JOPE 16 - Ai Vola Tabu Ena Vakavakadewa Vou（FNV）

Vakadeitaka o Jope na Nona Tawa Cala

1A qai vosa o Jope, ka kaya,

2Na vosa vaka oqori au sa rogoca oti e liu;

Na veivakacegui o dou sa mai solia

E veivakararawataki wale ga.

3O dou sa na vosa tiko beka ga

Ka sega ni mudu rawa?

Mo dou na dau tauca beka ga oi kemudou

Na i otioti ni vosa?

4Kevaka mada me datou veisau,

Mo dou vakataki au o kemudou,

Ena rawa sara ga vei au me'u tukuna

Na ka kecega o dou tukuna tiko.

Au rawa ni kureitaki ulu vakavuku

Ka vakaluvuci kemudou ena levu na vosa.

5Au na rawa ni vakaukauwataki kemudou ena vosa ni vakasala

Ka tauca tikoga na vosa mo dou vakacegui kina.

6Ia sa sega ga ni yaga na ka au sa tukuna voli.

Na tiko vagagalu talega

Ena sega sara ni vukea na noqu mosi.

7Kemuni na Kalou, o ni sa vakaocai sara ga o kemuni;

O ni a vakalaiva me ra vakamatei na noqu vuvale.

8O ni sa vesuki au. Oi kemuni na kequ meca.

Au sa lila sara ga ka suivotu,

Ka ra sa vakabauta na tamata ni oqo na i vakadinadina ni noqu cala.

9Ena levu ni cudru ni Kalou sa qai basuraki au;

Ka vakawaqa vei au na matana ni cudru.

10Era vakadudu gusu ka vakidi ucu vei au na tamata;

Era oso wavokiti au ka ra sabaka na mataqu.

11Sa soli au na Kalou vei ira na tamata ca.

12Au a tiko voli ena vakacegu,

Ka qai taura vakaukauwa na domoqu na Kalou

Ka buturaki au, ka vorolaki au.

Sa vakayagataki au o koya me'u nona takete ni vuli vana

13Me qai vanalaki au mai na veiyasana kecega ena dakaititi

Ena gasau ni dakaititi era cobacoba vei au

Ka vakamavoataki au.

Ia ni sa vaka tu oqori,

E sega ga ni bau vakaraitaka vei au na nona loloma.

14Sa vakamavoataki au mada,

Ka sa vakamavoataki au tale;

Ni sa vaka sara ga e dua na sotia

Sa lialia ka sinai ena cudru.

15Au sa vakaloloku tiko ka vakaisulu ena i sulu taga,

Ka'u sa qai mai dabe tiko ena kuvu ni qele eke,

Ka'u sa vakamalumalumutaki sara ga.

16Au a tagi tiko ka yacova ni damudamu mai na mataqu,

Ka vuvuce na dakudaku ni mataqu,

Ka levu na i yaloyalo ni ka e ra tu wavoki e mataqu,

17Ia au a sega ga ni vakayacora e dua na i tovo kaukauwa,

Kei na noqu masu talega vua na Kalou e masu dina sara ga.

18O iko, na qele, mo kakua sara ni vunia na ca sa caka vei au!

Kakua sara ni vakalaiva me vagalui

Na noqu kaci ni vakasaqara na lewa dodonu!

19 Jope 19.25 E dua e tiko mai lomalagi

Ena tucake ena vukuqu me totaki au.

20Au vinakata me raica na wai ni mataqu na Kalou

Ka rogoca talega na noqu masu.

21Au sa vinakata e dua me cikecike vua na Kalou ena vukuqu,

Me vaka e dua na tamata ka cikecike ena vuku ni wekana.

22Sa sivi tiko yani na noqu veiyabaki,

Ka'u sa lakova tiko oqo na sala ena sega ni lesuvi tale mai.