Judit 14 - Samarenyo Meaning-Based Bible (1984)（MBBSAM）

Nagplano hi Judit

1Niyan nagsiring ha ira hi Judit, “Kasangkayan ko, alayon hin pagsunod han akon sagdon. Ha pagkaaga dad-a ini nga ulo ngan bitaya ini didto han pader han bungto.

2Pagtudlok kamo hin usa nga pangulo para ha iyo ngahaw, ngan ha pagsirang han adlaw padad-a han ira mga hinganiban an ngatanan niyo nga kalalaken-an nga mag-upay an panlawas ngan paupda hiya ha iyo ha paggawas han bungto, nga daw sugad hin tilugsong hira ngadto han kahamub-an hin pagsulong han Asiriahanon nga barantayan.

3Kakaptan han mga Asiriahanon nga mga gwardya an ira mga hinganiban ngan magdadagmit hira ngadto han kampo hin pagpukaw han ira mga opisyal. Magdadadlagan an mga opisyal ngadto han tulda ni Holofernes, kundi diri nira hiaagian hiya ngan mahahadlok an bug-os nga kasondalohan ngan maisol hira samtang nasulong kamo ha ira.

4Niyan makakahimo kamo ngan an ngatanan nga iba nga mga Israelita hin paglanat ngan pamatay ha ira samtang nangangalagiw hira.

5Kundi ha diri pa niyo pagbubuhaton in bisan ano hini, pakanhia ha akon hi Aquior nga Amonitanhon. Karuyag ko hibaroan kon nakilala hiya kan Holofernes nga amo an naghimangraw hin pagbiay-biay han Israel ngan nagpadara nganhi ha aton kan Aquior, kay an iya hunahuna nga mapatay hiya upod han iba ha aton.”

Nakabig hi Aquior

6Sanglit gintawag nira hi Aquior tikang han balay ni Uzias. Kundi han pag-abot niya ngan pagkita han ulo ni Holofernes didto han mga kamot han usa han mga tawo, nalinop hi Aquior ngan natumba ha salog.

7Han pagbuligi nira ha iya hin pagtukdaw, yinmukbo hi Aquior ha tiilan ni Judit ha paghatag hin katalahoran. Nagsiring hiya, “Pagdayawon ka unta han ngatanan nga mga panimalay ha Juda, ngan mangurog unta hin kahadlok an tagsa nga nasod kon makabati hira han imo ngaran.

8Alayon hin pagsumat ha akon kon gin-unan-o mo hin pagbuhat hini.”

Samtang nag-aalirong an mga tawo, iginsumat ha iya ni Judit an ngatanan nga iya ginbuhat tikang han adlaw han pagbaya niya han bungto tubtob hito nga takna.

9Han kahuman niya pagsusumaton, nagrayhak ha dako gud nga tingog an mga tawo, nga nag-aningal an bug-os nga bungto han aringasa hin kalipay.

10Han pakabati ni Aquior han ngatanan nga ginbuhat han Dyos han Israel, nahimo hiya nga usa nga marig-on nga matinuohon. Gintori hiya ngan ginhimo nga usa nga kaapi han bungto nga Israelita, sugad man an iya mga tulin ngada yana nga mga adlaw.

Nagkalilisang didto han Kampo ni Holofernes

11Han pagkaaga ginbitay han mga Israelita an ulo ni Holofernes didto han pader han bungto. Nagdara hira ngatanan han ira mga hinganiban ngan nagkagawas hira ha tagsatagsa nga hugpo ngadto han mga bakilid ha atubangan han bungto.

12Han pakakita han mga Asiriahanon han nahinabo, nagpatugon hira han ira mga opisyal, ngan nagsumat hira han nahinabo ngadto han ira mga labaw.

13Sanglit kinmadto ini nga mga tawo han tulda ni Holofernes ngan ginsiring hi Bagoas, “Pukawa an heneral! Nagpasipara ini nga waray mga gamit nga Israelita hin paglugsong tikang han bukid hin pagsulong ha aton; ira ini tinuyoan nga ira pagkapukan.”

14Sinmulod hi Bagoas ngan pinmakpak ha atubangan han higdaan nga kwarto han tulda, kay an iya hunahuna nga dinmirig hi Holofernes kan Judit.

15Tungod nga waray man may binmaton, binuksan niya an biray ngan sinmulod hiya, ngan didto iya hin-agian an lawas nga waray ulo, nga naunat ha bawbaw hin usa nga tapangko.

16Ginmoliat hi Bagoas. Kinmurinit hiya, ginggisi niya an iya mga panapton, ngan nagtikang hin pagnguyngoy ngan pagtangis.

17Sinmulod hiya han tulda ni Judit, kundi waray gud hiya hiagii niya. Nagdagmit hiya hin paggawas ngan ginmoliat ngadto han mga opisyal,

18“Ginlimbongan kita nira! Ginpakaalohan hin usa nga Israelita nga babaye an bug-os nga ginhadian ni Nabucodonosor. Tan-awa niyo didto! Nalunay ha tuna hi Holofernes ngan waray na an iya ulo!”

19Han pakabati hini han mga opisyal, ginggisi nira ha kabido an ira mga panapton; ngan nagkalilisang na hira ngatanan ngan hinbatian ha bug-os nga kampo an malanoy nga mga pagtangis ngan mga gogliat.