Mga Maghurukom 2 - Samarenyo Meaning-Based Bible (1984)（MBBSAM）

Kinmadto ha Boquim, an Anghel han Ginoo

1Tikang ha Gilgal kinmadto ha Boquim an anghel han Ginoo ngan ginsiring an mga Israelita, “Ginkuha ko kamo tikang ha Ehipto ngan gindara ko kamo ngadto han tuna nga akon iginsaad han iyo mga ginikanan. Nagsiring ako, ‘Tutumanon ko gud an akon ginsaaran ha iyo.

2Kinahanglan diri kamo maghimo hin ginsabotan han mga tawo nga nag-uokoy dinhe hini nga tuna. Kinahanglan pagrub-on niyo an ira mga altar.’ Kundi waray niyo pagbuhata an akon iginsiring ha iyo. Ginbuhat lugod niyo an igindiri ha iyo.

3Sanglit susumatan ko kamo yana nga diri paiiwason ini nga mga tawo samtang nasulong kamo. Magigin kaaway hira niyo, ngan mabibitik kamo pinaagi han pagsingba han ira kadiyosan.”

4Han pagsiring hini han anghel, nagtangis an ngatanan nga mga tawo han Israel,

5sanglit ginngaranan nga Boquim ini nga dapit. Didto naghalad hira hin mga hayop nga ira tutuboron para han Ginoo.

Namatay hi Josue

6Ginpalakat ni Josue an mga tawo han Israel ngan tagsa ha ira nagtag-iya han iya malon nga tuna.

7Samtang buhi pa hi Josue, gin-alagad han mga tawo han Israel an Ginoo, ngan bisan pa han kamatay na niya, nagpadayon hira gihapon hin pag-alagad han Ginoo samtang buhi pa an mga pangulo nga nagpakakita han ngatanan nga dagko nga mga butang nga ginbuhat han Ginoo para han Israel.

8Namatay hi Josue nga anak ni Nun, nga surugoon han Ginoo ha panuigon nga 110.

9Iginlubong hiya didto han iya kalugaringon nga tuna ha Tamanatsare ha may sagkahon nga nasod han Efraim, ha amihanan han Bukid Gaas.

10Nagkamatay an bug-os niya nga katulinan. An sunod nga katulinan nahingalimot han Ginoo ngan han iya ginbuhat para han Israel.

Hinmunong an Israel hin Pagsingba han Ginoo

11Niyan nakasala han Ginoo an mga tawo han Israel ngan nag-alagad na hira han mga Baal.

12Hinmunong hira hin pagsingba han Ginoo nga Dyos han ira mga ginikanan, an Dyos nga nagkuha ha ira ha Ehipto, ngan nagsingba na hira hin iba nga kadiyosan han mga tawo nga naglibot ha ira. Ginyukboan nira ini nga kadiyosan; sanglit nasina ha ira an Ginoo.

13Hinmunong hira hin pagsingba han Ginoo ngan gin-alagad nira an mga Baal ngan an mga Astarte.

14Sanglit napungot han Israel an Ginoo ngan itinugot han Ginoo nga sulongon ngan panikasan hira; nga marikopo hira han ira mga kaaway, ngan an mga Israelita waray na gud makakapanalipod ha ira ngahaw.

15Ha kada pagkakadto nira ha pag-awayan, an Ginoo an nakikig-away ha ira sumala han iya iginsiring. Nag-antos hira hin dako nga kakurian.

16Niyan tinagan han Ginoo an mga Israelita hin mga maghurukom nga amo an magtatalwas ha ira tikang han mga parapanikas.

17Kundi waray la mamati an mga Israelita han ira mga maghurukom. Waray na an mga Israelita magmatinumanon han Ginoo ngan nagsingba hira hin iba nga kadiyosan. Nagsugot an ira mga ginikanan han mga sugo han Ginoo, kundi waray magsugot ini nga bag-o nga katulinan.

18Kada pagtatagi han Ginoo hin maghurukom an Israel, binubuligan hiya han Ginoo ngan gintatalwas an mga tawo tikang han ira mga kaaway samtang buhi pa ito nga maghurukom. Kinalolooyan hira han Ginoo kay naghaharoy man hira tungod han ira pag-antos ngan pagtalumpigos ha ira.

19Kundi kon patay na an maghurukom nabalik an mga tawo ngadto han kadaan nga labaw pa kamaraot an ira ginbubuhat kay han una nga katulinan. Nag-aalagad ngan nagsisingba hira hin iba nga kadiyosan, ngan tinutuyo gud nira hin pagpadayon han ira magraot nga mga binuhatan.

20Niyan napupungot han Israel an Ginoo ngan nasiring, “Ginsupak hini nga nasod an ginsaaran nga akon ipinapagtuman han ira kaapoy-apoyan. Tungod nga waray hira magsugot ha akon,

21diri ko na paiiwason an mga nasod nga nag-uokoy pa han ira tuna han kamatay ni Josue.

22Gagamiton ko hira hin panginano kon magsusunod ba o diri han akon mga sugo ini nga mga Israelita, sugad han ginbuhat han ira kaapoy-apoyan.”

23Sanglit tinugotan han Ginoo ini nga mga nasod hin pagpabilin didto han ira tuna; waray niya tugoti hi Josue nga makadaog ha ira, ngan waray niya hira paiwasa dayon kahuman kamatay ni Josue.