Sirac 27 - Samarenyo Meaning-Based Bible (1984)（MBBSAM）

1Damo in mga tawo nga nakasala tungod hin pamiling hin ganansya. Kon karuyag ka nga magriko, kinahanglan nga tabunan mo an imo mga mata.

2Makuri hin paggabot hin igintusok ha butnga hin duha nga bato hin balay ngan sugad gud kamakuri an pagkuha han kamalimbong dida ha pagpalit ngan pagbaligya.

3Labot kon hugot an imo hunahuna dida hin kahadlok han Ginoo, an imo balay magugun-ob ngan madadat-ogan ka.

An Aton Pagyakan Nagpapakita han Matuod nga mga Pagbati

4Kinikita an mga sayop han tawo dida han iya pagyakan. Sugad ini hin pagsara diin nahilalain an hugaw.

5An imo panhunahuna magpapakita han imo kinaiya sugad nga dida han hudno hikikit-an an karat-an han mga daba nga ginbabangga.

6Hisasabotan kon maupay ba an pagtimangno han kahoy pinaagi han iya mga bunga ngan makakasabot ka han pagbati han tawo pinaagi han iya pagpahimutang hini nga iya pagbati.

7Ayaw gud pagdayaw bisan kan kanay kon diri ka anay makabati han iya pagyakan; amo ini an tinuod nga pagsari ha iya.

An Diri Malimbong nga Tawo

8Kon magtalinguha ka hin diri kamalimbong, makakahimo ka ngan makakaupay ini han imo kinaiya sugad nga an mahusay nga bado nakakaupay han pagkita ha imo han mga tawo.

9An mga tamsi nakikig-usa han iya igkasitamsi ngan adton nagtatalinguha hin diri paglimbong maaara hin diri paglimbong.

10Naghuhulat an sala hadton nangingita hin higayon hin pakasala, sugad nga an liyon naghuhulat han iya kakaonon.

An Binuang nga Karukayakan

11Kon magyakan in tawo nga nakilala han Dyos, suloran iton iya mga pulong; kundi an buang nga tawo magyayakan ngan natipa han iya hunahuna.

12Kon mahitampo ka hin mga lurong nga tawo, pamiling hin pasangil hin paglakat, kundi kon tampo ka hin mga tawo nga may-ada buot, awil hin pakig-usa ha ira.

13An mga susumaton hin mga lurong nga tawo maraot ha talinga pamation ngan ira hinihimo nga intremis an ira mangil-ad nga mga sala.

14Kon ini nga mga tawo magpakaraot, mamamarihayaw an imo buhok ngan kon magpapalarolantugi hira, an maupay buhaton amo an pagsarop han imo mga talinga.

15Mabug-on ha dughan an pamati han ira pagpinakaraotay ngan ini nga maraot nga pulong danay pinapadisan hin kusog.

An Pagbuyagyag hin mga Tinago

16Kon imo igbuyagyag in mga tinago nga iginsumat ha imo, mawawad-an hin pagtapod ha imo an iba nga mga tawo ngan mawawaray ka na suok nga sangkay.

17Tahura an imo kasangkayan ngan tapod ha ira. Kon paglingoon mo an pagtapod han imo sangkay ha imo, gabay ka lugod mangalimot nga may-ada ka sangkay.

18Ginpatay nimo an iyo kamagsangkay sugad nga kinmuha ka hin sundang ngan imo patayon an imo kaaway.

19Waray na an imo sangkay. Diri ka na makakabalik ha iya sugad nga diri ka na makakapabalik hin tamsi ngada ha imo kamot kon imo ini buhian.

20Ayaw na kalisang hin pamailing ha iya. Orhe ka na kaupay. Nawara na hiya sugad hin bugsok nga nakalusot han bitik ha iya.

21Mahihimo nga mabutok an mga samad ngan mahihimo nga pasayloon an mga pagpakaalo, kundi kon maglingo ka han pagtapod ha imo han imo sangkay, waray nimo sadang paglaoman.

An Kamalabyaw

22Kon may-ada magkiniro ha imo, may-ada niya maraot nga hunahuna ngan waray makakasaway ha iya.

23Kon upod hiya ha imo, maupay iton iya mga pulong. May pag-uyon niya han imo mga pulong. Kundi ha imo talikoran, lain an iya bubuhaton. Kakarawaton niya an imo pulong kundi gagamiton niya hin pagsupak ha imo.

24Waray butang dinhe ha kalibutan nga dinidirian ko kay hin usa ka tawo nga sugad hini—ug an Ginoo madiri liwat ha iya.

25Tadonga an paglabay hin bato ha igbaw ngan maumban ini ha imo ulo. Kusga an pagsuntok ngan masasamad ka.

26An tawo nga nagbubutang hin bitik amo la ngahaw hiya an hisasakban.

27An tawo nga magpadaot han iba, madadaot tungod han ira maraot nga buhat ngan diri ngani mahibabaro kon kay ano hin kasugad hini.

28An malabyaw nga tawo nagpapakaalo han iba ngan nagbibiaybiay ha ira, kundi may-ada tawo nga sugad hin liyon, naghihinulat hin higayon hin pagbulos ha ira.

29Adton malipayon hin pagkita han kapukan han mga tawo nga natoo han Dyos mahuhulog ngadto hin bitik ngan an masakit nga kamatayon amo an magpapatay ha iya.

30An kasina ug an kamapaso ha ulo makalilisang nga mga butang ngan aada ini nga duha han makasasala.