1“Ni vakacegui ira, ni vakacegui ira na noqu tamata!
Sa kaya na nomuni Kalou!
2Vakayaloqaqataki ira na lewe i Jerusalemi.
Kaya vei ira ni sa balavu mai na nodra vakararawataki,
ka sa bokoci na nodra i valavala ca.
Sa saumi taucoko sara vei ira na nodra i valavala ca.”
3 Maciu 3.3; Mari 1.3; Joni 1.23 Luke 3.4-6Sa rogo mai e dua na domo,
“Dou vakarautaka na sala i Jiova ena vanua lala!
Samaka na sala ni noda Kalou ena vanua dravuisiga!
4Ena vakaceceretaki na buca kecega,
Ka na vakatautauvatataki na veiulunivanua,
kei na veivanua cecere kecega;
Ka vakalogalogavinakataki na vanua sa sukusukura.
5Ia sa na qai vakaraitaki mai na lagilagi i Jiova,
ka ra na raica na tamata kecega.
Ko Jiova sara ga vakaikoya sa yalataka na ka oqo.
6 Jeme 1.10,11; 1Pita 1.24,25 A sa kaya e dua na domo, “Mo kacivaka!”
Au a qai taroga, “Na cava me'u kacivaka?”
Sa tautauvata kei na co na tamata kecega,
Ka ra sa sega ni dede cake mai na senikau ni vanua.
7Sa dau malai na co ka mira na senikau,
ni sa tala mai na cagi ko Jiova me liwava.
Sa dina sara ni sa vaka ga na co na tamata.
8Io, sa dau malai na co ka mira na senikau,
Ia na vosa ni Kalou ena tudei ga ka sega ni mudu.
9Mo cabe cake ki na ulunivanua cecere i Jerusalemi,
ka kacivaka yani na i tukutuku vinaka!
Kailavaka yani ena domo levu, Saioni;
ka tukuna na i tukutuku vinaka!
Vosa yani ka kakua ni rere!
Tukuna ki na veikoro e Juta
ni sa lako tiko mai na nodra Kalou!
10 Aisea 62.11; Vtaki 22.12 Raica, sa lako mai na Turaga ko Jiova me veiliutaki ena qaqa,
Ka sa kauti ira mai na tamata sa vakabula o koya.
11 Isi 34.15; Joni 10.11 Ena qaravi ira na nona qele ni sipi
me vaka e dua na i vakatawa;
Ena soqoni ira vata kece mai na lami,
ka keveti ira e ligana;
Ena tuberi ira yani vakamalua na tinadra.
Na Kalou Vakasakiti nei Isireli12O cei na tamata sa vakarautaka rawa na wasawasa
ena qeteqete ni ligana?
Se na lomalagi ena i qaqalo ni ligana?
E rawa li vua e dua na tamata
me na taura tu na qele kei vuravura ena dua na bilo?
Se vakarautaka na veiulunivanua kei na veidelana ena dua na i vakarau?
13 Roma 11.34; 1Kori 2.16 E rawa li ni dua na tamata me tukuna vei Jiova na ka me cakava?
O cei e rawa ni vakavulici Jiova se vakasalataki koya.
14E sa bau taro i vakasala vei cei na Kalou.
O cei e vakavulici koya ena lewa dodonu
Se vakavulici koya ena vuku?
15Sa ka wale ga vei Jiova na veimatanitu,
Era sa vaka wale ga e dua na turu ni wai mai na dua na vokete;
Era sa vaka ga na kuvu ni qele ena i vakarau ni bibi,
Ka ra sa mamada na veiyanuyanu yawa me vaka na kuvu.
16Na manumanu yava i va kece ena veikau mai Lepanoni
Sa lailai me i soro vua na noda Kalou
Ka lailai talega na kena kau me vakamai kina!
17Sa tawa yaga, ka, ka wale ga vua na veimatanitu.
18 Caka 17.29 O cei me vakatautauvatataki rawa kei na Kalou
Se me vakatauvatani kei na cava o koya?
19Sa sega ni vakataka na matakau era taya na matai,
Ka ra qai ukutaka ena koula na matai ni kaukamea
Ka cakava na kena sinucodo siliva.
20Na tamata e sega ni rawata na siliva se na koula
Ena digitaka na kau e sega ni vuca rawa.
Ena vaqara e dua na matai maqosa
Me taya e dua na matakau e sega ni rawa ni yavala.
21O ni sega li ni kila? O ni sega li ni rogoca?
E sega li ni tukuni vei kemuni ena gauna e liu?
22Ni a bulia o koya e dabe tiko ena i tikotiko vakaturaga,
Ena dela i vuravura sivia na lomalagi.
Na tamata era tu ka rairai lalai sara vaka na vodre.
Sa tevuka yani na lomalagi me vaka na i latilati,
Ka vaka na valelaca me ra tiko kina na tamata.
23Sa i koya sa vakasivoi ira na tui
Ka vukici ira na i liuliu qaqa me ra ka wale ga.
24Era sa vaka na kau gone
Era sa qai tubu cake ka vakawakana,
Ia ni sa vakaliwava mai e dua na cagi ko Jiova,
Era sa malai ka cagina me vaka na qani sila madu.
25O cei me vakatautauvatataki kei na Kalou Yalosavasava?
E dua li e rawa ni rau vakatauvatani kaya?
26Rai cake mada ki lomalagi;
O cei a bulia na veikalokalo o raica?
O koya sa liutaki ira me vaka e dua na mataivalu,
Sa kila na kedra lewe levu
Ka kacivi ira ena dui yacadra!
Sa ka levu sara na nona kaukauwa,
Ka sa sega mada ni bau yali e dua vei ira!
27Na cava o kudruvaka Isireli,
Na cava o kaya kina Jekope
Ni sa sega ni kila na nomu leqa ko Jiova
Se sa sega ni kauwaitaka na veika o dodonu kina?
28O sega li ni kila, o sa sega li ni rogoca?
Sa tawa mudu ko Jiova na Kalou;
Sa bulia o koya na vuravura taucoko.
E se sega mada ni bau oca se malumalumu.
Sa sega ni dua e kila rawa na nona vakasama.
29Sa dau solia na i cegu vei ira sa oca,
Kei na kaukauwa vei ira sa malumalumu.
30Ia era na malumalumu talega mai na i tabagone,
Ka ra na bale sobu na tamata bula.
31Ia o ira sa nuitaki Jiova
Ena vakavoutaki na nodra kaukauwa.
Era na cabe cake
Me vaka era sa vakatabana vakaikeli;
Era na cici ka sega ni oca;
Era na lako tu ka sega ni malumalumu.
Who We AreWhat We EelieveWhat We Do
2025 by iamachristian.org,Inc All rights reserved.
