Levitico 18 - Samarenyo Meaning-Based Bible (1984)（MBBSAM）

May Igindidiri nga mga Pakighilawas

1Ginsiring han Ginoo hi Moises

2nga sumatan an mga tawo han Israel, “Ako amo an Ginoo nga iyo Dyos.

3Ayaw niyo pagsunda an mga ginbubuhat han mga tawo ha Ehipto nga iyo hadto anay gin-ukyan, o han mga tawo didto ha tuna han Canaan diin gindadara ko kamo yana.

4Pagsugta niyo an akon mga balaod ngan pagbuhata an akon igsusugo. Hi ako an Ginoo nga iyo Dyos.

5Pagsunda niyo an mga turumanon ngan an mga balaod nga ihinahatag ko ha iyo. Matatalwas niyo an iyo kinabuhi kon magtuman kamo. Ako amo an Ginoo.”

6Iginhatag han Ginoo inin masunod nga mga turumanon. Ayaw pakighilawas bisan kan kanay nga imo uropod.

7Ayaw pagpakaalohi an imo amay pinaagi hin pakighilawas han imo iroy. Kinahanglan diri nimo pagpakaalohan an kalugaringon mo nga iroy.

8Ayaw pagpakaalohi an imo amay pinaagi hin pakighilawas bisan kan kanay han iba niya nga mga asawa.

9Ayaw pakighilawas han imo bugto nga babaye o han imo bugto ha amay o ha iroy nga babaye, bisan nagtubo o waray dida han amo manta nga balay upod ha iyo.

10Ayaw pakighilawas han imo apo nga babaye; makaarawod ini nga buhat.

11Ayaw pakighilawas han imo bugto ha gawas nga babaye; bugto mo liwat hiya.

12-13Ayaw pakighilawas hin imo dada, bisan bugto hiya han imo amay o han imo iroy.

14Ayaw pakighilawas han asawa han imo bata; dada mo liwat hiya.

15Ayaw pakighilawas han imo umagad nga babaye

16o han asawa han imo bugto.

17Ayaw pakighilawas han anak o apo nga babaye hin usa nga babaye nga imo iginkahilawas; bangin nauurupod pa hiya nimo, ngan mangil-ad ini nga buhat.

18Ayaw pagkuhaa an bugto nga babaye han iyo asawa nga usa han imo mga asawa samtang buhi pa an imo asawa.

19Ayaw pakighilawas hin babaye samtang reniregla hiya, kay mahugaw hiya sumala han seremonyas.

20Ayaw pakighilawas han asawa hin lain nga lalake, makakahugaw ini ha imo sumala han seremonyas.

21Ayaw igtubyan in bisan hin-o han imo mga anak nga pagsunogon basi ighalad ngadto han diyos nga hi Moloc, kay kon pagbuhaton mo ini, waray ka magtahod han ngaran han Dyos nga Ginoo.

22Waray gud lalake nga makighilawas hin igkasi lalake; napupungot gud hini an Dyos.

23Waray gud lalake o babaye nga makighilawas hin mananap; makakahugaw ha iya ini nga mangil-ad nga buhat.

24Ayaw kamo pagtugot nga mahugawan kamo pinaagi hini nga mga buhat, kay amo ini an nakahugaw han mga pagano nga nag-ukoy ha tuna una ha iyo, ngan ginpaiwas hira han Ginoo basi makasulod kamo.

25Nakahugaw han tuna an ira mga binuhatan, sanglit ginkastigo han Ginoo an tuna ngan ginsalikway han tuna an mga tawo nga naukoy didto.

26-27Ginbuhat nira ini ngatanan nga mangil-ad nga mga butang, ngan ginhugawan nira an tuna, kundi kinahanglan diri niyo pagbuhaton ini. Kinahanglan pagtumanon niyo ngatanan nga mga Israelita o mga lumalangyaw nga nag-uokoy tampo ha iyo an mga balaod ngan mga sugo han Ginoo,

28ngan diri kamo igsasalikway han tuna sugad han pagsalikwaya han mga pagano nga nag-ukoy didto una ha iyo.

29Maaram man kamo nga bisan hin-o nga magbuhat hin bisan hain hini nga mangil-ad nga mga butang, diri na hiya pag-iisipon nga sakop han bungto han Dyos.

30Ngan nagsiring an Ginoo, “Pagsugta niyo an mga sugo nga akon iginhatag ngan ayaw niyo pagsunda an mga binuhatan han mga tawo nga nag-ukoy didto han tuna una ha iyo, ngan ayaw gud pagtugot nga mahugawan kamo pinaagi hin pagbuhat hini nga mga maglaw-ay nga butang. Hi ako an Ginoo nga iyo Dyos.”