Kinaadman ni Solomon 4 - Samarenyo Meaning-Based Bible (1984)（MBBSAM）

1Mauruupay an pagkamay-ada maupay nga ginawian bisan kon tungod hini, mawaray mga anak. Kikilal-on han Dyos ngan han iba nga mga tawo an imo maupay nga ginawian, ngan hinunumdoman ka ha kadayonan.

2Nahatag an maupay nga ginawian hin usa nga susbaranan nga pagsusundon han mga tawo; kon mawara ini, mailiw hira. Dayuday amo ini an gimamaupayi nga balos nga makakarawat hin usa ka tawo, ngan dayuday amo gud ini. Amo ini an labi ka hamili han ngatanan nga mag-upay nga mga hiyas nga maaangkon hin usa ka tawo.

3Magkadiano hin kadamo nga mga anak nga natawo tikang hin igindidiri nga pakighilawas, waray gud ha ira magmamapulsanon. Mga anak hira ha gawas; diri gud hira makakatindog hin marig-on nga patukoranan para ha ira ngahaw, diri gud hilarom an ira mga gamot.

4Sugad hin mga kahoy nga hibabaw la an mga gamot, mananahon ini hira hin usa ka dali, kundi ginpapalidpalid hira han hangin, ngan ginagabot hira hin mga bagyo.

5Nababanggi an mga sanga kay mga lapyo pa; nagkakataktak an mga bunga nga hilaw pa, ngan waray gud ini gamit.

6Ha Adlaw han Paghukom an mga anak nga natawo hin igindidiri nga pakighilawas amo ngahaw an mga saksi han sala han ira mga kag-anak ngan magsasaksi hira supak han ira mga kag-anak.

7Kundi makakapahuway an mga magtadong, bisan kon magkamatay hira nga mga batan-on pa.

8Ginpapasidunggan ta an pagkalagas, diri tungod kay in usa ka tawo nag-ukoy hin hilawig nga kinabuhi.

9An kinaadman ngan an pagkamatadong amo an mga tigaman han pagkahamtong ha kinabuhi nga dara han pagkalagas ha panuigon.

Usa nga Susbaranan hi Enoc

10May-ada hadto usa ka tawo nga ginngaranan nga Enoc, nga nakalipay han Dyos, ngan ginhigugma hiya han Dyos. Han nag-uokoy pa hi Enoc tampo han mga magpakasasala, ginkuha hiya han Dyos,

11basi an karat-an ngan pagbuwa diri makadaot han iya hunahuna ug kalag. (

12Maaram kita ngatanan nga nadadara an tawo han karat-an nga diri hira nakakakilala han maupay bisan kon iginkakaasdang hira hini. An mga tawo nga waray sala nahingangadto hin karat-an kon magtinguha hira hin pagbuhat hadton ira la karuyag pagbuhaton.)

13Ini nga tawo nga hi Enoc nakadangat hin kahingpitan sulod hin pira la ka tuig, nga diri mahihimo hin iba nga mga tawo ha bug-os nira nga kinabuhi.

14Nalipay an Ginoo han kinabuhi ni Enoc ngan ginkuha hiya dayon tikang hini nga maraot nga kalibutan. An mga tawo nasumatan han iya paggikan kundi waray hira makasabot. Sugad hin waray gud hira mahibaro han pagturon-an

15nga an Dyos maupay ug maloloy-on han iya kalugaringon nga mga tawo; iya pinananalipdan adton iya mga pinili.

May-ada Dadangatan an mga Magraot

16Bisan kon patay ngan waray na an mga magtadong, ginpapakaalohan pa nira an mga magraot nga nagpadayon hin pag-ukoy sunod ha ira. An mga magraot ha ira pagkalagas pagpapakaalohan han mga batan-on nga nakahimo na hin pagkahingpit han ira kinabuhi.

17An may kinaadman mahihimo mamatay nga batan-on pa, kundi diri gud makakasabot an mga magraot nga amo ini an paagi han Ginoo hin pagdara ha ira hin waray kataragman.

18Gintaw-an nira an kamatayon hin usa nga may-ada aram, kundi diri maiha pagtitinawaan hira han Ginoo. Kon mamatay hira, diri hira tatagan hin dungganan nga paglubong. Pagtatamayon hira ha kadayonan bisan han mga patay.

19Iglalabog hira han Dyos ngadto ha tuna ngan diri na hira makakayakan. Sugad hin kabablayan nga nababay-og tikang han mga patukoranan, hihimoon hira nga tambak hin mga rinuba. Pagpapakurian hira. Hingangalimtan dayon hira han mga tawo.

20Mapakadto hira nga nahahadlok han paghukom, diin pag-iihapon an ira mga sala; maatubang hira ngan paghuhukman hira han ira ngahaw mga buhat nga masupilon.