SAKARAIA 1 - Ai Vola Tabu Ena Vakavakadewa Vou（FNV）

Kacivi Ira na Nona Tamata me Ra Lesu Vua

1 Esera 4.24—5.1; 6.14 Na i tukutuku oqo sa solia ko Jiova vei Sakaraia na parofita ena i kawalu ni vula ni karua ni yabaki ni veiliutaki voli o Taraiasi na tui Perisia. O Sakaraia e luve i Berekaia, e tama i Berekaia o Ito.

2A sa tukuna vei Sakaraia ko Jiova ni lewevuqa me kaya vei ira na tamata, “Oi au ko Jiova, ka'u a cudruvi ira vakalevu sara na nomuni qase e liu.

3Ia oqo, me'u kaya vei kemuni, ‘Ni lesu mai vei au, ka'u na qai lesu yani vei kemuni.

4Ni kakua sara ni vakataki ira na nomuni qase e liu. Era a solia vei ira na noqu i tukutuku o ira na parofita era a bula tu ena gauna makawa sara, ka tukuni kina vei ira me ra sa kakua soti ni bula voli ena i valavala ca. Ia era a sega ni vakarorogo se ra talairawarawa vei au.

5Era sa tiko beka evei na nomuni qase oqori ena gauna oqo? Era se bula tiko beka o ira na parofita o ya?

6Ia na i vakasala kei na i vakaro kecega au a solia yani mai vei ira na noqu tamata na parofita sa la'ki toboki ira na nomuni qase ka totogitaki ira. Ia e muri, era sa qai veivutuni ka vakadinadinataka ni oi au ga, ko Jiova ni lewevuqa, au a totogitaki ira me veiganiti kei na nodra i tovo, me vaka ni a sa noqu i naki tudei me'u vakayacora vaka kina.’”

Ai Matai ni Raivotu: Na Dauvodo Ose

7Ena i ka 24 ni siga ni katinikadua ni vula (na vula o Sebati), ena i karua ni yabaki vakatui i Taraiasi, e a solia kina vei au ko Jiova e dua na i tukutuku mai na dua na raivotu ena bogi.

8Vtaki 6.4; Vtaki 6.2Au a raica e dua na agilosi i Jiova ni vodoka voli e dua na ose damudamu. E a mai tu vakadua ena loma ni veimateli ena dua na buca, ka ra tu talega mai dakuna eso tale na ose — na ose damudamu, na ka vula kei na ka tavutonotono.

9Au a qai taroga na agilosi, “A cava saka na kedra i balebale na ose eso oqo?”

E a sauma o koya, ka kaya, “Au na vakaraitaka vei iko se cava na kedra i balebale.

10A vakatalai ira mai na dauvodo ose oqo ko Jiova me ra mai vakaraica na vuravura.”

11E ratou a mai tukutuku na tamata vodo ose vua na agilosi, ka ratou kaya, “Keitou sa taleva mai na veiyasa i vuravura kecega, ka keitou kunea ni sa tu leqa tu o vuravura taucoko ka sa vakamalumalumutaki sobu.”

12A sa qai kaya na agilosi, “Oi kemuni Jiova ni lewevuqa, sa yabaki vitusagavulu vata oqo na nomuni cudruvi Jerusalemi tiko kei na veikoro lelevu e Juta. Ena vakacava soti tale beka na dede ni gauna ni bera ni o ni qai vakaraitaka kina vei ira na nomuni yalololoma?”

13A sa qai sauma ko Jiova vua na agilosi ena vosa ni veivakacegui,

14ka sa qai tukuna vei au na agilosi me'u kacivaka na ka sa tukuna ko Jiova ni lewevuqa, ni a kaya, “Sa titobu sara na noqu loloma kei na noqu kauwaitaki Jerusalemi, na noqu koro tabu.

15Au sa cudruvi ira vakalevu na veimatanitu era tu ena dua na bula rawarawa sara. Ena gauna au a vakadaroya tiko kina na noqu cudruvi ira na noqu tamata, era sa qai cakacaka nodra ga na veimatanitu oqo, me ra vakacacani ira vakalevu cake na noqu tamata.

16Au sa mani lesu tale mai kina ki Jerusalemi me'u mai vakaraitaka na noqu yalololoma ki na koro levu oqo. Ena vakarokorokotaki tale na noqu Valenisoro, ka na tara vou tale na koro.”

17E a tukuna talega vei au na agilosi me'u kacivaka na i tukutuku oqo, “Sa tukuna ko Jiova ni lewevuqa ni ra na vuavuai tale na nona veikoro, ena vukei Jerusalemi tale vakadua o koya ka okata me nona.”

Ai Karua ni Raivotu: Na i Leu

18Au a raica ena dua tale na raivotu e va na i leu ni bulumakau.

19Au a mani taroga na agilosi se cava na kedratou i balebale.

A sauma o koya, ka kaya, “Oqo e ratou vakatakilakilataki ira na veimatanitu kaukauwa e vuravura, o ira era a vakavuna na nodra veiseyaki na Juta, kei ira na Isireli, kei ira na kai Jerusalemi.”

20Ni oti o ya sa qai vakaraitaka vei au ko Jiova e lewe va na matai ni kaukamea e ratou tauri i tukituki tu.

21Au a qai taroga na agilosi, ka'u kaya, “A cava e ratou mai cakava na tamata oqo?”

A sauma o koya, ka kaya, “E ratou lako mai me ratou mai vakarerei ira ka vakamalumalumutaki ira na veimatanitu era a vakamaduataka vakaca na vanua o Juta, ka ra vakavuna na nodra veiseyaki na lewena.”