Judit 10 - Samarenyo Meaning-Based Bible (1984)（MBBSAM）

Nakigkita hi Judit kan Holofernes

1Han kahuman ni Judit pag-ampo ngadto Dyos han Israel,

2binmuhat hiya, gintawag an iya oripon nga babaye, ngan linmusad hiya ngadto han iya balay sugad han ginbuhat niya ha mga Adlaw nga Iparahuway ngan mga adlaw nga pyesta.

3Ginhugkas niya an bado nga sako ngan an iya panapton hin pagkabalo, kinmarigos, ngan nagdihog hin mahal nga mga pahamot. Nagsudlay hiya, ginbutok hin laso an iya buhok, ngan nagbado hiya hin matahom nga mga panapton nga igsurul-ot niya ha malipayon nga mga higayon han buhi pa hi Manases nga iya bana.

4Nagsul-ot hiya hin sandalyas ngan mga alahas: mga singsing ngan mga ariyos, ngan mga pulsiras ha iya mga butkon ngan mga bitiis. Nagpahusay gud hiya nga waray ruhaduha malulukmay manta niya an bisan hin-o nga tawo nga makakita ha iya.

5Pinapagdara niya an iya oripon nga babaye hin usa nga anit nga supot hin bino ngan usa ka tibod hin lana. Iginsulod niya ha usa nga supot in sinanlag nga sebada, mga torta nga sinaktan hin binulad nga mga igos, ngan pira nga mga tinapay nga ginhudno sumala han mga balaod han pagkaon han mga Judiyo. Ginputos niya hin maupay an ngatanan nga mga pagkaon ngan mga karan-an ngan iginhatag ini ngadto han iya oripon.

6Niyan nagkalakat ini nga duha nga kababayen-an ngan kinmadto han mga ganghaan han Betulia diin ira hin-agian hi Uzias ngan hira Cabris ug Carmis nga mga opisyal han bungto, nga nagbabantay.

7Han paghikit-i han mga tawo kan Judit nga nagliwan ngan nagpahusay, nadara hira han iya kahusay ngan ginsiring hiya,

8“Bantayan ka unta han Dyos han aton mga ginikanan ngan paghimoon niya nga magmainuswagon an imo nahunahunaan, basi dad-on mo an kadungganan han Jerusalem ngan an pagdarag-an han Israel.”

Nag-ampo hi Judit

9ngan katapos nagsiring, “Paabrehi han mga tawo an mga ganghaan para ha akon. Tikadto na ako hin pagbuhat han akon ginhimangraw ha iyo.” Niyan ira ginsugo an batan-on nga kalalaken-an hin pag-abre han mga ganghaan para ha iya,

10ngan binmaya han syudad hi Judit ngan an iya oripon. Ginkinita hiya han mga tawo han paglugsong niya han bukid ngadto han kahamub-an, tubtob nga waray na hira kumita ha iya.

11Han naglalatas han kahamub-an an duha nga kababayen-an, gintapo hira hin Asiriahanon nga mga magbarantay.

12Ira gindakop hi Judit ngan ginpakianhan hiya, “Ano an imo nasod? Tikang ka diin ngan tikain ka?”

“Usa ako nga Hebreo,” binmaton hiya, “kundi nakalagiw ako tikang han mga Israelita kay itinugot han Dyos nga pamatayon niyo hira.

13Tikadto ako hin pakigkita kan Holofernes nga heneral han iyo kasondalohan, hin paghatag ha iya hin kasasarigan nga sumat. Makakatutdo ako ha iya kon uunanhon hin pagsulong ngadto han kabukiran ngan pagsakop han bug-os nga katunaan hin waray bisan usa nga mamamatay.”

14Ginkinita hiya han mga tawo tungod han iya kamahusay. Ira pinamatian hiya ngan ginsiring,

15“Gintalwas mo an imo kinabuhi pinaagi hin paglugsong nganhi hin pakigkita han amon heneral. Pagdadad-on ka hin pira han amon mga tawo ngadto han iya tulda ngan igpapakilala ka ha iya.

16Ayaw kahadlok ha iya. Igsumat la ha iya an imo iginsumat ha amon, ngan pag-aabiabihon ka niya hin maupay.”

17Ira gintudlok in usa ka gatos ka tawo hin pag-upod kanda Judit ngan han iya oripon ngadto han tulda ni Holofernes.

18Naribok an Asiriahanon nga kampo han pagsarang han sumat tikang han usa ngadto han sunod nga tulda hiunong han pag-abot ni Judit. Samtang natindog hiya ha gawas han tulda ni Holofernes ngan naghuhulat nga igpakilala ha iya, nagkaabot in damo nga Asiriahanon nga mga sondalo ngan nag-alirong ha iya.

19Hinusayan gud hira ha iya ngan nahiburong kon ano nga klase hin mga tawo an mga Israelita. Naggiparupakiana hira, “Hin-o in makakagtamay hin mga tawo kanay kababayen-an mga maghusay hin duro? Maupay pamatayon naton an ngatanan nga kalalaken-an, kay kon diri, malulukmay hini nga mga Judiyo an bug-os nga kalibutan.”

20Niyan ginmawas an kan Holofernes gwardya ngan an iya kalugaringon nga mga surugoon ngan gin-updan hi Judit ngadto ha sakod han tulda.

21Napahuway hi Holofernes dida han iya kama ha sakob hin moskitero nga hinablon hin magpula ngan bulawan nga inulang ngan inadornohan hin mga esmeralda ngan iba nga marahalon nga mga bato.

22Han pagsumati ha iya han mga tawo nga inmabot hi Judit, ginmawas hiya han tulda. Gindara nga nag-una ha iya in salapi nga mga lampara.

23Han paghirani ni Judit ha iya ngan han iya mga surugoon, nanhipausa hira ngatanan han iya kamahusay. Hinmapa hiya ha atubangan ni Holofernes, kundi binuligan hiya han mga surugoon hin pagtukdaw.