14 Amo ini in usa nga kopya han pasangyaw: “Hi Hadi Asuero an Harangdon, nagpapadara hinin masunod nga mga pasangyaw ngadto han mga gobernador han 127 niya nga mga lalawigan, tikang ha India ngadto ha Sudan, ngan ngadto han mga opisyal nga ubos ha ira:
15 “Han kahimo ko nga hadi hin damo nga kanasoran ngan agaron han bug-os nga kalibutan, gintinguha ko nga kinahanglan dayuday mag-ukoy ha kalinaw an akon mga sakop. Akon ini karuyag diri tungod hin pagparayaw han akon gahom, kundi tungod nga dayuday ginbibiling ko an matadong ngan gin-uupay ko an pagdumara han akon mga sakop. Gintinguha ko hin pagbag-o han kalinaw nga ginhihingyap han tagsatagsa ngan pagbuhat han ginkikinahanglan hin pagtukod hin usa nga ginhadian nga bungtohanon an pamatasan, ngan waray kakulba ha paglakaton tikang ha usa ngadto ha lain nga pag-ultan.
16 “Ginpakianhan ko an akon mga magsaragdon kon uunanhon hin pagtuman hini nga panuyo, ngan naghatag hi Aman hin usa nga sagdon. Kinikilala hiya namon sugad nga usa ka tawo nga may dako nga kinaadman, ngan ha ngatanan nga panahon iginpakita niya an iya panginlabot para han kaupayan han ginhadian. Tungod han iya marig-on nga kamaugopon, ibinutang hiya didto han ikaduha nga gihahataasi nga katungdanan han ginhadian.
17 Diri pa la maiha nagsumat ha amon hi Aman hiunong hin usa nga masupilon nga mga tawo nga tampo han iba nga mga tawo han ginhadian. Iya iginsaysay ha amon nga may-ada ini nga mga tawo ira kalugaringon nga mga balaod, nga nasupak hira han tagsa nga iba nga nasod, ngan dayuday la nga nagpapasibaya hira han hadianon nga mga sugo. Tungod hini nga ira ginawian, diri kita nakakahimo hin pagtukod hin urosa nga pamunoan nga aton ginhihingyap hin kinasingkasing para han ginhadian.
18 “Nakontra ini nga mga tawo han aton pamunoan ngan nagbubuhat hin magpakalilisang nga mga pagtalapas nga nakakadaot han kahimyangan han ginhadian. Nagsusunod hira hin lain nga mga pamatasan, nagsusugot han kalugaringon nira nga mga balaod, ngan hira la an nagpabilin dida han ira dayuday nga pagsupak han bug-os nga katawhan.
19 Tungod hini nga mga kamatuoran, amon igin-aaghat nga pagpuohon ini nga mga tawo nga hinnanabihan ni Aman nga aton primero ministro. Ngatanan hira, lakip an kababayen-an ngan kabataan, kinahanglan pamatayon; waray gud bisan usa ha ira nga mahibilin. Aton hira mga kaaway; diri kita sadang malooy ha ira. Kinahanglan pagtumanon ini nga sugo yana nga tuig dida han ika-14 nga adlaw han ika-12 nga bulan, an bulan han Adar.
20 Ini nga mga tawo nga nakahatag hin damo nga kasamokan hin maiha na nga panahon, magkakamatay ngatanan hin makalilisang nga kamatayon sakob la hin usa ka adlaw. Niyan magmamahimyang ngan magmamarig-on na liwat an aton pamunoan.”
Who We AreWhat We EelieveWhat We Do
2025 by iamachristian.org,Inc All rights reserved.
