Mga Darahonon 3 - Samarenyo Meaning-Based Bible (1984)（MBBSAM）

Nagwaydong han mga Batan-on

1Anak ko, ayaw hingalimti an akon igintutdo ha imo. Dayuday hinumdomi an iginpabuhat ko ha imo.

2Mahatag ha imo an akon pagturon-an hin hilawig ngan mainuswagon nga kinabuhi.

3Ayaw gud bayai an kamaunongon ngan kamatinumanon. Ikwentas ini ha imo liog; isurat ini dida han imo kasingkasing.

4Kon buhaton mo ini, malilipay ha imo an Dyos ngan an tawo.

5Sarigi an Ginoo ha bug-os mo kasingkasing. Ayaw gud pagtapod han imo kamaaram.

6Hinumdomi an Ginoo dida han ngatanan nga imo ginbubuhat, ngan ipakikita niya ha imo an matadong nga paagi.

7Ayaw gud paghunahuna nga maaram ka labaw han imo hinbabaroan; sugta la an Ginoo ngan ayaw pagbuhat hin maraot.

8Kon buhaton mo ini, masusugad ini hin maupay nga bulong nga magtatambal han imo mga samad ngan makakaiban han kamaol-ol han imo kasawdan.

9Pagpasidunggi an Ginoo pinaagi hin paghalad ngadto ha iya han gimamaupayi han ngatanan nga mga abot han imo tuna.

10Kon buhaton mo ini, mapupuno hin mga inani nga abot an imo mga buhos, ngan magsasapay hin bino an imo mga surudlan.

11Anak ko, kon busaan ka han Ginoo, pamati hin maupay ngan karawata ini nga usa nga pahimangno ha imo.

12Binubusaan han Ginoo adton iya mga hinihigugma, sugad nga binubusaan hin usa nga amay an iya pinaura nga anak.

13Palaran an tawo nga may-ada kinaadman ngan pagsabot.

14Darudamo pa an makukuha hini kay han salapi; marumahal pa ini ha imo kay hin bulawan.

15Marumahal pa an kinaadman kay hin mga alahas; waray bisan ano nga butang nga imo minahal in malabaw han kinaadman.

16Nahatag ha imo an kinaadman hin hilawig nga kinabuhi, sugad man hin manggad ngan kadungganan.

17Nakakalipay han imo kinabuhi an kinaadman, ngan kalinaw ini ha imo paglalaktan.

18Malipayon adton diri nabaya han kinaadman ngan an makaangkon ha iya may-ada kinaadman:

19Gintuha han Ginoo an tuna pinaagi han iya kinaadman;

iginpahimutang niya an langit pinaagi han iya hibaro.

20Ginpaawas han iya kinaadman an mga salog,

ngan ginpauran ha tuna an mga dampog.

21Anak ko, tipigi an imo kinaadman ug pagsabot. Ayaw gud ini ibulag ha imo.

22Tatagan ka hini hin maupay ngan malipayon nga kinabuhi.

23Diri ka mahahadlok ug diri ka kukulbaon ha imo paglalaktan ngan diri ka ngani mahipapakdol.

24Diri ka mahahadlok ha imo paghigda, ngan makaturog ka nga malinawon ha bug-os nga gab-i.

25Diri ka mababaraka hiunong hin tigda nga mga karat-an nga naabot sugad hin usa nga bagyo para han mga maghuka nga mga tawo.

26Pananalipdan ka han Ginoo; diri hiya matugot nga mabitik ka.

27Kon makakahimo ka, pagbuhat hin maupay hadton mga nagkikinahanglan hini.

28Ayaw gud pahulata an imo amyaw ngada han pagkabuwas pa, kon makakabulig ka ha iya yana.

29Ayaw paglarang hin bisan ano nga makakabido han imo amyaw; nag-uokoy hiya sapit ha imo ngan natapod hiya ha imo.

30Ayaw pakiglantugi bisan kan kanay hin waray la hinungdan, kon waray man ada hiya magbuhat ha imo hin bisan ano nga maraot.

31Ayaw kaawa han mga mag-isog ngan magraogdaog o ayaw pakahunahuna hin pagsubad han ira maraot nga buhat,

32kay napupungot an Ginoo hadton mga tawo nga nagbubuhat hin maraot, kundi natapod hiya han mga magtadong.

33Ginagabaan han Ginoo an mga panimalay han mga magraot, kundi ginpapakaupay niya an mga panimalay han mga magtadong.

34Para ha iya waray gamit an mga magpinahitas-on, kundi kinalolooyan niya an mga magpinaubsanon.

35Makakaangkon an mga makinaadmananon hin kadungganan kundi an mga lurong maglulugaring la hin pagdugang han ira kaarawdan.