2 Macabeo 8 - Samarenyo Meaning-Based Bible (1984)（MBBSAM）

Sinmupil hi Judas Macabeo(1 Mac. 3:1-26)

1Nagsudoy hin hilom hira Judas Macabeo ngan han iya kasangkayan tikang ha usa ngadto hin lain nga baryo tubtob han pakatirok nira hin mga 6,000 nga Judiyo nga kalalaken-an nga nagpabilin hin kamatinumanon han ira tuloohan.

2Ginhangyo nira an Ginoo nga buligan niya an iya mga tawo nga gintatamaktamakan na han ngatanan nga kanasoran, nga kalooyan niya an Templo nga ginhugawan na han mga pagano,

3ngan kalooyan niya an Jerusalem nga ginbungkag na ngan haros ginpanas na ha tuna.

4Ira liwat ginhangyo an Ginoo nga ipakita an iya kapungot han karat-an pinaagi hin pagbulos hadton mga nagpipinamatay han iya mga tawo hin waray kalooy labi na adton mga inosente nga kabataan, ngan nagpipinakaraot han Ginoo.

5Han katindog na ni Judas han iya kasondalohan, waray makaato ha ira an mga Hentil, kay nahimo na nga kalooy an kasina han Ginoo kontra han Israel.

6-7Ginbuhat ni Judas in tigda nga mga pagsulong dida han mga bungto ngan mga baryo ngan ginsunog ini niya. Naagaw niya in mga dapit nga maupay para hin pakig-away ngan ginpuo niya in damo nga kaaway nga mga kasondalohan, ngan hinbaroan nga madinaogon hira kon gab-i an pagsulong. Naghiruhimangraw an mga tawo ha ngatanan nga dapit hiunong han iya pagkamaisog.

Ginsugo ni Tolomeo hi Nicanor hin Pagsulong han Judea(1 Mac. 3:38-41)

8Han pagsabot ni Felipe, an gobernador han Jerusalem, nga agsob na an pagdinaog ni Judas ha magkalainlain nga mga dapit, nagsurat hiya kan Tolomeo, an gobernador han Siria Mayor, ngan naghangyo han iya pagbulig hin pagpanalipod han mga hiagi han hadi.

9Gintudlok dayon ni Tolomeo hi Nicanor, an anak ni Patroclo, nga usa liwat han mga gisusuoki nga kasangkayan han hadi, ngan ginsugo hiya upod in kapin 20,000 nga kasondalohan han magkalainlain nga mga nasod, hin pagpuo han bug-os nga tulin nga Judiyo. Gintudlok liwat ni Tolomeo hi Gorgias, an usa nga heneral nga dako na an kaagi ha kinabuhi hin pagkasondalo, hin pag-upod ha iya.

10May utang hi Hadi Antioco ha mga Romano nga 68,180 ka kilo nga salapi; naghunahuna hi Nicanor hin pagbayad hini nga utang pinaagi hin pagbaligya hin Judiyo nga mga bihag han araway sugad nga mga oripon.

11Sanglit nagpatugon hiya dayon ngadto han mga bungto ha ligid han dagat, hin pagpahibaro ha ira nga magbabaligya hiya hin mga Judiyo hin ubos hin usa ka kilo nga salapi an kada usa. Kundi waray hiya mahibaro han hukom nga gin-andam ha iya han Dyos nga Labi Kamakagarahum.

Hinbaroan ni Judas an mga Plano ni Nicanor(1 Mac. 3:42-54)

12Nahibaro hi Judas nga nagkalakat tipakadto ha Judea hin pagsulong hi Nicanor upod an iya kasondalohan, sanglit ginsumatan niya an iya mga tawo.

13May-ada magtalaw ha ira ngan waray tumoo han katadongan han Dyos, ngan nagdadlagan hira hin pagpahirayo ha labi nga kalaksi sugad han ira mahimo.

14Kundi an iba nagbaligya han ngatanan nga nahisalin pa nga ira katigayonan basi pag-isipon hira han Ginoo nga takos hira pagtalwason tikang kan Nicanor, an tawo nga diri natoo han Dyos, nga daan na nagbaligya ha ira nga mga oripon nga waray pa ngani mahinabo an away.

15Nag-ampo hira nga kon diri pagbuot han Dyos hin pagbuhat hini tungod la ha ira ngahaw, bangin maruyag hiya hin pagtalwas ha ira tungod han mga ginsaaran nga iya ginhimo ha ira kaapoy-apoyan, ngan tungod kay dako ngan makatarag-ob an Dyos amo hiya an nagtawag ha ira nga iya mga tawo.

16Gintirok ni Judas an ngatanan nga 6,000 niya nga mga tawo ngan gindasig hira nga diri mahadlok o kumalagiw hin kalisang kon makakita hira han damo nga Hentil nga kasondalohan nga nasulong ha ira hin waray la hinungdan. Nagmaisog lugod hira ha ira pakig-away,

17ngan waray gud hira mahingalimot han mga pagtalapas nga ginbuhat han mga Hentil kontra han Templo ngan han makalilisang nga pagpaantos nira han Jerusalem ngan han pagparaa nira han Judiyo nga mga pamatasan.

18“Natapod hira han ira mga hinganiban ngan han ira kaisog,” nagsiring hi Judas, “kundi nasarig kita han Dyos nga Labi Kamakagarahum, nga nakakahimo hin pagbungkag diri la hini nga mga kasondalohan, kundi, kon kinahanglanon pa ngani, han bug-os nga kalibutan, pinaagi hin usa la ka pagtangdo.”

