingkasing kon may-ada mo pagkahadlok han Ginoo.

7Bangin bantogan in usa ka tawo nga maupay nga namumulong, kundi kon sayop hiya, mahisasabtan ini dayon hin maaram nga tawo.

8An tawo nga nagbabalay pinaagi hin inutang nga kwarta sugad la hin nagtitirok hin mga bato para han iya kalugaringon nga lubnganan.

9Sugad hin tinambak nga sungo in hugpo hin mga tawo nga waray pagtahod han Balaod; magkakasusunog hira.

10Mahamis ngan sinemento an dalan nga ginlalaktan han mga magpakasasala, kundi tipakadto ini ha tuna han mga patay.

Kinaadman ngan Kalurongan

11An bisan hin-o nga karuyag magtuman han Balaod kinahanglan mahibaro han kahulogan han Balaod. Magkakamay-ada ka kinaadman kon may-ada mo matuod nga pagkahadlok han Ginoo.

12Kinahanglan maaram ka basi mahibaro ka han mga butang; kundi may-ada tawo nga nagpapakamaaram, nga nakakapahangit la han mga tawo.

13An hibaro han makinaadmananon nga tawo sugad hin salog nga diri nahubas, sugad hin masulog nga sapa hin maupay nga mga sagdon.

14Ha luyo nga bahin, may-ada an lurong hunahuna nga sugad hin tibod nga may-ada buho; nawawara dayon an bisan ano nga iya hinbabaroan.

15Kon hinbabatian hin maaram nga tawo in usa nga maupay nga pagtutdo, nakakapukaw ini han iya pagsabot ngan nakakadugang ini hin iba nga bag-o nga mga hunahuna. Kundi kon hinbabatian ini hin usa nga tapang, diri ini hiya maruruyag, ngan iya gintatalinguha nga iya hingangalimtan ini dayon.

16An pamati han pulong hin usa nga lurong sugad hin paglakat nga may mabug-at ka nga binaba, kundi usa nga kalipay an pamati hin tawo nga maaram.

17An katig-oban maruruyag pamati hin tawo nga maaram ngan kakarawaton gud hin tinuod an iya mga pulong.

18Para hin tawo nga tapang, waray la gamit an kinaadman sugad la hin balay nga naruba. Waray gud ngani niya paghunahunaa mahitungod han mga butang nga iya hinbabaroan.

19Para hin usa nga lurong, an pag-aram sugad hin mga posas,

20-21kundi para hin maaram sugad ini hin mga pulseras nga bulawan. Diri hinsasabotan an paghiyom han tawo nga maaram, kundi an lurong nag-aaningal kon natawa hiya.

22-23An tawo nga lurong makadto han porta hin balay ngan mahiling ngan masakob dayon, kundi nahulat la ha gawas an tawo nga maupay an batasan ngan may-ada pagtahod.

24Maraot nga batasan an paghiling ha mga porta, ngan maawod hin pagbuhat hini an tawo nga maupay an panggawi.

25An mga napakamaaram nagyayakan hiunong hin mga butang nga waray nira labot, kundi gintitirutimbang han mga mag-aram an ira mga pulong.

26Ginyayakan dayon han mga lurong an bisan ano nga nasakob ha ira hunahuna; namumurubuot anay an mga mag-aram han ira iginhihimangraw.

27Kon an maraot nga tawo nagtutunglo han iya kaaway, nagtutunglo la hiya ngahaw han iya kalugaringon.

28Ginhuhugawan hin usa nga paralibak an iya kalugaringon nga pagkatawo ngan nakontra ha iya an ngatanan niya nga kahigrani.