Job 33 - Samarenyo Meaning-Based Bible (1984)（MBBSAM）

1Ngan yana, Job, pamatii hin maupay an ngatanan nga akon igsisiring.

2Andam na ako hin pagyakan han aadi han akon hunahuna.

3Tangkod an ngatanan ko nga mga pulong,

ngan nagyayakan ako han kamatuoran.

4Ginhimo ako ngan gintagan hin kinabuhi han espiritu han Dyos.

5Batona ako kon makakahimo ka. Andama an imo mga pangatadongan.

6Ikaw ug ako waray kalainan ha atubangan han Dyos,

kita nga duha ginhimo tikang hin lapok.

7Sanglit diri ka angay mahadlok ha akon;

diri ko ikaw pagraraogdaogon.

8Iini an akon hinbatian nga imo siring:

9“Diri ako salaan; waray ko nabuhat nga sayop.

Inosente ako ngan waray ko sala.

10Kundi namimiling hin mga pasangil an Dyos hin pagkontra ha akon,

ngan gin-iisip ako niya sugad hin usa nga kaaway.

11Kinakadenahan niya an akon mga tiil;

binabantayan niya an tagsa ko nga pagkiwa.”

12Kundi, Job, pagsusumatan ko ikaw nga sayop ka.

Labaw gud an Dyos kay han bisan hin-o nga tawo.

13Kay ano nga ginsasala mo an Dyos nga diri hiya nabaton han mga sumbong hin usa ka tawo?

14Bisan kon nagbalikbalik an Dyos hin pagyakan,

waray namamati ha iya.

15Ha gab-i kon nangangaturog na an mga tawo,

naghihimangraw an Dyos pinaagi hin mga inop ngan mga panan-awon.

16Gintitinguha niya nga mamati hira han iya iginyayakan,

ngan nahahadlok hira han iya mga pahimatngon.

17Naghihimangraw an Dyos basi umukoy na hira hin pagpinakasala,

ngan basi matalwas hira tikang han pagkamapinahitas-on.

18Diri hiya matugot nga mapukan hira;

gintatalwas hira niya tikang han kamatayon.

19Sinasaway han Dyos in usa ka tawo pinaagi hin paghatag ha iya hin sakit ngan pagpaul-oli han iya lawas.

20Nawawad-an hin gana an masakit nga tawo,

ngan masukasuka para ha iya bisan an girarasahi nga pagkaon.

21Naggiginasa hin duro an iya lawas;

hinkikit-an mo an ngatanan niya nga mga tul-an;

22tikaradto na hiya han kalibutan han mga patay.

23Bangin kumanhi in usa nga anghel hin pagbulig ha iya—

usa han mga yinukot nga mga anghel han Dyos,

nga nagpapahinumdom han mga tawo han ira katungdanan.

24Tungod hin kalooy, masiring an anghel, “Buhii hiya!

Diri hiya malusad ngadto han kalibutan han mga patay.

Iini an lukat han pagtalwas ha iya.”

25Magtitikabata ngan magtitikakusog na liwat an iya lawas;

26kon mag-ampo hiya, mabaton ha iya an Dyos;

pagsisingbahon niya nga malipayon an Dyos;

para ha iya pagtatadongon na liwat han Dyos an ngatanan nga mga butang.

27Magtutug-an hiya ha atubangan han mga tawo, “Nakasala ako.

Waray ko pagbuhata an matadong, kundi gintalwas ako han Dyos.

28Ginpugngan ako niya hin pagkadto han kalibutan han mga patay,

sanglit buhi pa ako gihapon.”

29Agsob pagbuhaton han Dyos ini ngatanan;

30tinatalwas niya an kinabuhi hin usa ka tawo,

ngan tinatagan hiya han kalipay hin matadong nga kinabuhi.

31Job, pamatii an akon iginyayakan;

paghilom ngan payakna ako.

32Kundi kon may-ada nimo igsisiring, pabatia ako hini;

kakarawaton ko nga malipayon nga waray ka sayop.

33Kundi kon diri, paghilom ngan pamatii ako,

ngan pagtututdoan ko ikaw hin pagkamakinaadmananon.