2 Macabeo 6 - Samarenyo Meaning-Based Bible (1984)（MBBSAM）

Ginbukod an mga Judiyo tungod han Ira Tuloohan

1Waray pag-iha katapos hini, nagsugo an hadi hin usa nga tigurang nga taga-Atenas hin pagpirit han mga Judiyo nga bayaan nira an ira tuloohan ngan mga pamatasan han ira kaapoy-apoyan.

2Iya liwat pagpapanamastamasan an Templo pinaagi hin paghalad hini ngadto kan Zeus nga diyos han Olimpo. Pagngangaranan an templo didto han Bukid Gerizim nga “Templo ni Zeus, an Sangkay han mga Lumalangyaw” sumala han hangyo han mga tawo nga nag-ukoy didto.

3Mapintas an pagtalumpigos nga haros diri mailob.

4Didto an mga Hentil pagtiroka ha Templo para hin mga pag-irignom ngan ngatanan nga buhat hin kalaw-ayan. Nakighilawas pa ngani hira didto hin mga kababayen-an nga maraot an dungog. Gindara ha sakob han Templo an igindidiri nga mga butang,

5ngan ginpuno an altar hin maghugaw nga mga halad nga tinubod nga igindiri han aton Balaod.

6Waray na gud katuman an Adlaw nga Iparahuway, an pagsaurog han naaaraan nga mga pyesta, o bisan na manla hin pagtug-an hin pagka-Judiyo.

7Ha kada bulan kon ginsasaurog an kaadlawan han hadi, an mga Judiyo ginpipirit pinaagi hin kusog hin pagkaon han mga tinae han iginhalad nga kamanampan. Niyan, ha panahon han pyesta hin pagpasidungog kan Dionisio nga diyos han bino, pinapagsul-ot hira hin korona nga balagon hin yedra ngan pinapabunyog hira han prosisyon.

8Ha pagsagdon ni Tolomeo, gintugon liwat an higrani nga Griego nga mga syudad nga piriton gud an mga Judiyo hin pagkaon han mga halad nga tinubod;

9ginsugo hira hin pagpatay han kada Judiyo nga madiri hin pagsunod han Griego nga pamatasan. Waray ruhaduha nga tiarabot in magkuri pa nga mga panahon.

10Pananglitan, gindakop in duha nga kababayen-an tungod hin pagtori han ira mga minasus-an. Iginlibot hira han syudad dara an ira minasus-an nga nagbitay ha ira mga liog; ngan katapos iginlabog hira tikang ha bawbaw han pader han syudad ngadto ha ubos.

11Dida hin lain nga higayon, ginsumatan hi Felipe nga may-ada pira nga mga Judiyo nga nagtirok didto hin usa nga hirani nga lungib hin pagtuman hin hilom han Adlaw nga Iparahuway. Ginsulong hira ni Felipe ngan ginsunog nga mga buhi hira ngatanan. Dako an ira pagtahod han Adlaw nga Iparahuway nga waray gud hira makig-away hin pagpanalipod ha ira ngahaw.

Nakastigo ngan Nalolooy an Ginoo

12Nanginginyupo ako ha iyo nga diri kamo magturaw ha iyo pagbasa hiunong han magpakalilisang nga mga butang nga nanhinabo. Pag-isipa niyo nga amo ini an paagi han Ginoo hin pagkastigo han iya mga tawo, diri hin pagpuo ha ira.

13Ngani, usa ini nga tigaman hin pagkalooy an pagkastigo dayon hin usa ka tawo tungod han iya mga sala, kay hin paghulat hin maiha nga panahon.

14Diri kita gindudumara han Ginoo sugad han iya ginbubuhat han iba nga mga nasod: naghuhulat hiya nga mapailobon tubtob nga grabe na gud an ira sala san-o hiya magkastigo ha ira,

15kundi iya ginkakastigo kita nga diri pa grabe an aton sala.

16Sanglit dayuday maloloy-on an Ginoo ha aton nga iya mga tawo. Bisan kon ginkakastigo kita niya pinaagi hin mga karat-an, diri kita ginbabayaan niya.

17Ginhimo ko ini nga akon mga hinkit-an pinaagi hin usa nga pagpahinumdom. Aton na igpapadayon an susumaton.

Namatay hi Eleazar tungod han Iya Pagtoo

18May-ada hadto usa nga tigurang na ngan tinahod gud nga magturutdo han Balaod nga ginngaranan nga Eleazar, kanay baba ginpirit hin pag-abre basi hiya makakaon hin karne nga baboy.

19-20Kundi ginpili lugod niya nga mamatay hiya nga dungganan kay nga magpadayon hin kinabuhi nga makaarawod. Sanglit iya ginluwa an karne ngan ikinalipay niya an pagkadto han dapit nga karastigohan, ha pagpakita nga kinahanglan magmaisog an mga tawo hin pagdumiri han mahugaw nga pagkaon, bisan kon ig-unong nira an ira mga kinabuhi.

21-22Mga kasangkayan ni Eleazar hin maiha na nga panahon an mga tawo nga tinaporan han halad nga tinubod, ngan tungod hini nga pagkasangkay, ira ginsiring hi Eleazar hin hilom hin pagdara hin karne nga tugot han iya balaod hin pagkaon. Kinahanglan la hiya pumasangil hin pagkaon han karne hin baboy, siring nira, ngan dida hini nga paagi diri hiya pagpapatayon.

23Kundi ginhimo ni Eleazar in usa nga larang nga takos han iya kaubanon ug kalagas na. Ha bug-os niya nga kinabuhi nag-ukoy hiya hin hingpit nga pagsugot han mga balaod han Dyos, sanglit binmaton hiya, “Pataya ako yana dayon.

24Diri angay ha akon hin sugad nga panuigon hin paglingo. Maghuhunahuna in damo nga mga batan-on nga iginsalikway ko an akon pagtoo han paglapos ko lugod hin 90 han akon panuigon.

25Kon pumasangil ako hin pagkaon hini nga karne, basi la kadugangan hin gutiay an akon kinabuhi, nagdadara ini ha akon hin kaarawdan ngan kataramayon, ngan makakapahimulag ini hin damo nga mga batan-on.

26Para yana nga panahon bangin makalikay ako han iyo bubuhaton ha akon, kundi mabuhi o mamatay man ako, diri ako makakalikay han Dyos nga Labi Kamakagarahum.

27Kon mamatay ako nga maisog yana, magpapakita ini nga takos ako han akon hilawig nga kinabuhi.

28Makakahatag liwat ini hin maupay nga susbaranan han mga batan-on kon uunanhon nira hin kamatay nga kinasingkasing ngan malipayon para han aton baraan ngan tinahod nga mga balaod.”

Katapos gud niya pagsiring hini nga mga butang, linmakat hiya basi pagkastigohon,

29ngan an mga tawo ngahaw nga nagdumara nga maloloy-on ha iya han pira pala ka mga takna nga naglabay, kinmontra na ha iya yana, kay naghunahuna hira nga naghimangraw hiya sugad hin usa nga lurong.

30Katapos nira paglatoba ha iya nga haros na hiya mamatay, nangaraba ngan nagsiring hiya, “An Ginoo maaram han ngatanan. Maaram hiya nga makakalikay unta ako hini nga makalilisang nga mga pag-antos ngan kamatayon, kundi maaram liwat hiya nga gin-antos ko nga malipayon ini nga mga butang, kay nahadlok ako ha iya.”

31Sanglit namatay hi Eleazar. Kundi an iya maisog nga kamatayon gindumdom nga usa nga dungganan nga susbaranan, diri la han mga batan-on, kundi liwat han bug-os nga nasod.