Kinaadman ni Solomon 14 - Samarenyo Meaning-Based Bible (1984)（MBBSAM）

Igintanding an Kahoy nga mga Diyosdiyos han Sakayan ni Noe

1Ha amo nga paagi, in usa ka tawo nga nag-aandam hin pagsakay dida hin mabalod nga dagat magtatawag hin pakibulig hin usa ka tipak nga kahoy nga diri ngani sugad hin kadig-on han barko nga iya pagsasakyan.

2Ginhimo an barko basi in usa ka tawo makaganansya, ngan ginhimo ini hin usa nga batid nga panday hin barko.

3Kundi an imo panimangno, O Amay, amo an nag-uulin han barko; masayonay an imo pagpalakat han barko ha butnga han mga balod han dagat.

4Mahimo nga magsakay an mga tawo ha dagat bisan kon waray nira hinbabaroan, kay makakahimo ka man hin pagtalwas ha ira ha bisan ano nga kataragman.

5Imo ini kaburot-on nga an mga butang nga ginhimo han imo kinaadman, mamay-ada gamit. Sanglit nakakatabok han dagat an mga tawo dida hin usa nga sakayan ngan nakakaduong ha tuna nga talwas ngan maupay an mga lawas, kay ira igintapod an ira mga kinabuhi ngada hito nga gutiay nga retaso hin kahoy.

6Amo gihapon an nahinabo hadto nga mga panahon, han nagtitikapara na in usa nga mapinahitas-on nga tulin hin mga higante. Nakalikay an paglaom han kalibutan, sakay hini nga sakayan ha ubos han imo pagmando ngan iginbilin mo ha kalibutan in usa nga katulinan nga magpapadayon han katawhan.

7Baraan an kahoy nga sakayan ni Noe kay tinugotan nga mabuhi an pagkamatadong,

8kundi may-ada gaba in usa nga diyosdiyos nga kahoy nga ginhimo la hin mga kamot hin tawo ngan gagabaan liwat an tawo nga naghimo hini, kay ginbubuhat niya ini nga may pagkaanaw nga butang ngan onina gintatawag niya nga diyos.

9An Dyos nagdudumot han diri dyosnon nga mga tawo ngan hini nga diri dyosnon nga mga butang nga ira ginhihimo,

10ngan magkakastigo han mga butang nga ginhimo ngan han mga tawo nga naghimo hini.

11Sanglit an paghukom han Dyos mahingangadto han pagano nga mga diyosdiyos, kay bisan kon ginhimo ini tikang hin butang nga gintuha han Dyos, nahimo ini nga makangingirhat nga mga butang nga nagbibitik han mga kalag han lurong nga mga tawo.

May Tinikangan an Pagsingba hin Diyosdiyos

12Nagtikang an lawasnon nga kalaw-ayan dida han syahan nga paghimoa han mga diyosdiyos. Ira gindaot an kinabuhi han tawo tikang pa han syahan nga paghimoa ha ira.

13Diri dayuday aanhi an mga diyosdiyos, ngan diri ini hira magpapadayon.

14An pagkamapinahitas-on han tawo amo an nagdara ha ira nganhi ha kalibutan, sanglit ginlarang na in tigda nga kataposan para ha ira.

15May-ada hadto usa nga amay nga natugob hin kabidoan tungod han madali nga pagkamatay han iya anak, sanglit naghimo hiya hin usa nga ladawan han iya anak nga binmaya hin tigda ha iya. Sanglit ginpasidunggan niya in usa nga patay nga tawo sugad nga usa nga diyos, ngan naghimo hiya hin hilom nga mga turumanon ug seremonyas para han iya mga ginsakopan.

16Lakat han panahon, nagtikadamo an nagtuman hini nga diri dyosnon nga pamatasan. Ha kataposan nahimo ini nga balaod, ngan ginsingba na in mga diyosdiyos ha ubos han sugo han mga punoan.

17Han pag-ukoy han mga tawo didto hin hirayo nga mga dapit nga diri na hira nakakagpasidungog han ira punoan, karuyag nira nga makagpasidungog hira han ira hadi bisan kon diri hira nakita; ira ginpainoino kon ano gud an iya hulagway, ngan nagpahimo hira hin usa nga pareho ha iya.

18An mga higtaas an panuyo nga mga maghirimo hini nga mga ladawan amo an nagpasarang hini nga pagsingba, bisan dida hin mga tawo nga diri nakilala han hadi.

19Bangin karuyag in usa nga maghirimo hin pagpahalipay hin usa nga punoan, sanglit gintatalinguha niya nga magmauruupay an ladawan kay han tawo ngahaw.

20Niyan nalulukmay an mga tawo pinaagi han kamahusay han trabaho, ngan an tawo nga ira ginpasidunggan hadto amo na yana an ira ginsisingba.

21Sanglit nahihimo ini nga usa nga malara nga bitik, kay an mga tawo nga aada hin kabidoan, ug kahadlok han mga punoan, nakuha hin bato o kahoy, ngan gintatagan nira hin pagpasidungog nga para la unta hin Usa nga Dyos.

May-ada mga Dadangatan an Pagsingba hin mga Diyosdiyos

22An usa nga butang sinusundan hin iba. Diri igo an pagsayop hiunong han hibaro han Dyos. Nag-ukoy hira ha usa nga kahimtang hin maraot nga pakig-away, kundi uraura hira hin kaburong nga an ira hunahuna nga may-ada nira kalinaw.

23Ira pinamatay in kabataan kay bahin ini han ira mga seremonyas hin pagpasakop, ginsaurog nira in hilom nga mga misteryo, ginbuhat in maglaw-ay nga mga seremonyas upod in maghilas nga mga binuhatan nga supak han kinaiya han tawo.

24Waray na nira pagtalinguhaa hin pagputli han ira kinabuhi o han ira mga pag-asawa.

25An ngatanan puro la kasamokan hin mga panmatay, panikas, panlimbong, pandaot, pagkadiri matinumanon, araway, pagbinuwa,

26panraogdaog hin waray sala nga mga tawo, pagkabungalos, pagkawaray batasan, lawasnon nga pagkamahilas, pagkabulag hin mga mag-asawa, panlibog, ngan pagkamalaw-ay.

27An pagsingba hin mga diyosdiyos, kanay mga ngaran kinahanglan diri gud igyakan, amo an tinikangan ngan an kataposan, an hinungdan ngan an dadangatan han tagsa nga karat-an.

28An mga tawo nga nagsisingba ha ira diri na nakakapugong han ira kalugaringon tungod hin labis nga kalipay, o pabay-an nga mga buwa in mga panagna, o nga mag-ukoy hin maraot nga kinabuhi, o nga waray na paghialang hin pagtalapas han ira pulong.

29Nagsusumpa hira hin mga buwa ngan diri nagpapaabot hin kastigo, kay waray kinabuhi an mga diyosdiyos nga ira sinasarigan.

30Kundi ha kataposan hinsasakban hira han kastigo tungod hin duha nga hinungdan: syahan, nagsayop hira hiunong han Dyos han pagsingba nira hin mga diyosdiyos, ngan ikaduha, gutiay la an ira pagtagad para hin pagkabaraan kay naghimo hira hin buwa nga mga yayaknon paglimbong hin mga tawo.

31Kon makasala an diri magtadong nga mga tawo, pagbibilngon hira, diri pinaagi han gahom han bisan ano nga butang nga ira ginamit hin pagsumpa, kundi pinaagi han kastigo nga angay han mga makasasala.