19Ngan nagpadayon hi Judas hin pagpahinumdom ha ira han mga paagi nga ginamit han Dyos hin pagbulig han ira kaapoy-apoyan: han panahon ni Senaquerib 185,000 han kaaway an pinamatay;

20ngan nakausa didto ha Babilonia 8,000 nga mga Judiyo in kinmadto hin pagbulig hin 4,000 nga mga taga-Macedonia, nga ginpirde nira in 120,000 nga mga taga-Galacia ngan ginkuha in damo nga mga tinikas, ngan nahimo ini ngatanan tungod han pagbulig ha ira han Dyos.

Ginpirde ni Judas hi Nicanor(1 Mac. 3:55–4:27)

21Nakadasig an mga pulong ni Judas han iya mga tawo ngan nakahimo ini ha ira nga andam hin pagpakamatay para han ira tuloohan ngan han ira nasod. Sanglit iya ginbahin an iya kasondalohan ngadto hin upat ka batalyon,

22nga may-ada mga 1,500 ka tawo an kada usa, nga an kada batalyon itinapod hin usa ha ira—hiya, hi Simon, Jose, ug Jonatan nga iya kabugtoan.

23Katapos niya pagsugoa kan Eleazar hin pagbasa ha dako nga tingog tikang han baraan nga basahan, iya ginhatag han iya mga tawo an goliat hin pakig-away nga nasiring: “Bubuligan kita han Ginoo,” ngan hiya ngahaw an maglugaring hin pagsulong kontra kan Nicanor.

24Nakig-away ugop ha ira an Dyos nga Labi Kamakagarahum, ngan ira pinamatay in kapin 9,000 nga mga kaaway. Ira ginsamad in damo pa ha ira ngan nangalagiw an bug-os nga kaaway nga kasondalohan.

25Ira gin-agaw an kwarta tikang han mga tawo nga nagkaabot hin pagpalit ha ira nga mga oripon. Niyan hinmarayo hira hin paglanat han ira mga kaaway, tubtob nga binmalik na la hira,

26kay matikang na an Adlaw nga Iparahuway.

27Han pagtiroka nira han mga hinganiban han kaaway ngan pagtikasi han mga patay, ira ginsaurog an Adlaw nga Iparahuway dida hin pagdayaw han Ginoo ngan pagpasalamat ha iya, kay natalwas hira hito nga adlaw ngan iginhatag ha ira an syahan nga tigaman han iya pagkalooy.

28Han katapos na han Adlaw nga Iparahuway, ira iginhatag an iba han mga tinikas ngadto han mga naunong tungod han pagpakurii ha ira, ngan ngadto han mga balo nga kababayen-an ngan mga ilo; niyan an nahisalin ira ginbahinbahin para han kalugaringon nira nga mga panimalay.

29Katapos hini nagkatirok hira hin pag-ampo han maloloy-on nga Ginoo, ngan naghangyo hira ha iya nga malooy pa hiya han iya mga surugoon.

Ginpirde ni Judas Hira Timoteo ug Baquides

30Waray pag-iha nakig-away an mga Judiyo kontra han kasondalohan nira Timoteo ug Baquides ngan ira pinamatay in kapin hin 20,000 ha ira. Ira nakuha in pira han higtaas hin duro nga mga kota ngan ginkuha in damo nga mga tinikas nira, nga ira ginbahinbahin hin papreho para ha ira ngahaw ngan han mga balo nga kababayen-an, mga ilo, mga kalagsan, ngan han mga naunong hin pagpakaraota.

31Ira gintirok hin maupay an ngatanan nga mga hinganiban han kaaway ngan gintipig ini didto hin mga dapit nga importante ha pag-awayan, kundi ira gindara ngadto ha Jerusalem an nahisalin han mga tinikas.

32Ira ginpatay an labaw nga kapitan han kasondalohan ni Timoteo, usa nga diri natoo hin Dyos ngan tawo nga nagpaantos hin duro han mga Judiyo.

33Samtang ira ginsasaurog an ira pagdarag-an didto han syudad han ira kaapoy-apoyan, ira ginsunog nga buhi adton mga tawo nga nagsunog han mga ganghaan han Templo. Nahilakip han mga ginpatay hi Calistenes nga tinmago didto hin usa nga gutiay nga balay; sanglit iya kinarawat an kastigo nga angay ha iya tungod han magraot niya nga mga buhat.

34Dida hini nga paagi, tungod han pagbulig han Dyos, an maraogdaog nga hi Nicanor nga nagdara hin 1,000 nga mga magparatigayon hin pagpalit hin mga oripon nga Judiyo,

35ginpirde hiya han mga tawo ngahaw nga iya gintamay hin duro. Iya ginlubas an iya maanyag nga uniporme ngan kinmalagiw hiya nga nag-uusaan la sugad hin usa nga kalagiw nga oripon, tubtob han pag-abot niya ha Antioquia. Nagmainuswagon la hiya hin pagpuo han bug-os niya nga kasondalohan.

36Ini nga tawo nga naglarang hin pagbayad hin usa nga utang ngadto ha Roma pinaagi hin pagbaligya han mga tawo han Jerusalem, nagpakita nga diri gud mapipirde an mga Judiyo. An Dyos amo an ira gamhanan nga Mananalipod, kay ginsugot nira an mga balaod nga iya iginhatag ha ira.