1Ni vakacaucautaki Jiova!
Ni vakacaucautaka na yacana, oi kemuni na tamata i Jiova,
2Oi kemuni sa tucake tu ena vale i Jiova,
Ena lomanibai ni Valenisoro ni noda Kalou.
3Ni vakacaucautaki Jiova, ni sa rui vinaka o koya,
Ni sere ena vakacaucautaka na yacana, ni sa yalovinaka o koya.
4Sa digitaki Jekope ga o koya me nona,
Io, o ira na Isireli me ra nona i yau talei.
5Au sa kila ni sa cecere ko Jiova,
Sa cecere cake o koya mai vei ira kecega na veikalou.
6Sa cakava na ka ga e vinakata o koya,
Mai lomalagi, se e dela i vuravura,
E wasawasa, se ena boto ni wasawasa.
7Sa kauta mai na kabu mai na i yalayala kei vuravura,
Sa vakavuna me tibi na liva me tau kina na uca,
Ka sa kauta mai na cagi mai na nona vale ni yau.
8Mai Ijipita, sa vakamatei ira kina na ulumatua
Ni tamata vata kei na manumanu.
9Sa cakava mai kea o koya eso na i vakatakilakila
Kei na cakacaka veivakurabuitaki eso,
Me totogitaki tui Ijipita kina kei ira na nona tamata.
10Sa vakarusa o koya e vuqa na veimatanitu,
Ka vakamatei ira na tui qaqa ni veivanua eso.
11O Sioni na nodra tui na Amoraiti,
O Oki na tui Pasani,
Kei ira kece na tui eso mai Kenani.
12A sa solia na nodra vanua vei ira na nona tamata;
Sa solia ga o koya vei ira na Isireli.
13I Jiova, era na kila tikoga na tamata ena veigauna kece
ni sai kemuni ga na Kalou;
Era na nanumi kemuni na veitabatamata kecega.
14Ko Jiova ena totaki ira na nona tamata;
Ena vueti ira na nona dauveiqaravi.
15Na nodra veikalou matakau na veimatanitu
era sa buli ga ena siliva kei na koula;
Era sa cakava ga na liga ni tamata.
16Sa tu na gusudra, ia era sega ni vosa rawa,
Ka tu na matadra ia era sega ni rai rawa.
17Sa tu na daligadra, ia era sa sega ga ni rogo rawa,
A sa sega na i cegu ena gusudra.
18Me qai veiucui ga vakataki ira na matakau o ya
o ira yadua era sa bulia ka ra vakararavi kina!
19Kemuni na Isireli, ni vakacaucautaki Jiova,
Kemuni na nona bete na Kalou, ni vakacaucautaki koya.
20Kemuni na Livai, ni vakacaucautaki Jiova,
Ni vakacaucautaki Jiova, oi kemuni kece sa cuva vua.
21Ni vakacaucautaki Jiova mai Saioni,
O koya sa tiko e Jerusalemi.
Ni vakacaucautaki Jiova!
Who We AreWhat We EelieveWhat We Do
2025 by iamachristian.org,Inc All rights reserved.
