SAME 11 - Ai Vola Tabu Ena Vakavakadewa Vou（FNV）

Sere ni Noda Nuitaka na KalouVua na i liuliu ni sere. A nei Tevita.

1Au sa vakadinata Jiova ni o ni na taqomaki au,

A cava o ni kaya kina vei au,

“Dro ki na veiulunivanua me vaka na manumanu vuka,

2Baleta ni ra sa dreta na wa ni nodra dakaititi na tamata ca

Ka ra vakadodonutaka na nodra gasau

Me ra vanai ira na tamata vinaka ena butobuto.

3Na cava ena cakava rawa e dua na tamata dodonu

kevaka sa vakarusai na yavu?”

4Sa tiko ko Jiova,

Ena nona i tikotiko vakatui mai lomalagi.

Sa wanonovi ira tiko mai na tamata kecega,

Ka sa kila vinaka na veika era cakava.

5Sa dikevi ira ruarua na yalododonu kei na i valavala ca.

Ka sa cata na tamata i tovo ca ena yalona taucoko.

6Ena vakatauca na bukawaqa kei na sulifure vei ira na tamata ca,

Ka vota vei ira na cava rerevaki me kedra i totogi.

7Sa yalododonu ko Jiova ka taleitaka na i tovo vinaka;

O ira sa talairawarawa vua era na tiko ga e matana.