2 VEIGAUNA 12 - Ai Vola Tabu Ena Vakavakadewa Vou（FNV）

Valuti Juta o Ijipita(1Tui 14.25-28)

1Ena gauna ga e vakataudeitaka kina o Reopoama na nona i tutu vakatui, ka sa toso cake na nona kaukauwa, a sa biuta o koya kei ira na Isireli vata kaya na Lawa i Jiova.

2Ena i kalima ni yabaki ni veiliutaki vakatui nei Reopoama, a sa saumi lesu kivei ira na nodra talaidredre vei Jiova. A sa valuti Jerusalemi o Sisaki na tui Ijipita

3kei na 1,200 na lewe ni nona i mataivalu vodo qiqinivalu, kei na 60,000 na lewe ni nona mataivalu vodo ose, ka sega ni wiliki rawa na levu ni sotia e okati kina o ira na kai Libiya, Sukimi, kei Eciopea.

4A sa vesuka na veikoro vakabai e Juta me la'ki yaco sara ki Jerusalemi.

5A lako o Semaia na parofita vei Reopoama kei ira na veiliutaki e Juta era sa soqoni vata yani ki Jerusalemi ena vuku i Sisaki. A sa kaya vei ira, “Sa kaya vakaoqo ko Jiova: ‘O ni sa biuti au, ia au sa na biuti kemuni ki na liga i Sisaki.’ ”

6A sa vakadinadinataka na tui kei ira na nodra qase na Isireli na nodra cala, ka tukuna vakaoqo: “Sa dodonu vinaka na ka sa kitaka ko Jiova.”

7Ia ni raica ko Jiova ni ra a vakamalumalumutaki ira, a qai yaco mai na vosa i Jiova vei Semaia, ka kaya, “Me vaka ni ra sa vakadinadinataka na nodra cala, au na sega kina ni vakarusai ira. Ia era na vakabulai vakavoraki ena gauna e kabai ira kina vakaivalu o Sisaki. Ena sega ni vakila na noqu cudru taucoko o Jerusalemi,

8ia era na bale ga ena liga i Sisaki ka ra nona bobula, me ra kila kina na duidui ni qaravi au kei na qaravi ira na i liuliu vakavuravura.”

9 1Tui 10.16,17; 2Vei 9.15,16 A sa lako mai o Sisaki na tui Ijipita, a sa valuti Jerusalemi ka kauta lesu me i tokinivalu na i yau talei mai na Valenisoro kei na valenitui. E a kauta na veika kecega, ka okati kina na i sasabai koula eso ka a cakava o Solomoni na tui.

10E a qai vakaisosomitaka oqo o Reopoama na tui ena i sasabai parasa, ka solia vei ira sa lesi me ra dau yadrava na katuba ni valenitui.

11Ena veigauna kece e curu yani kina na tui ki na Valenisoro, ena salavata mai na matayadra ni ra kauta voli na i sasabai, ni bera ni vakasukai tale ki na rumu ni matayadra.

12Me vaka ni a vakamalumalumutaki koya ena mata i Jiova, sa sega kina ni vakarusai koya vakadua ko Jiova. A basika eso na veika vinaka e Juta.

Tukutuku Lekaleka ni Veiliutaki i Reopoama

13A sa vakataudeitaki koya o Reopoama me tui e Jerusalemi ka sa veiliutaki kina. E a yabaki 41 o koya ena gauna sa buli kina me tui, ka veiliutaki tiko mai Jerusalemi me yabaki tinikavitu, na koro ka sa digitaka ko Jiova mai na veivanua kecega e Isireli me i tikotiko ka vanua me dau qaravi kina. Na yaca i tinai Reopoama o Neema, na yalewa ni Amoni.

14A sa cakava o koya na veika ca, baleta ni a sega ni via tovolea me vakasaqara na loma i Jiova.

15Na cakacaka kece sara i Reopoama, mai na kena i vakatekivu ki na kena i otioti, kei na i tukutuku e baleta na nona vuvale sa volai ena i Vola Tukutuku i Semaia na Parofita kei na i Vola Tukutuku i Ito na Parofita. A sa sega ni mudu na nodrau dau veivala vakawasoma o Reopoama kei Jeropoama.

16A sa mate o Reopoama ka bulu vata kei ira na nona qase ena Koro i Tevita; ka sa buli o Apaijia na luvena me kena i sosomi.