2 Cronicas 28 - Samarenyo Meaning-Based Bible (1984)（MBBSAM）

Naghadi han Juda hi Hadi Acas(2 Hadi 16:1-4)

1Nahimo nga hadi hi Acas ha panuigon nga 20 ngan naghadi hiya hin 16 ka tuig ha Jerusalem. Waray niya pagsunda an maupay nga susbaranan ni Hadi David nga iya ginikanan; ginbuhat lugod niya an waray makalipay han Ginoo,

2ngan ginsunod an susbaranan han kahadian han Israel. Nagpahimo hiya hin metal nga mga ladawan ni Baal,

3nagtubod hin insyenso didto ha Kahamub-an Benhinon, ngan nagtubyan pa ngani han iya kalugaringon nga mga anak nga kalalaken-an nga mga halad nga tinubod ngadto han mga diyosdiyos, pagsubad han makapupungot nga binuhatan han mga tawo nga ginpaiwas han Ginoo samtang nasulong han tuna an mga Israelita.

4Naghalad hi Acas hin mga hayop nga tutuboron ngan nagtubod hin insyenso didto han pagano nga mga dapit hin pagsingba, ha mga kapungtoran, ngan ha sirong han tagsa nga marampag nga kahoy.

Nakig-away hi Hadi Acas han Siria ug Israel(2 Hadi 16:5)

5-6Tungod han pakasala ni Hadi Acas, iginpapirde hiya han Ginoo nga iya Dyos han hadi han Siria ngan iginhalin nga mga bihag ngadto ha Damasco in damo nga mga taga-Juda. Itinugot liwat han Ginoo nga pirdehon hi Acas ni Peka nga anak ni Remalias, nga hadi han Israel, ngan ginpatay ni Peka ha usa ka adlaw in 120,000 han giiisogi nga mga sondalo nga taga-Juda. Itinugot ini nga mahinabo han Ginoo nga Dyos han ira kaapoy-apoyan, kay iginsikway man hiya han mga tawo han Juda.

7Ginpatay hin sondalo nga Israelita nga ginngaranan kan Sicri hi Maasias nga anak ni Hadi Acas, hi Asricam nga nagpapalakat han palasyo, ngan hi Elcana nga sugbong han hadi.

8Bisan kon igkasi nira mga taga nasod an mga taga-Juda, ginbihag han kasondalohan nga Israelita in 200,000 nga kababayen-an ug kabataan ngan iginbalik hira ha Samaria upod hin damo hin duro nga mga naagaw nira.

Nagsagdon hi Manaragna Oded

9Nag-ukoy ha syudad han Samaria in tawo nga ginngaranan kan Oded nga manaragna han Ginoo. Gintapo niya an nangunguli nga kasondalohan nga Israelita upod an ira mga bihag nga mga taga-Juda dida han ulpatan han syudad ngan nagsiring hiya, “Nasina han Juda an Ginoo nga Dyos han iyo kaapoy-apoyan ngan iginpapirde hira ha iyo, kundi yana hinbatian niya an makalilisang niyo nga pamatay ha ira.

10Ngan yana karuyag niyo hin pag-oripon han kalalaken-an ug kababayen-an han Jerusalem ug Juda. Diri ba kamo maaram nga nakasala liwat kamo han Ginoo nga iyo Dyos?

11Pamati kamo ha akon! Iyo mga kadugo ini nga mga bihag. Paulia hira niyo, kon diri, kakastigohon kamo han Ginoo tungod han iya kasina.”

12Rinmiwa liwat han mga ginbuhat han kasondalohan in upat han dumagko nga mga tawo han Amihanan Ginhadian nga amo hira Asarias nga anak ni Johanan, Baraquias nga anak ni Mesolamot, Ezequias nga anak ni Alum, ug Amasa nga anak ni Adlai.

13Sinmiring hira, “Ayaw pagdad-a nganhi ito nga mga bihag! Nakasala na kita han Ginoo ngan tungod han iya kasina, ginkastigo kita. Yana karuyag niyo buhaton in butang nga makakapadugang han aton sala.”

14Sanglit igintubyan ha kasondalohan an mga bihag ngan an mga tinikas ngadto han mga tawo ngan han ira mga pangulo,

15ngan gintudlok an upat nga mga tawo hin paghatag ha mga bihag hin mga panapton tikang han mga natikas nira. Gintagan hira hin mga panapton ngan mga sandalyas, gintagan hira hin igo nga pagkaon ug pag-inom, ngan gindihogan hin lana hin olibo an ira mga kasamdan. Ginpasakay ha mga asno an magluya hin duro ngan iginbalik an ngatanan nga mga bihag ngadto han katunaan han Juda, didto ha Jerico nga syudad hin palmera nga mga kahoy. Niyan nanguli ha Samaria an mga Israelita.

Nangaro hi Acas ha Asiria hin Bulig(2 Hadi 16:7-9)

16-17Nagtikang na liwat an mga Edomitanhon hin pagsulong han Juda, ngan damo an ira mga nabihag, sanglit naghangyo hi Hadi Acas hin tambulig kan Tiglatpiliser nga emperador han Asiria.

18Hini manta nga panahon ginsulong han mga Filisteohanon an mga bungto ha ubos han mga kapungtoran ha katundan ngan ha timogan han Juda. Naagaw nira an mga syudad han Betsemes, Aylon, ug Gaderot ngan an mga syudad han Soco, Temna, ug Gemso upod an ira kabaryohan ngan nag-ukoy hira didto.

19Gindad-an han Ginoo hin kasamokan an Juda kay gintalumpigos ni Hadi Acas han Juda an mga katungod han iya mga tawo ngan inatohan niya an Ginoo.

20Waray lugod bumulig kan Acas an Asirianhon nga emperador, kundi kinmontra ha iya ngan nakahatag hin kasamokan.

21Sanglit ginkuha ni Acas an bulawan ha Templo, ha palasyo, ngan ha kabablayan han mga pangulo han mga tawo, ngan iginhatag ini ngadto han emperador, kundi bisan pa ini waray gihapon makakabig han hadi han Asiria nga bumulig ha iya.

Nakadamo Pakasala hi Acas

22Han nabubutnga hiya hin damo nga kasamokan, dinmuroy lugod hin pagpinakasala ini nga tawo nga Acas.

23Naghalad hiya hin mga hayop nga tutuboron ha kadiyosan han mga Siriahanon nga nagpirde ha iya. Sinmiring hiya, “Ginbuligan han kadiyosan nga Siriahanon an kahadian han Siria, sanglit kon maghalad ako ha ira, bangin buligan liwat ako nira.” Nakahatag ini hin karat-an ha iya ngan ha iya nasod.

24Labot la hini, ginkuha niya an ngatanan nga kasangkapan han Templo ngan pinanruba niya. Ginsadhan niya an Templo ngan nagtindog hiya hin mga altar ha tagsa nga dapit han Jerusalem.

25Gintindog niya in pagano nga mga dapit hin pagsingba ha tagsa nga syudad ug bungto han Juda nga pagtutuboran hin insyenso para han langyaw nga kadiyosan. Tungod hini, hiya ngahaw an nagpukaw han kasina ha iya han Ginoo nga Dyos han iya kaapoy-apoyan.

26Nahisurat an ngatanan nga iba pa nga mga hinabo han iya pagkahadi tikang ha tinikangan ngadto ha kataposan dida han Kasaysayan han Kahadian han Juda ug Israel.

27Namatay hi Hadi Acas ngan iginlubong ha Jerusalem, kundi diri didto han hadianon nga mga lubnganan. Sinmaliwan ha iya hin pagkahadi hi Ezequias nga iya anak.