Judit 4 - Samarenyo Meaning-Based Bible (1984)（MBBSAM）

Nagplano hin Panalipod an mga Israelita

1Hinbatian han mga tawo han Juda an ginbuhat han iba nga mga nasod ni Holofernes nga gilalabawi nga kapitan han mga kasondalohan ni Hadi Nabucodonosor. Hinbatian nira an panikas ngan pamungkag han ngatanan nira nga mga templo,

2ngan duro an ira kahadlok ha iya, ngan nahadlok hira nga bangin niya pagbungkagon an Jerusalem ngan an Templo han Ginoo nga ira Dyos.

3Paghiuli pa la nira ngadto ha Juda tikang han paghalina ha ira hin kabihag ngan ira pa la ginbag-o an paghalad han Templo ngan mga higamit han mga altar han Templo katapos hin paghinugawi.

4Sanglit nagpadara hira hin mga pahimatngon ngadto han bug-os nga katunaan han Samaria ngan ngadto han mga bungto han Kona, Betoron, Belmain, Jerico, Coba, ug Hazor, ngan ngadto han Kahamub-an han Salem.

5Ginsakop nira dayon an pungkay han kabukiran, ginbutangan nira hin panalipod an mga baryo ha kabukiran, ngan nagtirok hira hin pagkaon ha pag-andam para hin away. Maupay na la nga human na hira pag-ani han ira kaumhan.

6An Labaw nga Padi, hi Joakim, nga nakadto ha Jerusalem hito nga takna nagsurat ngadto han mga tawo han mga bungto han Betulia ug Betomestaim nga naatubang han Kahamub-an han Jezrael, hirani han Dotan.

7Iya ginsugo hira hin pagrikopo han mga aragian ha bukid nga tipakadto han tuna han Juda, diin magkukuri an pagsulong han kaaway, kay an kahiluag hini igo la hin duha ka tawo ha kada pag-aagi.

8Gintuman han mga Israelita an mga sugo nga iginhatag ha ira ni Joakim, an Labaw nga Padi ngan han Labaw nga Hukmanan nga nagkatirok didto ha Jerusalem.

Nag-ampo san-o an Away

9Kinasingkasing an pag-ampo ngadto ha Dyos han kalalaken-an han Israel ngan nagpuasa hira.

10Nagbado hira hin sako—hira ngan han ira kaasaw-an, an ira mga anak, an ira kahayopan, ngan an tagsa nga langyaw nga umurokoy, an tagsa nga oripon ngan sinuholan nga magtratrabaho.

11-12Gintahoban liwat nira an altar hin dugnit nga sako. Niyan nangulob ha tuna ha atubangan han Templo an ngatanan nga kalalaken-an, kababayen-an, ngan kabataan didto ha Jerusalem. Didto nangulob hira ha atubangan han Ginoo, nga nakakabado hin sako an ngatanan, nga binutangan hin mga agbon an ira mga ulo. Nag-urosa hira hin kinasingkasing nga pag-ampo ngadto han Dyos han Israel, ngan nakimalooy hira ha iya nga diri pagbihagon an ira mga anak, paiwason an ira kaasawaan, o pagbungkagon an ira mga bungto nga gin-uokyan. Nakimalooy hira ha iya nga diri tugotan an mga Hentil hin pagbungkag han Templo ngan hin diri na pagtahod nira han Templo.

13Hinbatian han Ginoo an ira mga pag-ampo ngan hinkit-an an ira kagul-anan. Sulod hin damo nga mga adlaw ginpadayon han mga tawo han Juda ug Jerusalem an ira pagpuasa ha atubangan han Templo han Ginoo nga Labi Kamakagarahum.

14Nagbado hin sako hi Joakim nga Labaw nga Padi, an kapadian, ngan an ngatanan nga iba nga nag-alagad didto han Templo han Ginoo han paghalad nira han ikinaadlaw nga halad nga tinubod, han huyayag ha kaburot-on nga mga halad han mga tawo, ngan han mga halad hin pagtuman hin pagsumpa.

15Ginbutangan nira hin mga agbon an ira mga pudong ngan nangaraba hira hin pag-ampo ngadto han Ginoo, ngan naghangyo hira ha iya nga kalooyan an bug-os nga nasod.