ESERA 5 - Ai Vola Tabu Ena Vakavakadewa Vou（FNV）

Tekivu Tale na Tara Valenisoro

1

3Ena gauna vata ga o ya, e ratou a lako mai ki Jerusalemi o Tatinai na kovana ni veivanua ena Ra ni Uferetisi, kei Sicari Posinai, kei ira na vakailesilesi vakamatanitu tale eso, ka tarogi ira: “O cei sara mada e sa nona lewa mo ni tara ka vakaiyayataka na Valenisoro oqo?”

4Eratou a taroga talega na yacadra taucoko sara na tamata era veivuketaka tiko na tara vou tale ni Valenisoro.

5Ia na Kalou sa wanonovi ira voli na nodra qase na Isireli, ka ra sa mani lewa kina na vakailesilesi ni Perisia me ra se tei kakua mada ni vakatauca e dua na lewa me yacova ni ra volavola oti vei Taraiasi na Tui, ka me yaco lesu talega mai na kena i sau.

6Oqo na i tukutuku era sa vakauta vua na tui:

7“Vei Taraiasi na Tui, me yaco saka na tiko sautu ena dela ni nomuni veiliutaki.

8“Sa dodonu mo ni kila saka na tui ni keitou sa sikova oti mai na vanua o Juta, ka kunea kina ni sa tara vou tale tiko na Valenisoro ni Kalou levu ena vatu bulicaki lelevu kei na kau ena kena lalaga. Sa caka tiko na cakacaka ena nodra maqosa taucoko ka sa daumaka tiko na kena i lakolako.

9“Keitou a qai tarogi ira na nodra i liuliu na tamata se o cei sa lewa na kena tara vou tale na Valenisoro vata kei na kena vakaiyayataki.

10Keitou a taroga talega na yacadratou na i liuliu ni cakacaka oqo me rawa ni keitou tukuna yani vei kemuni.

11“Sa vaka saka oqo na nodra i sau ni taro, ‘Keimami sa nona tamata na Kalou ni lomalagi kei vuravura, ka keimami sa tara vou tale tiko na Valenisoro ka sa tara taumada ena vuqa na yabaki sa oti, ka vakaiyayataka e dua na tui qaqa kei Isireli.

12Ia ena vuku ni nodra a vakacudruya na Kalou ni lomalagi o ira na neimami qase, a sa mani vakalaivi ira kina o koya me vakadrukai ira kina ena i valu o Nepukanesa na tui Papiloni, a kai Kalidia o koya. A mani vakarusai na Valenisoro ka ra kau vakavesu ki Papilonia na lewe ni vanua.2Tui 25.8-12; 2Vei 36.17-20; Jere 52.12-15

13Ia sa qai vakarota o Sairusi na tui Perisia ena i matai ni nona yabaki vakatui e Papiloni me tara vou tale na Valenisoro.Esera 1.2-11

14A sa vakasuka lesu tale mai o Sairusi na i yaya koula kei na siliva kece a tokia o Nepukanesa ena Valenisoro mai Jerusalemi ki na burekalou eso mai Papiloni. A sa solia na i yaya kece oqo o Sairusi vei Sesipasa, o koya ka sa lesia me kovana mai Juta.

15A sa tukuna vua na tui me kauta kece na i yaya oqori ka la'ki biuta lesu ki na Valenisoro mai Jerusalemi, ka me tara vou tale na Valenisoro ena tikina vata ga sa koto kina e liu.

16A sa qai lako mai o Sesipasa ka qarava na kena vakadavori na yavu ni vale; ka sa ia tikoga na tara vale mai na gauna o ya me yacova mai oqo, ia e se bera tikoga ni tara oti na Valenisoro.’

17“Ia kevaka o ni sa yalovinaka saka kina na tui, me qai caka mada e dua na veivaqaqai me baleta na i tukutuku maroroi vakatui mai Papiloni me raici kina se a vakarota dina o Sairusi me tara vou tale na Valenisoro oqo mai Jerusalemi, se segai; ka mo ni qai tukuna mai vei keitou se cava sa lomamuni ena ka oqo.”