JONI 2 - Ai Vola Tabu Ena Vakavakadewa Vou（FNV）

Na Vakamau mai Kena

1Ena i katolu ni siga, sa qai caka e dua na vakamau mai na koro o Kena mai Kalili. A tiko kina na tina i Jisu,

2ka ratou a bau sureti talega ki na vakamau ko Jisu kei iratou na nona tisaipeli.

3Ia ni sa oti na waini, sa qai kaya vei Jisu o tinana, “Sa oti vei ira oqo na waini.”

4Sa qai kaya vua ko Jisu, “Yalewa, a cava me daru mai leqataka kina? E se bera ni yaco mai na noqu gauna.”

5A sa qai kaya ga vei ira na dauveiqaravi o tina i Jisu, “Na ka kecega e kaya vei kemudou o koya, dou cakava.”

6E tu ena tikina o ya e ono na saqa vatu ni wai, ka rauta ni dua na drau na lita na levu ni ka e rawa ni ra tawana yadudua, ka ra dau vakasavasavataki ira kina na Jiu.

7Sa qai kaya vei ira ko Jisu, “Dou vakasinaita na saqa ena wai.” E ratou sa qai vakasinaita sara na saqa kece o ya.

8Sa qai kaya tale vei ira o koya, “Dou takiva ka kauta yani vua na i liuliu ni soqo.” E ratou sa qai kauta yani na wai,

9na kena ka sa vukici tu oqo me waini, ka sa tovolea sara na i liuliu ni soqo. E a sega ni kila o koya se kau mai vei (ia o iratou ga na dauveiqaravi era a takiva yani na wai sa kila tiko); a sa qai kaciva na tagane vou

10ka kaya vua, “Na tamata kecega era dau solia taumada e liu na waini vinaka duadua, ia ni sa oti toka na nodra gunu vakalevu na vulagi, era na qai solia na waini vinaka vakarauta ga. Ia o iko sa maroroya tikoga na waini vinaka duadua me yacova sara mai na gauna oqo!”

11A sa vakayacora ko Jisu na i matai ni nona cakacaka mana oqo ena koro o Kena mai Kalili. E a vakatakila mai kea na nona kaukauwa, ka ratou sa vakabauti koya na nona tisaipeli.

12

18Era sa qai sauma na Jiu, ka kaya vua, “Na cakacaka mana cava e rawa ni o cakava me vakaraitaki kina vei keimami ni sa dodonu na ka o cakava?”

19Sa qai kaya vei ira ko Jisu, “Dou talaraka sobu ki ra na vale oqo, ka'u na tara cake tale ena tolu na siga.”

20Era sa qai kaya kina na Jiu, “Na vale oqo sa tara ena loma ni 46 na yabaki, ia o na tara cake tale li ena tolu ga na siga?”

21Ia na valenisoro sa tukuna tiko oqo ko Jisu sai koya na yagona ga.

22Ia ni sa vakaturi cake tale mai na mate, e ratou sa qai nanuma na tisaipeli ni a sa tukuna oti vei iratou o koya na veika oqo, ka ratou sa vakadinata kina na i Vola Tabu kei na vosa i Jisu.

Sa Kila na Tamata Kece ga ko Jisu

23Ena nona a tiko voli mai Jerusalemi ko Jisu ena gauna ni Solevu ni Lakosivia, sa lewe vuqa sara era sa vakabauti koya ena vuku ni nodra raica na veika mana sa vakayacora.

24Ia sa sega ga ni nuitaki ira kece sara ko Jisu, baleta ni sa kilai ira vakavinaka kece sara.

25A sa sega ni yaga vua me dua e tukuna vua na ka e baleta na tamata, ka ni sa kila o koya na ka e tu e loma ni tamata.