Tobit 10 - Samarenyo Meaning-Based Bible (1984)（MBBSAM）

Nabaraka hira Tobit ug Ana

1Hito liwat nga panahon, nag-iinihap hi Tobit adlaw-adlaw kon pira ka adlaw an kinahanglan hin paglakaton tipakadto ngan tipauli tikang ha Rages. Han paglabay na han panahon nga igintalaan hin pagbalik ngan waray pa bumalik an iya anak, nagsiring han iya asawa hi Tobit,

2“Ano daw la an nakalangan ha iya? Ano ba an imo hunahuna, patay na ba hi Gabael? Bangin waray na may mahatag ha iya han kwarta.”

3Duro an kabaraka ni Tobit.

4Niyan nagsiring hi Ana, “Patay na an akon anak. Diri gud ikakaglirong ini.” Nagtikang hiya hin pagtangis ngan pagmasulob-on tungod kan Tobias,

5“O anak ko nga kalipay han akon kinabuhi, kay ano nga tinugotan ko man ikaw hin pagbaya ha balay?”

6Nagtalinguha hi Tobit hin pagliaw ha iya. Nagsiring hiya, “Ayaw kalisang, mahal ko; ayaw kabaraka! Maghihingaupay gad hiya. Bangin may-ada la butang nga diri kapugngan nga nakapalangan ha ira; sanglit diri hira makakauli ha gintalaan ta nga adlaw. Labot pa an kaupod niya usa nga katataporan nga tawo ngan uropod naton. Ayaw pagkinabido hin duro tungod ha iya. Waray ruhaduha nagtitipakanhi na hiya.”

7Kundi binmaton hiya, “Ayaw hin aringasa ngan pabay-i la ako! Ayaw ako pagtuyawa. Patay na an akon anak.” Kada adlaw nagdadagmit hiya paggawas han balay ngadto han dalan nga gin-agian ni Tobias, ngan ginhuhulat niya tubtob han katunod han adlaw. Diri gud hiya napaliaw bisan kan kanay, ngan ha pag-uuli niya ha balay, nagtitinangis ngan nagmamabidoon hiya tungod han iya anak ha bug-os nga gab-i hin waray pagkaturog.

Linmakat tikang ha Ecbatana

Natapos an duha ka semana nga kombite han pagkasal nga ginsaad ni Raguel hin paghawid kan Sara nga iya anak. Sanglit kinmadto hi Tobias kan Raguel ngan naghangyo, “Tugoti na gad ako hin pag-uli yana. Nasisiguro ko nga nagturaw na an akon mga kag-anak nga igkikita pa ako nira. Hala gad, itay, tugoti na ako hin pag-uli ngadto han akon amay. Ginsumatan ko man ikaw han ira kahimtang han pagbayai ko ha ira.”

8Kundi binmaton hi Raguel, “Pabilin anay, anak ko. Pabilin dinhe upod ha akon. Magsusugo ako hin mga surugoon ngadto kan imo tatay hin pagsumat ha iya nga maupay an imo kahimtang.”

9Kundi nagpirit hi Tobias, “Ayaw, diri na ako maglalangan! Tugoti na gad ako hin pagbalik ngadto han akon amay.”

10Sanglit ginhatag ni Raguel kan Tobias hi Sara nga iya asawa hin waray na paglangan. Iya liwat iginhatag kan Tobias an katunga han ngatanan nga iya manggad: mga oripon, mga baka, mga karnero, mga asno, mga kamelyo, mga panapton, kwarta ngan mga garamiton.

11Ginggakos ni Raguel hi Tobias ngan ginpagikan hira upod an iya pagbendisyon, “Maupay na la nga iyo paglakat, anak ko. Mawaray unta kataragman ha iyo paglalaktan. An Ginoo han langit manalipod unta ha imo ngan kan Sara. Ngan mabuhi pa unta ako hin pagkita han iyo mga anak.”

12Niyan nagsiring hi Raguel kan Sara, “Upod ikaw han imo bana ngan pag-ukoy didto han balay han iya mga kag-anak. Tikang yana imo na hira mga kag-anak sugad ha amon ngan hi imo nanay. Hibatian ko unta in mag-upay la nga mga butang hiunong ha imo samtang buhi pa ako.” Katapos niya panamilit, ginpalakat hira.

Niyan nagsiring hi Edna kan Tobias, “Tobias nga mahal ko nga anak, paulion ka unta han Ginoo nga waray ano man nga hinabo. Ngan tugotan unta niya nga mabuhi pa ako hin pagkita han iyo mga anak. An Ginoo amo an akon saksi, akon itinutubyan ha imo hin pagmangno an akon anak. Ayaw gud, ha bisan san-o nga panahon han imo kinabuhi, pagbuhat hin bisan ano nga magsasamad han iya kasingkasing. Maupay na la nga imo paglakat, Tobias. Tikang yana imo na asawa hi Sara ngan imo na ako iroy. Magmainuswagon unta kita ngatanan samtang mga buhi pa kita.” Niyan hinadkan ni Edna hira nga duha ngan ginpalakat hira upod an pag-ampo nga waray unta mahinabo nga maraot ha ira.