Tobit 13 - Samarenyo Meaning-Based Bible (1984)（MBBSAM）

Nagkanta hin Pagdayaw hi TobitNiyan nag-ampo hi Tobit:

1“Pagdayawon an waray kataposan nga Dyos,

pagdayawon hiya nga naghahadi.

2Iya ginkakastigo kita; niyan kinakalooyan liwat kita niya.

Ginpalusad kita niya ngadto han kalibutan han mga patay,

niyan ginbabayaw kita niya tikang ha lubnganan.

Waray tawo nga makakalikay han iya gahom.

3“Mga tawo han Israel, pagpasalamat kamo ha mga kanasoran,

diin iya ginpadara kamo ngadto ha pagkabihag;

4bisan didto iya ginpakita an iya dako nga gahom.

Pabatia an ngatanan nga mga buhi han pagdayaw ha imo.

An Ginoo amo an aton Dyos ngan amay ha kadayonan.

5“Bisan kon ginkastigo kamo tungod han iyo pagkamaraot,

maloloy-on hiya ha iyo ngan ig-uuli kamo

tikang han mga nasod diin ginpasarang kamo niya.

6“Balik kamo ngadto ha iya ha bug-os niyo nga kasingkasing ug kalag,

pag-ukoy hin kinabuhi dida hin pag-ugop ngan pagsugot ha iya.

Niyan mabalik hiya ngada ha iyo hin pagbulig ha iyo

ngan diri na hiya matago.

Hinumdomi niyo an ginbuhat han Dyos para ha iyo

ngan pagpasalamat kamo ha bug-os niyo nga kasingkasing.

Pagdayawa an matadong nga Ginoo;

pagpasidunggi an waray kataposan nga Hadi.

“Bisan kon nag-uokoy ako ha pagkabihag

didto hin usa nga langyaw nga tuna,

magpapasalamat ako han Ginoo

ngan maghihinabi ako han dako niya nga kusog ngadto hin usa nga nasod hin mga makasasala.

Talikdi an iyo mga sala ngan buhata an nakakalipay han Dyos!

Bangin pa magmalumo hiya ngan malooy hiya ha iyo!

7“Nagdadayaw ako han akon Dyos ngan nagrarayhak han iya pagkaharangdon;

nagpapasidungog an akon kalugaringon han Hadi ha langit.

8“Igsumat han ngatanan an iya pagkaharangdon

ngan ikanta ha ira an mga pagdayaw ha iya didto ha Jerusalem.

9“Jerusalem an Baraan nga Syudad han aton Dyos,

pagsisirotan ka niya tungod han mga sala han imo mga tawo,

kundi maloloy-on hiya han ngatanan nga nagbubuhat han matadong.

10Sanglit pagpasalamat han Ginoo kay maupay hiya.

Pagdayawon an waray kataposan nga Hadi.

Babag-ohon hin pagtindog an imo Templo,

ngan magmamalipayon na liwat an imo mga tawo.

“Paglipayon unta han Ginoo an ngatanan nga imo mga bihag,

pagmangnoan unta niya an imo nag-aantos nga mga tawo

samtang nga nagpapadayon pa an panahon.

11“Jerusalem, magmamalamrag an imo kapawa para han bug-os nga tuna,

ngan tikang ha kahigrayoan mapakada ha imo in damo nga mga nasod.

Makada an ira mga tawo hin pagpasidungog han Ginoo nga imo Dyos,

magdadara hira hin mga upa para han Hadi han langit.

Dida han imo kakalsadahan magkakanta hin malipayon nga pagdayaw in damo nga mga katulinan,

magpapadayon ha kadayonan an imo ngaran sugad nga pinili nga syudad han Dyos.

12Gagabaan an ngatanan nga magtarhog ha imo,

an ngatanan nga magbungkag ha imo ngan magruba han imo mga pader,

an ngatanan nga magrumpag han imo mga torre ngan magsunog han imo kabablayan.

Kundi pagpapakaupayon ha kadayonan an ngatanan nga magpapasidungog ha imo.

13“Pagrayhak, Jerusalem, tungod han imo matadong nga mga tawo;

pagtiroka hira tikang ha pagkabihag

hin pagdayaw han Ginoo ha dayon nga mga katuigan.

14“Malipayon an ngatanan nga nahigugma ha imo ngan nalilipay hin pagkita ha imo nga mainuswagon.

Adton mga masulob-on tungod han imo gin-antos yana,

may adlaw nga magmamalipayon hira;

magdadara ha ira hin dayon nga kalipay an imo pagkamalipayon.

15“Gindadayaw ko an Ginoo nga gamhanan nga Hadi

16babag-ohon an pagtindog han Jerusalem ngan iya na ini urokyan ha kadayonan.

“Jerusalem, magmamalipay gud ako kon makakita han imo kamaanyag an akon mga tulin

ngan magpapasalamat han Hadi han langit.

“Pagtitindogon an imo mga ganghaan hin mga sapiro ngan mga esmeralda,

ngan an ngatanan mo nga mga pader hin mga mahal nga mga bato.

Paghihimoon hin bulawan an imo mga torre,

ngan hin puraw nga bulawan an imo mga balwarte.

17Babawbawan hin mga rubi ngan mahal nga mga alahas an imo kakalsadahan.

18Malanoy in malipayon nga mga kanta tikang han imo mga ganghaan,

ngan tikang han imo kabablayan magoliat an mga tawo,

‘Pagdayawon an Ginoo! Pagdayawon an Dyos han Israel!’

“Jerusalem, bebendisyonan han Dyos an imo mga tawo,

ngan pagdadayawon nira ha kadayonan an iya baraan nga ngaran.”

Pinaagi hini nga mga pulong gintapos ni Tobit an iya kanta hin pagdayaw.