Tobit 8 - Samarenyo Meaning-Based Bible (1984)（MBBSAM）

Inmiwas an Yawa

1Han kahuman nira pangaon, ngan panahon na hin pangaturog, gindara hi Tobias han mga kag-anak ni Sara ngadto han kwarto nga higdaan.

2Nahinumdom hi Tobias han mga tugon ni Rafael, sanglit ginkuha niya an atay ug kasingkasing han isda tikang han supot nga iya gintagoan hini. Niyan iya iginbutang ini ha bawbaw han naglalaga nga insyenso.

3An baho hini nga insyenso nagpaiwas han yawa tikang ha ira nga duha ngan pinmalagiw an yawa ngadto ha Ehipto. Ginbukod ini ni Rafael ngan iya hindakpan. Iya dayon ginggapos an kamot ug tiil han yawa.

Nag-ampo hi Tobias

4Han nagduduhaan na la hira Tobias ug Sara ha sakob han kwarto nga sinadhan, binmuhat hi Tobias ha iya higdaan ngan ginsiring an iya asawa, “Buhat anay, hinigugma. Pag-ampo kita basi kalooyan kita han Ginoo ngan panalipdan kita niya.”

5Binmuhat hi Sara ngan nagdungan pag-ampo hira nga duha ha paghangyo han Dyos nga panalipdan hira. Niyan nag-ampo hi Tobias:

“O Dyos han amon kaapoy-apoyan, angay ka pagdayawon.

Pagpasidunggan unta an imo ngaran

ha kadayonan han ngatanan mo

nga mga binuhat didto ha langit ngan dinhe ha tuna.

6Gintuha mo hi Adan ngan gintagan mo hiya hin iya asawa nga hi

Eva nga magin kabulig ngan kaabay niya.

Nahimo hira nga mga ginikanan han ngatanan nga mga tawo.

Nagsiring ka, ‘Diri maupay nga mag-usaan la an tawo.

Maghihimo ako hin angay nga kabulig niya.’

7Ginoo, ginpili ko hi Sara kay amo man ini an angay buhaton,

diri tungod nga naipa ako ha iya.

Malooy ka gad ha amon ngan igtugot gad nga humilawig an amon kinabuhi nga duha.”

8Niyan nagsiring hira nga duha, “Amen”

9ngan binmalik hira hin paghigda hito nga gab-i.

Nabaraka Hira Raguel ug Edna

Hito ngahaw nga gab-i gintawag ni Raguel an iya mga surugoon ngan nagburunyog hira hin pagkutkot hin usa nga lubnganan,

10kay naghunahuna hi Raguel, “Mapatay ada liwat hi Tobias, ngan pagtitinawaan ngan pag-iinintrimisan na liwat kami han mga tawo.”

11Han kahuman nira pagkutkot han lubnganan, binmalik hi Raguel ngadto han balay ngan ginsiring niya an iya asawa,

12“Pagsugo hin usa nga surugoon nga babaye hin pagkita kon buhi pa hi Tobias. Kon patay na, iglulubong naton hiya san-o mahibaroan ini nga hinabo.”

13Sanglit nagsugo hira hin usa nga surugoon nga babaye hin pagdara hin suga ngan pagkita kon buhi pa hi Tobias. Han pag-abre niya han porta, iya hinkit-an nga hinmumuokan hira nga duha.

14Sanglit binmalik hiya ngan iya ginsumatan hira Raguel ug Edna nga buhi pa hi Tobias ngan waray hiya maano.

15Niyan gindayaw ni Raguel an Dyos han langit:

An Pag-ampo ni Raguel

“Takos ka han amon pagdayaw, O Dyos.

Pagdayawon ka unta ha kadayonan han imo mga tawo,

pagdayawon ka unta nira hin putli nga mga kasingkasing.

16Gindadayaw ko ikaw kay ginlipay mo ako;

nalooy ka ha amon,

ngan an akon duro nga kahadlok waray ngay-an kamatuoran.

17Angay ka han amon pagdayaw, O Ginoo;

nalooy ka hini nga batan-on nga mga magtiayon,

an amo la nga mga anak han ira mga kag-anak.

Yana ihatag ha ira an imo kalooy ngan panalipod.

Pagpahimulosan unta an ira kinabuhi dida hin paglipay ug paghigugma.”

18Niyan ginsugo ni Raguel an iya mga surugoon hin pagtak-op han lubnganan san-o sumidlit an adlaw.

Nagkombite han Pagkasal

19Pinapaghudno ni Raguel an iya asawa hin igo kadamo nga tinapay para hin usa nga dako nga kombite. Niyan kinmadto hiya han panon ngan kinmuha hiya hin duha nga todo nga baka ngan hin upat nga lalaki nga karnero, nga iya ginpaihaw han iya mga surugoon ha pag-andam para han kombite han pagkasal.

20Gintawag niya hi Tobias ngan nagsumpa hiya nga diri niya tutugotan hi Tobias hin paglakat sulod hin duha ka semana. Nagsiring hiya, “Pagpabilin la anay dinhe, ngan magsasaro kita hin pagkaon ngan pag-inom. Makakaupay ini han akon anak nga babaye katapos han iya makalilisang nga pag-antos.

21Niyan imo kakarawaton an katunga han akon mga hiagi ngan mabalik ka ngadto han imo amay nga talwas ngan maupay an lawas. Imo kakarawaton an lain nga katunga han akon hiagi kon mamatay na kami ngan hi Edna. Ayaw na pagruhaduha hiunong han amon paghigugma ha imo; tikang yana anak ka na namon sugad nga anak namon hi Sara. Ayaw pagruhaduha hini, anak ko.”