1I Jiova na noqu Kalou, au sa lako mai vei kemuni oqo me'u taqomaki;
Ni vueti au ka vakabulai au mai vei ira kecega sa vakacemuri au.
2De ra na colati au yani me vaka e dua na laione,
Ki na dua na vanua sa sega na tamata me vakabulai au rawa kina;
Ka ra qai dresulaki au vakamatailalai mai kea.
3I Jiova na noqu Kalou, ke'u sa vakayacora oqo,
Kevaka sa tiko ena ligaqu na ca:
4Ke'u sa sauma ga na ca vua na noqu i tokani,
Se i tovo kaukauwa vua na noqu meca ka sa segai na vuna;
5Me ra qai vakasavi au na noqu meca ka ra vesuki au,
Me ra qai laivi au me'u davo matemate koto ena dela ni qele.
6Me toro cake na nomuni cudru Jiova,
Ka saqata na nodra cudru na noqu meca.
Ni yadra mai ka vukei au,
Baleta ni o ni sa dau vinakata na dodonu.
7Ni kauti ira vata mai na tamata,
Era tu wavokiti kemuni ka mo ni vakatulewa tiko vei ira mai cake.
8Jiova sai kemuni na nodra turaganilewa na tamata kecega;
Ni tauca na nomuni lewa vei au,
Me vakatau ga ki na noqu i vakarau ni'u sa yalododonu ka vinaka.
9Ni tarova na nodra i valavala ca na tamata ca,
Ka'u kerei kemuni mo ni saumi ira na yalododonu.
Sa i kemuni na Kalou yalosavasava,
O ni sa dau vakatovolea na vakasama kei na yalo.
10Sa noqu dauveitaqomaki na Kalou,
Sa dau vakabulai ira era talairawarawa vua.
11Sa turaganilewa dodonu na Kalou,
Ka sa dau cudruvi ira tikoga na tamata i valavala ca.
12Kevaka era sega ni veivutuni na tamata,
Ena vagata sara na nona vosa na Kalou.
Sa loveca na nona dakaititi ka vakarau tu;
13Sa taura cake na nona i yaragi ni veivakamatei
Ka vakadodonutaka na nona gasau ni dakaititi sa waqa tu.
14Raica mada na i tovo
ni nona vakasamataka na ka ca na tamata i valavala ca;
Sa bukiveretaka na lewa,
Ka vakayacora na veivakacalai.
15Sa kelia e dua na qara titobu ki na qele
Ia sa qai lutu talega ki na nona qara!
16Ia sa totogitaki koya ga na nona ca
Ka sa vakaleqai koya ga na nona i tovo kaukauwa.
17Au na vakavinavinakataki Jiova ena vuku ni nona lewa dodonu,
Ka'u na lagata na veisere ni veivakacaucautaki vei Jiova na Kalou cecere.
Who We AreWhat We EelieveWhat We Do
2025 by iamachristian.org,Inc All rights reserved.
