Numero 9 - Samarenyo Meaning-Based Bible (1984)（MBBSAM）

Ginsaurog an Ikaduha nga Paglabay

1Naghimangraw kan Moises an Ginoo didto han Kamingawan han Sinai, dida han syahan nga bulan han ikaduha ka tuig katapos bumaya han Ehipto an mga tawo han Israel. Nagsiring hiya,

2-3“Dida han ika-14 nga adlaw hini nga bulan, nga matikang dida han pagkatunod han adlaw, pagsasaurogon han mga tawo han Israel an Paglabay, sumala han ngatanan nga mga turumanon ngan mga lagda para hini.”

4Sanglit ginsiring ni Moises an mga tawo nga pagsaurogon an Paglabay,

5ngan ginbuhat nira ini dida han gab-i han ika-14 nga adlaw han syahan nga bulan didto han Kamingawan han Sinai. Ginbuhat han mga tawo an ngatanan sumala han iginsugo han Ginoo kan Moises.

6Kundi may pipira ka tawo nga maghugaw sumala han seremonyas kay kinmapot hira hin minatay, ngan waray hira pakagsaurog han Paglabay dida hito nga adlaw. Kinmadto hira kanda Moises ug Aaron

7ngan nagsiring, “Mahugaw kami kay kinmapot kami hin minatay, kundi kay ano nga diri kamo ig-uupod han iba nga mga Israelita hin pagdara han halad ngadto han Ginoo?”

8Binmaton hi Moises, “Hulat kamo tubtob han pakakarawat ko hin mga tugon tikang han Ginoo.”

9Ginsiring han Ginoo hi Moises

10nga sidngon an mga tawo han Israel, “Kon mahugaw in bisan hin-o ha iyo o han iyo mga tulin tungod hin pagkapot hin minatay o kon hirayo hiya didto ha paglalaktan, kundi karuyag gihapon magsaurog han Paglabay,

11tinutugotan kamo hin pagsaurog hini dida han sunod nga bulan, dida han gab-i han ika-14 nga adlaw han ikaduha nga bulan. Pagsauroga ini pinaagi hin tinapay nga waray patubo ngan hin magpait nga mga dahon nga utanon.

12Ayaw pagsalin hin bisan ano han pagkaon tubtob han pagkaaga ngan ayaw pagbaria in bisan ano han mga tul-an han hayop. Pagsauroga an Paglabay sumala han ngatanan nga mga turumanon.

13Kundi an bisan hin-o nga malinis sumala han seremonyas ngan diri aadto hin paglalaktan ngan diri nagsasaurog han Paglabay, diri na hiya pag-iisipon nga kausa han akon mga tawo, kay waray niya maghalad ha akon dida han igintalaan nga panahon. Kinahanglan mag-antos hiya han mga bunga han iya sala.

14“Kon karuyag magsaurog han Paglabay in usa nga lumalangyaw nga nag-uokoy dida ha iyo, kinahanglan pagsaurogon niya ini sumala han ngatanan nga mga turumanon ngan mga lagda. Amo la gihapon an balaod an pagsusundon han ngatanan, ma tuminungnong o lumalangyaw.”

Pinmakita an Nagkakalayo nga Dampog(Ex. 40:34-38)

15-16Dida han adlaw han katindog han Tulda han Ginoo, inmabot in usa nga dampog ngan natahuban an Tulda. Ha gab-i kalayo pagkit-on an dampog.

17Kada pagtitipaigbaw han dampog, nabalhin hin kampo an mga tawo han Israel, ngan nagkakampo liwat hira didto han dapit nga hinuhugdonan han dampog.

18Nabalhin hin kampo an mga tawo ngan nagkakampo liwat hira sumala han sugo han Ginoo. Samtang nagpapabilin an dampog ha igbaw han Tulda, nagpapabilin man hira dida han ira ginkampohan.

19Kon nagpapabilin an dampog ha igbaw han Tulda sulod hin maiha nga panahon, nagsusugot hira han Ginoo ngan diri hira nabalhin.

20Usahay nagpapabilin an dampog ha igbaw han Tulda sulod hin pira la ka adlaw; ha bisan ano nga kaiha, nagpapabilin o nabalhin hira hin kampo sumala han sugo han Ginoo.

21Usahay nagpapabilin an dampog tikang la ha gab-i ngada han pagkaaga, ngan nabalhin hira dayon kon napaigbaw na an dampog. Nabalhin hira ha kada pagtitipaigbaw han dampog.

22Bisan duha la ini ka adlaw, usa ka bulan, usa ka tuig, o mairoiha, samtang nagpapabilin an dampog ha igbaw han Tulda, diri hira nabalhin; kundi kon napaigbaw na ini, nabalhin hira.

23Nagkakampo hira ngan nabalhin hin kampo ha pagsugot han mga sugo nga iginhatag han Ginoo pinaagi kan Moises.