1Sa Cecere ga ko Jiova ka dodonu me vakacaucautaki vakalevu
Ena koro ni nodra Kalou, ena nona ulunivanua tabu.
2 Maciu 5.35 Sa cecere ka totoka na ulunivanua ni noda Kalou, o Saioni;
Sa kauta mai na reki ki na vuravura taucoko na nona koro na Tui cecere.
3Sa vakaraitaka na Kalou ni sa tu vua na veitaqomaki vinaka
ena veitikotiko sa lesi me ra i drodro ena loma ni koro.
4Era sa soqoni vata na tui,
Ka ra mai valuta na ulunivanua o Saioni.
5Ia, era sa qai kurabui ga ni ra sa sarava;
Ka sa tuburi ira mai na rere ka ra veidroyaki.
6A sa yacovi ira na rere kei na taqaya e kea
Me vaka e dua na yalewa sa vakarau vakasucu.
7Me vaka na vakarusai ni waqa lelevu ena cagi kaukauwa.
8Keimami a dau rogoca na ka e dau cakava na Kalou,
Ka keimami sa qai vakadinadinataka oqo
Ena koro ni noda Kalou ko Jiova ni lewevuqa;
Ena taqomaka vinaka na koro o koya ena veigauna kecega.
9Ena loma ni nomuni Valenisoro, oi kemuni na Kalou,
Keimami sa vakananuma kina na nomuni loloma tudei.
10O ni sa vakacaucautaki mai vei ira na tamata mai na veivanua kecega
Ka sa tete yani na kemuni i rogorogo ki na vuravura taucoko.
O ni sa dauvakataulewa ga ena dina kei na dodonu;
11Ni laiva me ra marau na lewe i Saioni!
O ni sa dau vakotora na lewa dodonu;
Ni laiva me yaco na reki ena veikoro e Juta!
12Oi kemuni na tamata ni Kalou,
Ni lako wavokiti Saioni ka wilika na kena veivale cere-i-cake;
13Dikeva mada na kena bai ka vakaraica vinaka na kena lalaga.
Ka mo ni qai talanoataka vei ira na i tabatamata e tarava.
14Ni Kalou oqo e noda Kalou ka sega ni mudu;
Ena liutaki keda tikoga ena veigauna kecega sa bera mai.
Who We AreWhat We EelieveWhat We Do
2025 by iamachristian.org,Inc All rights reserved.
